《愛在。貴族學園》: Ch 15 ~ 告白 Part 13

Ch 15 ~ 告白 Part 13（連載日期：2022/05/02）

「而且，我地係好朋友嚟咖，我都想你幸福咖喬喬！」天殷繼續頭先嘅說話......
 
「嗯嗯，我知道啦，不過都希望我直覺準啦」韻喬講完後，就繼續同天殷一齊研究功課，直到探病時間完結，姑娘喺病房外面敲門請天殷離開為止。

「好啦喬喬，今日嘅探病時間到啦，我夠鐘要走啦」天殷聽到廣播之後，就開始執自己嘅嘢，但係......

「啊殷殷呀！我想你陪多我一陣呀！求下你啦，陪下我啦，我夜晚得自己一個好悶呀！」韻喬為咗可以留住自己好姐妹，不停喺度扭計，搞到天殷哭笑不得。
 




「唔得呀喬喬，呢個係醫院嘅規矩嚟咖嘛，你就乖乖地休息啦！」天殷好似氹細路女咁，摸摸韻喬額頭氹一氹佢「聽日我同佢地兩個會再嚟睇你咖啦，最多我地都早到少少啦。不過喬喬你依家要乖先得咖喎」
 
「呀…咁好啦，你返屋企嘅時候小心啲啦，同埋你返到屋企再話我知啦！仲有就係多謝你碗湯啦！」韻喬都係要屈服於醫院規矩，但係由佢一個扁哂嘅嘴所見，韻喬都唔係心甘情願去遵從。
 
「好啦，咁就乖啦。咁我走先啦，聽日見啦！記得唔好做功課做到咁夜啦下，未好番要早啲休息啦！bye」天殷臨走前錫咗韻喬額頭一下。

不過，同樣嘅錫額頭，天殷同禮謙嘅後果，可以話係完全唔同。
 
「知道啦，殷殷，聽日見啦！bye」天殷離開病房後，再次讓喺醫院養病嘅韻喬回復寂靜。
 




李家嘅座駕好快就去到醫院，接天殷返去李家大宅。不過，由於天殷已經食過少少嘢，所以返到屋企之後，天殷就諗住夜少少先再食宵夜，所以喺Signal上同韻喬報平安之後，直接去沖涼，順便就同俊軒、禮謙開三人電話會議。

「嘿，兩位男士，聽日星期六放假，你地諗住幾點鐘去醫院探小喬呀？」天殷喺電話接通之後，先開口問俊軒同禮謙意見「不過喬喬頭先扭計，話想我地早少少上去喎，所以你地諗過先呀下！」
 
「我就冇咩所謂呀天殷，早少少都ok嘅，反正我地喺醫院都係陪韻喬，應該都冇咩特別嘢需會做呢！」禮謙先回答天殷嘅問題。

「之但係，聽日我應該要幫小喬追進度呀，今日小喬先慢慢開始睇今日教嘅内容」俊軒之後跟住講，但明顯同禮謙喺度唱反調。
 
「喔！咁樣樣呀，嗱一係咁啦，我同俊軒上去先囉，然後禮謙你可以夜少少先去?除非你都有嘢唔識，想軒仔順便教埋你？」天殷一邊喺洗手間度較水一邊提議道。





「都可以嘅天殷，不過俊軒你都係教咗韻喬同學先啦，如果我有唔識我可以返學校先至問都可以，我唔急嘅」禮謙道。
 
「咁一於就咁決定啦！」俊軒最後拍板道「係啦聽日嘅話，我地都係唔好開咁多部車啦，橫掂我聽日日頭都要過海整啲嘢」

「不如我去完之後，順便接埋天殷去律敦治啦！然後程禮謙可以六點左右先到醫院」
 
「可以呀！」禮謙同天殷兩個同一時間答俊軒，搞到喺電話裏頭嘅天殷面都紅埋。

「嘩，你地兩個使唔使咁夾呀？做咩呀？你地兩個一齊咗啦？」俊軒聽到之後又喺度寸人。
 
「林俊軒你…你…你依家係咪作死呀？居然咁大膽喺度笑我！？你係咪嫌命長呀依家？！」天殷聽完之後就喺度閙俊軒，不過又因為聽到俊軒話自己係咪同禮謙一齊，而變得吞吞吐吐。同時，天殷都已經較好水，除好衫準備入去沖涼。
 
「你唔好玩啦軒少！你幾時有見到我同天殷喺學校拍拖呀？」禮謙都好緊張咁澄清關係，但暗地搞到天殷其實都有少少唔開心「咦，做咩我聽到有水聲嘅？搞咩？」禮謙好好奇咁問。
 
「哦，我依家準備入去沖涼呀嘛，但係又想同你地傾好聽日嘅安排先喎，所以咪想一邊冲涼一邊傾囉！」





「Woo！」兩個男仔一聽到冲涼兩個字，就同時畀出咁嘅反應。

「喂！你地兩個衰人喺度Woo咩呀！」天殷其實都知道兩個雄性動物一定會咁反應，但又唔想佢地知，所以扮哂嬲反問。
 
「嗚！我又要想同靚女沖涼呀！我入嚟啦！」俊軒於是繼續喺度調戲天殷。

「你慳啲啦衰人！我先唔要畀你個咸濕佬睇哂呀！」天殷對住俊軒抗議。

「哈哈，我講笑咋嘛殷殷！你唔好咁認真啦！」
 
天殷冇直接回應俊軒，但係就轉到另外一個話題，一個非常尷尬嘅話題......

（待續 ~）





IG link https://instagram.com/bear_big_big_writer