《愛在。貴族學園》: Ch 15 ~ 告白 Part 11
Ch 15 ~ 告白 Part 11（連載日期：2022/04/28）
「你叫佢收啦！口花花到死！呢個林俊軒呀，之前呀都唔知係咪咁樣喺學校溝死女咖！」韻喬一邊飲湯，又一邊笑笑口咁喺度寸俊軒，搞到俊軒都唔知點面對兩個女仔嘅強烈恥笑。
「No la，真係冇啦，依家真係只係對住張韻喬先會係咁咖咋！」
「嗚~~~~~~好sweet喎！你地兩個幾時先會喺埋一齊啫？」天殷繼續葡萄俊軒對韻喬嘅好，不停咁慫恿韻喬考慮下同俊軒喺埋一齊。
「咪玩啦殷殷。好啦，殷殷如果你唔明今日上堂嘅嘢，就自己睇我畀小喬嘅notes啦！小喬就…今晚你都早啲休息啦，有咩唔明之後再講啦！喂，記得準時食藥呀，病喬！」俊軒順便收好嘢準備返屋企道。
「得啦，林爸爸，你真係囉嗦到死！正一長氣鬼！」韻喬又一次喺度寸俊軒囉嗦過自己爸爸。
於是俊軒又大感不滿「頂你啦，你又叫到我咁老！成日都喺度爸爸前、爸爸後！」
「唔該學霸先！by the way今晚我返到去之後，先再同你地兩個男仔講電話，安排定聽日嘅事」天殷感謝俊軒嘅同時，都不忘提俊軒聽日都要去醫院探病。
「好啦，咁你地兩個take care啦！多謝你啲湯呀殷殷。bye」「bye！」兩個女仔同俊軒道別
「記得聽日早少少過嚟教我功課呀記得」俊軒臨走之前，韻喬專登同俊軒講。俊軒於是做咗一個ok手勢，然後就帶埋書包離開病房。
等到俊軒真係離開咗醫院 i.e.起碼過咗十分鐘之後
「哈哈！我諗你都應該冇諗過，自從上次見家長之後，軒軒會對你好咗咁多呢！張韻喬，你今次執到啦！有個男仔真係為咗你而改變，仲要係學霸!」天殷喺度取笑飲緊湯嘅韻喬。
「咁又又又點呀！我先唔稀罕佢呀！」一講到林俊軒對自己好嘅時候，韻喬又開始高亢起嚟，而且塊面仲會好紅「條友成日出去溝女又口花花！仲要依家真係齊哂全級女仔嘅電話！」
「唉呀，你就唔好咁啦喬喬…」天殷又想改變韻喬對俊軒嘅睇法，但係韻喬似乎唔係好接受咁
「做咩呀李天殷，唔係連你都開始同佢講好説話下話？！我會對你好失望囉！」
「唔好失望住先啦」天殷再次截停韻喬，然後講出自己喺學校見到嘅嘢
「其實唔怕同你講啦，自從你唔舒服之後，軒仔都已經冇點理學校其他班嘅女仔啦，甚至小息嘅時候，其他女仔想搵軒仔，佢一個都冇睬之餘，仲叫佢地唔好再搵自己呀」
「嘩！世界變啦依家？！」韻喬聽到之後非常驚訝「不過就等我好返出院，返到學校上堂之後，我再睇下個花心flirt女王係咪真係轉死性先算啦！」
「都好嘅，但至少我睇到軒仔嘅決心先！」
「殷殷呀，你依家幫我抹身得唔得呀？」韻喬冇再同天殷，繼續糾纏喺俊軒嘅話題上面
「好呀！不過喬喬你呢度有冇毛巾同埋盤，可以畀我裝水呀？」天殷問道。
韻喬等天殷嚟探病嘅另一個目的，就係要對方幫吊緊鹽水而唔能夠沖涼嘅自己清潔一下身體。
「我記得洗手間入面有個大嘅藍色膠盆，你可以拎嚟裝水。至於毛巾…就喺呢度！唔該殷殷。不過你要小心啲喎，唔好倒哂啲水落自己度喎！」對於要依賴眼前呢位大小姐幫自己打水抹身，韻喬都不得不開聲提醒天殷，去表達自己對對方嘅擔心。
不過天殷好快就話「冇問題呀，不過我今日都幫你帶多咗兩條毛巾過嚟，等你可以用！咁我出去洗手間裝水先，你等我一陣呀。」
天殷喺出去嘅時候，就將病床嘅布簾拉好，然後就去洗手間“打水”。
過咗幾分鐘，姑娘就幫拎住盤熱水嘅天殷開門「唔該哂呀姑娘！」「小喬，我返嚟啦！」
天殷閂好門之後同韻喬講。不過，因為布簾將外面隔絕，所以韻喬都睇唔到布簾外發生咩事。
天殷入到布簾之後，就開始幫韻喬除衫褲。但始終韻喬係因為冷親先至會肺炎入醫院，所以天殷都好快手快腳咁，同韻喬抹乾净個身，再幫韻喬着返好衫褲。當然，天殷喺抹韻喬左手嘅時候，都格外小心，避免碰到韻喬個鹽水豆豆。
不過，因為天殷都唔小心掂到韻喬身體上敏感嘅地方，所以韻喬都輕輕咁嬌喘咗兩聲，但係天殷都不以為意。喺同韻喬着返好哂衫褲之後，天殷就拎埋個膠盆出去倒水。
「抹完身舒唔舒服啊，小喬？」天殷喺閂好門之後，就問坐返起身繼續做功課嘅韻喬。
「好舒服呀！唔該哂你呀殷殷，要你呢個大小姐幫我抹身，而且，你頭先你聽唔到我…舒服到叫出嚟咩？」韻喬非常怕醜咁講，面都已經紅哂。
「係咩哈哈，多謝你讚我嘅手勢啦！但其實我都係第一次幫人抹身咖咋，如果抹得唔好嘅話希望你唔好介意就真」天殷一臉滿足咁回應。
之後，因為自己今日上堂嗰陣，功課都有少少唔明，所以天殷都拎咗俊軒畀韻喬嘅notes出嚟睇。
天殷睇咗幾版之後，就讚不決口話「嘩，估唔到軒仔咁有心機整notes畀你喎！而且仲夠哂詳細，小喬，借一借你呢份notes嚟抄下得唔得啊？唔該」
不過......
（待續 ~）
IG link https://instagram.com/bear_big_big_writer