《愛在。貴族學園》: Ch 15 ~ 告白 Part 10

Ch 15 ~ 告白 Part 10（連載日期：2022/04/25）

「知道！最……最衰都係你呀林俊軒！」韻喬隨即喺度向俊軒抱怨，指對方亂講嘢搞到自己畀陳姑娘笑

「學嘢啦嘈嘈嘈！今日啲嘢好深呀，如果搞唔清啲concepts嘅話，有排你受呀！」

「GG啦今次！」喺韻喬叫完救命之後，俊軒就借筆記畀韻喬抄，同時慢慢咁講解内容。
 
過多一陣之後，身穿一身薰衣草色長裙嘅天殷都去到醫院，準備探韻喬。





「咯咯」俊軒聽到敲門聲後，就行去開門畀天殷「喂天殷……哇你咁多嘢帶過嚟，做咩唔打電話叫我落嚟幫你拎呀？」

「喬喬！我嚟陪你啦！」天殷入到病房，第一件事就係同韻喬打招呼，而同時就將個睇上去有啲重嘅袋，交到俊軒手上

「小軒，幫我放咗喺嗰度先！唔該你！」説罷天殷都放低一個類似湯壺嘅嘢喺枱面。

「殷殷！」韻喬用一個老淚縱橫嘅語氣同天殷講「你終於都嚟啦，我等你等到就快變望殷石啦！」
 
「誇張啦你張韻喬！等到變石你都講得出口！真係難為本小姐又要幫你執衫褲，又要煲湯畀你補身嘛！所以咪夜少少先過嚟囉！」天殷一邊喺度執嘢一邊抱怨道。
 




「係啦係啦！今日真係多謝哂你地啦，又要寫卡又要教我做功課，依家又要煲埋湯畀我飲」韻喬作為貴族學校入面少數相對貼地嘅學生，自然對其他人由其係同學都比較有禮貌。

「哈哈！都係喬喬對我最好！」天殷於是就錫咗韻喬一啖「小軒呀，麻煩你幫手執一執張枱先，小喬佢要飲湯」「知道啦殷殷」
 
於是俊軒就將原本攤哂出嚟嘅notes同功課收好「噔噔噔噔！魚腥草紅蘿蔔煲瘦肉湯！」天殷一邊打開湯壺個蓋，再一邊同韻喬、俊軒介紹，同時就倒一碗畀韻喬「呢個湯對肺同氣管好呀，慢慢飲啦。」
 
「多謝殷殷同auntie啦，要幫我煲湯。咁我唔客氣啦！不過…林俊軒，冇你份喎哈哈哈！」韻喬笑完俊軒之後就開始飲湯......

「嘩！好滋潤呢！飲咗好似好舒服咁！」韻喬讚嘆道「係呢殷殷，邊個教你煲咖？」
 




「哦，我上網自己睇咖，然後咪叫厨師幫忙買材料同煲埋佢囉。呢個湯已經算簡單咖啦，但點都好啦，你飲咗之後有舒服啲就好啦」天殷解釋道。
 
被兩個女同學放置play嘅俊軒，此時就望實韻喬嘅湯。韻喬好快睇得出俊軒都想試下，而且今日都麻煩過俊軒好多，雖然頭先先畀俊軒表白同整蠱完，所以韻喬就開口話……

「你都過嚟飲啦小軒，今日都辛苦哂你啦！要你教我咁多功課」韻喬邀請俊軒飲湯「係啦，殷殷都飲少少啦，反正我應該都飲唔哂，飲得太多鎎話我又要去厠所，麻鬼煩！」

「多謝小喬！」俊軒同天殷一齊講，於是三個人就一邊喺度飲湯，一邊講笑同是非。

過多差唔多半個鍾之後「俊軒啊，你要唔要返屋企先呀？我怕你一陣間留得太夜，auntie會擔心你呀，而且你又未食飯。殷殷你應該食咗飯先過嚟咖可？」韻喬先提出道。
 
「我其實食咗個麵先出嚟嘅。係啦軒仔呀，其實呢…呢度有我睇住小喬就ok咖啦，你都係快啲返屋企食飯啦，唔好要林auntie擔心得你太多呀」天殷和應咁想盡快打發俊軒走。
 
「還好啦，其實我都唔太趕，又唔係特別肚餓。不過，既然天殷你話你搞得掂小喬嘅話，咁我就返去先啦」俊軒道「係呢，頭先啲notes同功課你跟唔跟到呀？」
 
「都ok啦，暫時都follow到，唔該哂你」韻喬今次就好真誠咁多謝俊軒，基本上就同頭先天殷到之前個態度完全唔同。




 
「咁就好啦，不過如果今日講得太多内容嘅話，我都怕你會攰同消化唔切。所以，今晚我留低我啲Notes畀你，方便你聽日喺我地未上嚟之前都可以再睇，然後唔明先再一次過問我啦」俊軒道。
 
「嘩！小軒你真係貼心啦，真係好仔到一個點！喬喬呀，小軒佢對你咁好，不妨考慮下真係做你男朋友都好喎！」目睹一切嘅天殷，用一種酸酸嘅語氣講出呢句話。

（待續 ~）

IG link https://instagram.com/bear_big_big_writer