《愛在。貴族學園》: Ch 15 ~ 告白 Part 9

Ch 15 ~ 告白 Part 9（連載日期：2022/04/22）

「喂喂喂小喬，你喺度搞咩呀？！你做咩無啦啦喺度自己打自己呀？傻咗呀你？」

俊軒明顯畀韻喬突然嘅舉動嚇親，所以都下意識之下都摸一摸韻喬個額頭「你係咪之前發高燒燒壞咗個腦，變得不受控呀？要唔要叫醫生refer你去睇埋神經外科？」

「啊！痛嘅，咁即係我唔係喺度發緊夢啦！」韻喬對自己大叫「啊！冇可能咖！佢地兩個點解會同一時間鐘意我咖？！我到底有咩好呀呀呀呀！！點解唔可以都好好咁做朋友呀？！」

「你冷靜少少先啦小喬，我知道你依家好不安，但無論你信又好，唔信都好。喺呢個世界上，唔係所有嘢嘅發生，都會有合理嘅原因做支撐，先會發生到咖！」俊軒嘗試安撫韻喬，去接受兩個好友同時鍾意自己嘅事實。





「冇……冇可能咖，呢個世界事出皆有因，邊有可能會咁樣咁巧合咖！你地兩個一定有問題！」

「講！你地兩個係咪夾埋喺度玩我？！」韻喬此時都不忘天才本色，同人嗌交都充滿科學頭腦。

「no no no，呢個世界所有嘢，凡存在就必然合理……」俊軒喺嗌交嘅時候，都唔係一盞省油的燈，嗌個交都要引經據典

「反正我同你講，我林俊軒就一定會追硬你咖啦！而我之所以依家話你知，就係只不過想畀定你一個心理準備畀你咋嘛！我一定會用盡可以嘅辦法去追你，同時令你鍾意我一個咖，張韻喬！」
 
「哼！你你你…..到時候做到先算啦！林俊軒！」韻喬繼續好唔憤氣咁講「可能到最後，你兩個都追唔到我呢哈哈哈！」





但係好快就有人嚟敲門，將佢地兩個嘅對話打斷。
 
「呀……兩位後生仔，呢度係醫院嚟咖，而且隔音都好差，如果你地需要打情駡俏嘅話，都麻煩靜少少呀，避免影響其他病人休息呀！唔該你地」原來係陳姑娘敲門去提醒兩位注意聲浪。
 
「呀！唔好意思啊陳姑娘，我一時忘咗形，唔知道原來咁大聲，好對唔住啊！」俊軒同韻喬同時低聲向陳姑娘認錯。但係俊軒同韻喬好快都瞪大對眼同對方對望。
 
「哈哈，恕陳姑娘我八卦啦，你地兩位其實係咪….男女朋友嚟咖？你地使唔使都咁夾呀?」陳姑娘取笑兩位，搞到韻喬非常唔自在。
 
「其實依家未係住呀陳姑娘，但係將來就會係咖啦哈哈哈！張韻喬！你唔好諗住可以走得出我手指罅啊！」俊軒先回答，然後再同韻喬喺度打情駡俏。
 




原本畀陳姑娘咁樣問，而搞到非常尷尬嘅韻喬，喺聽到俊軒咁樣答陳姑娘之後，塊面又即刻紅哂兼且非常不爽咁講「屁屁屁！你個死人頭林俊軒！依家邊個應承話做你女朋友呀？！」
 
「救命呀陳姑娘，病人想打人呀！」俊軒之所以咁樣同陳姑娘求救，係因為張韻喬呢個暴力女生，又一次想打俊軒。

不過陳姑娘冇理到韻喬，繼續喺度笑佢地「你地兩個其實都好襯吖，男同學你加油啦，陳姑娘一定會支持你將韻喬追到手咖！」

同時陳姑娘喺順便檢查韻喬包鹽水嘅時候，就同韻喬講「韻喬呀！人地男同學對你咁好，放學就嚟探病，頭先仲咁好心機教你做功課，你就試下接受下人地啦！」
 
「哈哈，我一定會加油咖，一定會將韻喬追到手咖！」俊軒好得戚咁同陳姑娘講，陳姑娘都做咗一個like手勢畀俊軒。
 
「喂呀！唔制呀！！呢度全部人都喺度蝦我嘅！搞錯呀！我要出院呀！」韻喬扁哂嘴咁喺度扭計。

當然，俊軒同陳姑娘都喺度笑出聲，皆因面紅紅扭計嘅韻喬真係好可愛。
 
「鬼叫你咁可愛啊！成個女神咁呀，張韻喬！」俊軒又喺度寸韻喬，但當然今次俊軒其實喺想氹下韻喬開心啦。




 
「你收檔啦你！都唔知道你幾時真幾時假！一時就話人暴力狂，一時就話人可愛！口甜舌滑！假到死假到死！！！」韻喬又一次非常唔領情咁喺度抗議「你個衰人，你仲教唔教我做功課咖？！」
 
「咁……呢個就要問下陳姑娘啦。陳姑娘，唔知道韻喬平時喺病房裏面，有冇乖乖準時食飯食藥呢？」俊軒記得自己曾經見過，要韻喬準時食藥同休息，先會借notes同教對方。
 
「放心啦，呢位男同學！我同我班同事會幫你地手，睇實呢個大頭蝦咖啦！」韻喬再被徹底KO

「好啦，我都唔阻住你地兩個喺度sweet啦，我返出去做嘢先。不過記得唔好咁嘈啦！」

陳姑娘講完之後，就幫佢地閂埋病房度門...

（待續 ~）

IG link https://instagram.com/bear_big_big_writer