《愛在。貴族學園》: Ch 15 ~ 告白 Part 4

Ch 15 ~ 告白 Part 4（連載日期：2022/04/11）

「咁程禮謙同學，我好認真咁問你，你話你鍾意咗我好耐吖嘛，咁……你講下你究竟鍾意我啲咩先？」

「依家……依家我到底鐘意你啲咩，其實小弟我……都唔知道。但係張韻喬同學，我…我就係鍾意咗你！」禮謙非常慌張咁講，但同時又懇請韻喬接受

「求你可唔可以畀個機會，等我去追你嘛？我對自己有信心，一定會令你愛上我！」

「既然你依家唔知道吖嘛，咁好囉，你就即管一邊諗個鍾意我嘅理由，一邊去追我囉！」韻喬反哂白眼，依然非常不滿咁同禮謙講，搞到禮謙都唔係太知道要點樣收科。而且韻喬仲繼續講落去「不過我好肯定嘅係，我係唔會咁容易就鍾意你嘅！」
 




然後韻喬仲突然間自己爆seed，講咗一大篇關於自己對愛情嘅睇法...

「基本上，愛情係一種唔能夠用科學嘅方法去解釋嘅嘢，而且，都係一樣好容易話冇咗就冇咗嘅嘢嚟，根本愛情就係用嚟傷害自己嘅無聊嘢，……（下刪一萬字）。」

「總之，程禮謙同學，我就勸你好好努力讀書先，唔好浪費時間喺我身上啦，因為我依家當你真係一個，係好好好好嘅同學同埋朋友。對唔住」

「不過，我都唔希望我地之間嘅友情，會因為頭先嘅事，而會有任何變化」去到最後，韻喬用好平靜嘅語氣同禮謙講。
 
「嗯，放心，我都會當你係朋友。不過，就算韻喬同學你呢個時候你唔接受都好，但我….我都唔會咁容易放棄咖！」雖然依家畀韻喬拒絕之後，心裏面非常唔好受，但禮謙都受到刺激而下定決心，努力去追求韻喬。





但為咗防止尷尬癌所引發嘅dead air可能會喺病房内擴散，於是禮謙就轉移話題化解「不過，見到你頭先咁精神咁，講咗一大堆你嘅愛情偉論畀我聽，你依家情況應該都好唔少啦？」
 
韻喬於是點點頭話「嗯，其實都有好啲啦，但係我隻左手依家吊住鹽水，變咗我唔可以郁動太多，同埋就係打針藥嘅時候，隻手會有少少感覺囉」其實韻喬嘅情緒，都比頭先稍為平伏返少少

「不過，唔可以沖涼呢下，就真係覺得好kam，而且好唔舒服囉嗚嗚」
 
「呃，抹身呢個…都係要等天殷同學過嚟，先可以幫你搞喎。但係，天殷同學頭先話今日放學之後比較忙，所以你要再夜少少先可以嚟同你抹身啦」禮謙道，但同時都見到韻喬枱面上面嘅功課，上面有俊軒嘅字跡。

「咦，你喺度做緊LS功課呀？你跟唔跟到俊軒啲Notes呀？而且我都見佢好似好有心機整咁！」





「係呀，不過有幾個位我好似有少少唔明，但唔緊要啦，一陣我會等佢上到嚟我先再問佢」韻喬一邊繼續做通識功課一邊回應禮謙。
 
「哈哈，天才如果你都唔明嘅話，我諗都係問返學霸會好啲」禮謙帶點酸講道，同時都寸到病塌上嘅韻喬一棟都冇

「又會係咁啦！我都已經訓喺醫院啦，都要繼續畀你寸，呢啲都唔知係咩同學嚟咖！」

「冇呀，講下笑啫，你繼續做啦」

慘食韻喬檸檬嘅禮謙，覺得依家留喺度，都唔會太過開心。為免畀韻喬見到自己懦弱嘅一面，禮謙就喺Signal度，問下俊軒到底幾時到。

俊軒喺電話裏面，就話自己都搞得7788，已經叫司機準備去學校接自己去醫院。
 
於是禮謙見俊軒應該唔會太耐就會到，唯有以為免阻住俊軒表白，而搵理由就自己走先...

「好啦，韻喬同學，我有啲事要走先啦。你慢慢一邊做功課，一邊等學霸軒嚟教你啦」禮謙一邊收拾書包一邊講





「喂！你個衰人頭先畀我話完兩句，依家就嬲豬唔陪我啦？」韻喬以為禮謙因為食自己檸檬而嬲自己，唯有扁哂嘴道「但係聽日係星期六，你都會嚟睇我咖可？」
 
「唔係啦，我點會真係咁小氣吖，我一定會努力去説服你咖，韻喬同學！」禮謙強顏歡笑嘅模樣，都已經畀韻喬睇穿咗

「不過，我依家真係有嘢做要走啦。至於聽日嘅話我…都……應該ok嘅，但今晚會再同另外嗰兩個夾一下時間先。」

「不過韻喬同學呀，你依家仲病緊咖，你都係都唔好太辛苦自己啦，有時間就休息多啲啦，咁聽日見啦！」禮謙講完之後就慢慢步向門口

「好啦，拜拜」之後禮謙就頭也不回咁直接離開病房，連韻喬嘅一句再見都未講完就已經出咗去「拜拜啦禮謙同……又會走得咁快嘅」同時病房都回復本來嘅寧靜……

（待續 ~）

IG link https://instagram.com/bear_big_big_writer