《愛在。貴族學園》: Ch 15 ~ 告白 Part 5

Ch 15 ~ 告白 Part 5（連載日期：2022/04/13）

臨離開病房之前，禮謙又走到護士站，搵護士查問下韻喬嘅病情…

「張韻喬佢依家情況都穩定，不過都要清咗肺入面啲菌先，而且韻喬仲未退哂燒，所以都要喺度留多幾日先可以出院」

「好嘅，唔該哂姑娘！」「唔使客氣」禮謙之後就好放心咁離開醫院。
 
但與其話放心，其實此刻嘅禮謙好揪心就真。





喺一上車之後，禮謙就即刻打電話畀俊軒，而俊軒都好快聽電話「軒軒，我已經走咗啦，你依家可以上去探韻喬同學咖啦！」
 
「ok，我啱啱喺學校出咗發啦。係啦，小喬嘅情況點呀？仲有冇發燒咁？」俊軒第一件事，就係先關心韻喬嘅情況

「韻喬同學情況都幾穩定，但係姑娘就話佢未退哂燒，而且肺都仲有少少花，所以韻喬應該都要住多幾日醫院咖啦」
 
「明白，唔該你先。咁表白呢？小喬佢…畀咩反應你呀？」除咗韻喬嘅病情之外，俊軒關心嘅另一件事，當然就係兩兄弟之間嘅戰情。

禮謙於是倒抽一口涼氣，非常唏噓咁講「唉，咪提拉小軒……」





「下？咪提？你地頭先發生咩事呀？」俊軒非常驚奇咁問，畢竟禮謙份人都好少咁灰

「韻喬同學佢…拒絕咗我呀，話只係當我係佢好好嘅朋友，而且頭先仲喺病房好大聲咁，發表一大堆自己拒絕愛情嘅偉論之餘，仲話唔會鍾意我添呀！」禮謙一諗到韻喬頭先嘅一番説話，就即刻垂頭喪氣咁款。

不過另一頭嘅俊軒，心裏面當然就有少少暗爽啦。

但係俊軒諗深一層，既然韻喬可以對禮謙都講到咁絕嘅話，搞不好一陣間到自己上馬嘅時候，韻喬可能會用相同嘅方法，甚至更極端、難聽嘅説話去拒絕自己。

一諗到呢度，俊軒個心都有少少寒。
 




「原來係咁。不過我自己覺得啦，可能小喬都係之前畀其他男仔嚇親過唔少次，所以先至會咁收埋自己，拒絕哂啲男仔嘅表白啫！」俊軒強裝鎮定咁勸勉禮謙

「而且一陣我都可能會畀佢用相同嘅方法拒絕呢！所以呢，我地兩個都慢慢嚟啦，唔好心急！」

「唉，希望韻喬同學之後都會慢慢接受我啦」禮謙依然都係好唔開心，俊軒就唯有再畀多少少正能量

「大家都加油啦，公平競爭。好啦，我都差唔多去到醫院啦，今晚我地返到去再講電話啦，Bye！」
 
「ok，你都加油啦，希望你下場都唔好好似我一樣咁慘啦」雖然要同死黨競爭，但係禮謙依然都好大方咁祝福好友

「係啦小軒呀，韻喬同學頭先話LS有功課唔太明白要問你，你自己都準備一下先啦！」「知道，咁唔該哂你先，Bye」

喺同禮謙收線之後，俊軒嘅不安感都越來越大，雖然自己都仲有機會。但諗到可能一陣間要同韻喬表白嘅時候，都可能會被韻喬一下拒絕，搞到自己冇face之餘，仲可能會搞到之後面阻阻，然後前功就會盡廢。

而且，一陣間自己仲要教韻喬功課，呢個都係咁多年以嚟嘅第一次，畢竟基本上都冇咩可以難倒韻喬，而需要俊軒出手教對方，所以俊軒都有另外嘅不安感





“希望我一陣間都可以平安度過，唔會畀小喬打到入對面病房“。就喺俊軒繼續諗嘅同時，林家嘅座駕就已經去到律敦治醫院。
 
另一邊廂，喺律敦治醫院病房内……
 
“點解….點解無啦啦禮謙話會鍾意我嘅？”一邊做功課嘅韻喬一邊大感不解，不停咁同自己講

“而且明明我地兩個，都唔係話有太多兩個人單獨相處嘅時間，甚至如果唔係因為同班，同埋要幫手扮個死人頭嘅女朋友，我地都冇太多交集，咁點解佢要咁講？但係我真係只係當佢係朋友”

“我真係……真係有少少怕啲男仔，點解埋得我身嘅，好似去到咁上下，都會話想追我嘅？但係當我一開始就拒絕嘅時候，啲男仔就即刻疏遠我，然後就話我係冰山美人、甚至話我係les呢？“

“到底，啲男仔點樣係點樣睇男女關係咖呢？係咪一定要我say no之後，就一定要疏遠我，然後唔畀我睇清楚個男仔，係咪真係可以靠得住呢？唉呀真係好煩呀！到底邊個發明拍拖呢樣嘢咖！？“

（待續 ~）





IG link https://instagram.com/bear_big_big_writer