《愛在。貴族學園》: Ch 15 ~ 告白 Part 3

Ch 15 ~ 告白 Part 3（連載日期：2022/04/08）

「俊軒話佢要幫你拎書、文具、功課同埋筆記簿，而且佢仲要喺圖書館，做今日教嘅notes畀你溫，等你可以消磨下時間…」

「至於天殷就話，要同你拎多少少日用品過嚟，而且要返一返屋企先，所以要夜少少先可以過嚟」禮謙道。
 
「喔！原來係咁！不過真係唔該哂你地呀！明明你地自己都有嘢做，都要你地幫我做咁多嘢！真係好唔好意思呀！」韻喬感謝禮謙道。
 
「唔使客氣，始終我地係_ _朋友吖嘛，幫你都好正常啫」其實禮謙係想講埋“男女”嗰兩個字。





當然，佢依家都冇咁嘅勇氣住，所以先吞咗呢兩個字，而韻喬都冇太大為意。
 
「嘿，咁韻喬同學你尋晚到今朝有冇乖，準時食飯同食藥呀？」禮謙突然專登咁問韻喬，就係因為怕韻喬去到醫院都唔識照顧自己。

畢竟今次要入醫院，韻喬自己嘅責任相當大，原因咪就係冇好好照顧自己。
 
「梗……梗係有啦！謙謙呀，你諗下都知啦，呢度醫院嚟咖嘛！如果我試下唔準時食藥嘅話，你覺得我會唔會畀人鬧吖啦？！」韻喬喺度同禮謙抗議，同時又想話禮謙唔用腦。
 
禮謙冇直接回應韻喬嘅反駁，只係選擇去轉話題「係啦韻喬同學，我地5A全班同學仲有Ms張，話有樣嘢呢，今日托我要拎嚟醫院送畀你」同時禮謙都行開去到床尾。
 




韻喬聽到Form 5A有嘢畀佢，就即刻好奇寶寶上身，稍稍傾前身軀，睇下係咩嚟「有嘢托你拎過嚟？係咩嚟咖？」

禮謙就喺床尾嘅書包度，拎咗今日下晝Form 5A寫嘅嗰張心意卡出嚟，然後就放喺檯上打開畀韻喬睇。
 
「嗱，呢張心意卡，係我地全班一齊寫嚟送畀你咖！大家知道你病咗入醫院之後，都話想表達大家嘅小小心意，所以就買咗呢張卡，希望小喬你會鍾意啦！」其實張心意卡設計唔係太花巧，簡簡單單。

至於大家寫畀韻喬嘅説話，離不開都係咩get well soon、早日康復出院之類嘅打氣説話。

當然都有部分比較有心思嘅同學，都寫多少少，話韻喬之後應該要點點點照顧自己，又或者等韻喬返到學校之後要點點點咁
 




韻喬喺睇完張卡之後，可能深受同學對自己嘅愛而感動，於是雙眼紅紅咁同禮謙講「真…真係好多謝你地呀！你地嘅心意我都收到哂啦，放心啦，我一定會好好咁養病咖，同5A講等我滿血回歸啦！」

然後，韻喬就將張心意卡影低，然後放上自己個ig，仲落埋Caption話「多謝大家嘅厚愛，人情嘅嘢好難還得清。我張韻喬一定好快返嚟，然後再陪大家一齊學習同玩得開心！」

而5A嘅其他同學，甚至有其他班嘅同學，喺見到韻喬個post之後，都有畀Like同再留言打氣。

當然都有隔離班唔知道韻喬咩原因入醫院嘅同學，都喺下面留言八卦下想知發生咩事。
 
「係喎，韻喬同學呀，不如我都睇下你仲有冇發燒先」

「下，我地呢度幾個鐘就探一次熱啦喎，唔使啦！」禮謙冇理到韻喬嘅説話，自己走埋韻喬床邊，一邊輕摸韻喬嘅額頭，再講多一句「咁我……唔太放心嘛」

韻喬冇回應到禮謙嘅説話，不過，喺禮謙摸完韻喬個額頭之後，禮謙突然之間烏低身，借勢輕輕咁，錫咗一啖落去韻喬嘅額頭上邊。

冇錯，一直喜歡韻喬嘅禮謙，終於趁喺病房二人獨處嘅時候鼓起勇氣，準備要同心愛嘅韻喬表白。





「程禮謙…同學….你….做咩？！」對於自己個額頭突如其來被錫，韻喬自然都反應唔切，只係食哂帶又面紅紅咁質問禮謙「你…做咩……做咩無啦啦喺度錫我個額頭呀？！」

「小喬，我…我只不過……」禮謙面對韻喬嘅質問，突然之間欲言又止，基本上就算頭先用咁大嘅勇氣，所走出嘅呢一步，禮謙都畀韻喬強大嘅氣場，嚇退咗唔少。

「你只不過咩？你講埋佢吖！」韻喬見到禮謙仲係吞吞吐吐，於是繼續好不滿咁講「程禮謙同學！你到底知唔知道，啱啱你對我做嘅呢個動作，我覺得只可以喺一對拍緊拖嘅情侶中先會做，而唔係咁隨便就發生咖！」

「呃！韻喬同學呀，呢度醫院嚟咖，而且你自己都仲未好返，你都係冷靜少少先，你咁大聲嘅話，我怕你會嚇到姑娘等等會跑入嚟，以為我同你發生咩事…」禮謙試圖平伏韻喬嘅情緒，同時又想表達自己對韻喬嘅愛。

不過禮謙一直都畀不滿緊嘅韻喬食住個勢「我只不過想同你講，我唔係你所講咁隨便，但係我…我…我….」
 
「Ok，Sorry，等我冷靜少少先」韻喬喺試圖等自己冷靜咗之後，再喺度問非常緊張嘅禮謙「咁你頭先想同我講咩？頭先又做咩無端端錫我額頭？」
 
「張韻喬同學，其實我….鍾意咗你，我程…禮謙…真係好鍾意你，鍾意咗好耐」禮謙終於都講出咗，呢句令佢唔安樂咗一排嘅説話「你可唔可以……做我女朋友」不過，禮謙完全唔敢望住韻喬。





「咩話？！你話你鐘意我？！而且想我做你女朋友？！」韻喬完全唔敢相信，一向文縐縐而且怕事嘅禮謙，竟然會鼓起勇氣向自己表白。

但係一直當對方係朋友嘅韻喬一時之間都接受唔到，於是繼續質問禮謙......

「咁程禮謙同學，我好認真咁問你，你話你鍾意咗我好耐吖嘛，咁……你講下你究竟鍾意我啲咩先？」

（待續 ~）

IG link https://instagram.com/bear_big_big_writer