《愛在。貴族學園》: Ch 15 ~ 告白 Part 2

Ch 15 ~ 告白 Part 2（連載日期：2022/04/06）

喺開始上堂之後，俊軒為咗幫韻喬，做一份符合佢standard嘅notes，於是都比平時更加把勁聽書，幾乎全日上堂嘅時候都冇同過人講嘢，就連自己班“後宮”們瘋狂轟炸嘅Signal，一概不讀不回。

不過講起俊軒班分佈全校各個年級嘅“後宮”，其實喺搵韻喬扮自己女朋友之後，俊軒都溝少咗女，而且都非常避忌，避免喺學校裏面同佢地有太多接觸，估計都係同鍾意韻喬，或者至少想改變自己喺韻喬心中嘅形象有關。
 
中午lunchtime嘅時候，趙建龍就同埋天殷、俊軒佢地，一齊坐車出去買心意卡，順便都一齊食飯。而喺過後，大家就繼續一邊上堂，一邊逐個喺心意卡上面留言畀韻喬。

好快佢地就已經寫到張心意卡滿哂，咁當然，5A嘅同學都好識做，因為中間嘅位置，就交畀幾位最好嘅朋友佔據。而喺放學嗰陣時，Ms張都特登第一時間，返到過嚟5A班房寫卡。
 




喺確定大家都已經寫好卡之後，禮謙就問俊軒「喂小軒，你係咪應該都要啲時間整理一下今日嘅notes，然後整理完先再去醫院畀韻喬同學？」
 
「要阿，頂，今日個個老師教嘅嘢，全部都好深囉，内容又長，真係要少少時間先執得好」俊軒嗱埋口面咁講「咁你依家有冇嘢做呀？」

「冇呀」禮謙答道。

俊軒考慮一下之後，就話「謙謙，不如你依家過去醫院先拉，反正天殷佢要幫韻喬執多少少日常用品，而且佢頭先食lunch嗰陣，話自己要返屋企拎啲嘢，所以唔會太早」

「咁既然你依家ok行得嘅話，你咪去醫院陪下小喬先囉」





「Ok，我知道啦小軒」禮謙講完之後就準備動身「喂！謙謙你記得帶埋5A張心意卡去醫院呀！我估小喬收到之後一定會好開心，而且都會覺得5A係好有愛嘅一班！」俊軒道。
 
「放心啦小軒，我都會記得嘅」禮謙講完之後都對一下表「好啦小軒，我屋企個司機都應該等我好耐啦，我去醫院先啦，你加油啦，再見！」「Bye！」

講完之後禮謙就上車離開學校，前去律敦治醫院準備探病，而俊軒就帶同書包同韻喬嘅習作，去圖書館幫韻喬整理筆記。
 
不過，今日唔知做咩咁塞車，所以都差唔多用咗30分鐘車程，禮謙先去到醫院。雖然塞車，但因為病房嘅探病時間仲未到，所以禮謙就喺病房外嘅大門口等。

等到四點半，探病時間一到，禮謙就進入病房搵韻喬。
 




喺病房裏面，左手吊住包鹽水嘅韻喬，好專心咁坐喺枱前面，做緊尋日嘅功課，完全唔知道禮謙已經入咗嚟，因為禮謙居然一反平時禮貌行先嘅常態，佢冇敲門就入咗去。

禮謙心裏面覺得，認真做功課嘅韻喬，真係好吸引自己，基本上韻喬就係自帶仙氣嘅存在。喺旁邊望住韻喬差唔多成分鐘之後…

「喂！韻喬同學！」禮謙就用好細嘅聲，喺韻喬耳邊講「做咩做到咁專心，連我入咗嚟成分鐘咁耐都唔知呀？」

「咦？禮謙你嚟咗啦！」韻喬於是抬起自己個頭，喺見到禮謙之後，就非常驚喜咁講「我喺度做緊尋日嘅功課呀，不過你幾時入嚟咖？點解我唔知，而且我都聽唔到有聲嘅？」
 
「哈哈，我喺探病時間一開始嗰陣咪入嚟囉，不過我見你好專心咁做功課，所以咪冇敲門就走入嚟見你。乜你依家唔想謙謙我喺呢個時間同地方出現咩？」禮謙扮哂扁嘴咁講。
 
「梗係唔係啦，我幾時有嫌棄你喎謙少！」韻喬見有同學上嚟陪自己，於是一邊慢慢收好通識科嘅功課，清空張枱面，然後一邊喺度講「呢度其實自己一個，都可以好悶咖，所以我等你地過嚟等咗好耐啦。」
 
「咁韻喬同學你習慣未？」禮謙關心道

「未呀，就係覺得好悶，所以我先叫姑娘幫我喺個櫃度拎嘢出嚟做，而且又吊緊鹽水，想出去散下步都唔得」韻喬講出喺醫院嘅沉悶真相。





「不過係呢，點解得你一個上嚟嘅？佢地兩個去咗邊呀？點解佢地唔同你一齊過嚟嘅？」韻喬所指嘅佢地兩個，當然就係俊軒同天殷。

（待續 ~）

IG link https://instagram.com/bear_big_big_writer