《愛在。貴族學園》: Ch 14 ~ 入院 Part 8

Ch 14 ~ 入院 Part 8（連載日期：2022/04/01）

「喂，天殷同學？」「喂，謙謙？你打嚟搵我有咩事？」天殷好溫柔咁問，而且都有少少開心。

禮謙於是都反問一下天殷「下？乜依家有事先可以打電話畀你咖咩，天殷同學？」
 
「唔…..唔係呀！做咩咁講喎?其實……如果你鍾意嘅話，我都唔介意同你傾電話嘅，哈哈！」禮謙聽完天殷咁講，心裏面覺得天殷有少少奇怪。但係眼前要傾嘅，絕對唔係呢啲...

「哈哈，多謝你先啦天殷同學。不過，你知唔知韻喬同學佢點呀？喺我地幾個走咗之後，佢喺醫院有冇唔習慣呀？」對於自己喜歡嘅人喺醫院留醫，禮謙當然都好關心韻喬嘅情況。
 




「哦，我頭先食完飯之後，都有同喬喬傾咗一陣電話嘅，不過佢都暫時冇咩嘢掛，而且應該受到藥物影響，喬喬話個人好攰下話想休息，我諗應該早半個鐘之前同我收咗線之後就訓咗」天殷回答道。
 
「不過，今日都真係辛苦哂你地兩個，你地屋企人冇問起下話？」天殷繼續講落去

「唔好客氣啦天殷同學，身為男仔都應該幫下女仔手嘅。但聽到韻喬同學冇太多適應問題都好啲嘅。希望佢都休息多啲，然後快啲好返啦。」禮謙講出自己心底話。
 
「至於我屋企人都冇問太多呀，但係學霸軒嘅話，我就唔知道佢有冇同auntie交代啦」

「嗯嗯，唔緊要啦。係呢，咁你地聽日會點樣安排探病時間呀？」天殷突然之間就問起探病嘅安排，而禮謙都自然要記得同韻喬表白嘅事。





「俊軒佢話因為要幫韻喬同學prepare啲 notes，放學之後佢會留喺學校整理一次先，所以佢話會遲少少先去探病，然後佢就叫我得閒嘅話就我去先」禮謙將頭先同俊軒嘅共識，一次過話畀天殷知，當然表白嘅部分，禮謙都唔敢講得太多。
 
「哈哈，軒仔真係對喬喬好用心呢！咁ok啦，等我再安排下時間先。不過，我想講呢，我聽日未必可以去醫院探喬喬，我都要等啲嘢fianlise咗先。」

「噢，唔緊要啦天殷同學，如果你真係唔得嘅話，就我自己一個去」禮謙雖然覺得天殷會唔得閒覺得好奇怪，但係禮謙都冇考究得太過多。

不過，天殷就突然之間補充話「但係如果我最後ok嘅話，聽日放咗學之後，我就同你一齊過去啦！」

「不過謙謙呀」「嗯？有咩事呀天殷同學？」禮謙對於天殷突然之間嘅説話表示奇怪。





「冇呀，不過我係想提下你，如果你真係想追喬喬嘅話，你就真係要加多兩錢肉緊，唔好太過被動啦。」
 
「呃……殷殷，點解…….點解你會咁講？」禮謙好愕然天殷居然會主動提起呢件事「不過其實……呃……我都唔係話咩……」

「其實我知道…你一直對喬喬有意思，而且喬喬其實都知道」天殷隔咗一陣先開口講。
 
「我其實由你地今日嘅對話所觀察到，好明顯喬喬對於俊軒嘅互動，相對於喬喬同你，係比較有感覺啲。」

「所以如果你想喬喬最後要揀你嘅話，你真係要加油，至少對話都唔好太短，同埋唔好太過死咕咕」天殷直接道出事實「但係當然都唔好太過長氣啦，女仔唔係太鍾意咁」

「知道啦，我會檢討一下，多謝你話我知呀，天殷同學！小弟感激不盡」

「等你將喬喬追到手先同我感激啦，哈哈！」天殷微笑道。

「好啦，我都要去沖涼啦，聽日返到學校見啦。晚安啦謙謙」




 
「晚安啦，天殷同學，聽日再見！」禮謙經過天殷嘅提醒之後，突然都發現到有天殷所講嘅現象。

所以，喺臨訓之前，禮謙都用少少時間，去諗下到底自己有咩可以改善嘅地方，等韻喬最後都會選擇自己。

（Ch 14 入院 ~ 完）

IG link https://instagram.com/bear_big_big_writer