《愛在。貴族學園》: Ch 14 ~ 入院 Part 7

Ch 14 ~ 入院 Part 7（連載日期：2022/03/30）

俊軒於是就將韻喬入院嘅來龍血脈，一五一十同父母講出

「原來，真係可惜呀，希望小軒你女朋友可以早日康復」林太一邊食飯一邊講「使唔使我地搵人送個果籃去醫院畀張小姐？」

「唔……唔使啦媽媽，小喬佢……對於人地破費喺佢身上，一向都比較抗拒」俊軒趕緊拒絕林太嘅好意，而且都要繼續之前嘅大話，免得林太發現自己嘅破綻「就算係我送禮物都好，佢都會覺得我浪費，然後就會話我」

林太聽完之後，表情有少少微妙，但好快就話「咁好啦，小軒你就代表我同你爸爸問候一下你個女朋友仔啦」





「我會咖啦，有心啦爸爸媽媽」

「小軒，你都記得要幫張小姐，講解返學校教過嘅内容喎」林生道

「呢層我會啦爸爸，你就放心，小喬比我仲更加緊張自己嘅成績」

「最重要你地兩個會互相幫助就好！」「當然啦，我女朋友喎！」

飯後，俊軒就返到自己嘅睡房做功課。喺做完之後，俊軒就喺電話裏面，同禮謙講下關於聽日放咗學之後，去醫院探韻喬嘅事。
 




「啊，今日真係好攰呀！」俊軒攤喺張床上面，同電話裏面嘅禮謙講「不過，至少依家真係有人會睇住小喬佢食藥，唔怕唔識得照顧自己。天殷講得冇錯，小喬佢真係一隻大頭蝦嚟」
 
「為咗要照顧大頭蝦，大家都辛苦啦」禮謙和應道「雖然韻喬同學喺好多方面，都係一個完美嘅典型。但係，我就完全估唔到，韻喬同學嘅日常生活，居然可以搞到亂糟糟咁！」
 
「我都估唔透呀」俊軒非常語重心長咁講「邊有可能會估到，一個讀書咁叻嘅人，居然可以自己冷親都唔知之餘，仲要走去開冷氣同冲凍水涼去散熱先得咖？咁搞法呀，真係唔病都搞到病啦」

「我之前都有諗過咖啦，其實都真係要有個人，可以長期照顧住小喬先得！如果唔係嘅話，今次嘅事一定有機會會再發生，而且機會都唔會細，所以小喬身邊……」
 
「所以你嘅意思係，你係想韻喬同學嘅身邊，可以有一個好嘅歸宿可以依靠？」禮謙大概估到俊軒嘅意思，所以好少有咁將俊軒嘅説話打斷。
 




「嗯…你可以咁講啦，正如我地都話過，小喬咁樣照顧自己嘅後果簡直係災難級。不過我覺得呢，小喬呢一種嘅女仔呢，就真係唔逼得嘅，我諗佢真係要自己先會知道，到底自己鍾意嘅係咩類型嘅人」俊軒道。

禮謙其實都意識到，喺之前“見家長”事件之後，俊軒似乎為咗改善同韻喬之間嘅關係，而落咗唔少嘅功夫。

但係，禮謙亦都知道，如果俊軒再繼續進攻嘅話，韻喬都有可能會被俊軒嘅誠意感動。

面對自己一直都鍾意嘅“女神”，有畀其他人追走嘅風險，而且係畀自己嘅死黨追走，禮謙心裏面都不甘，咁快就有可能落敗喺俊軒手上，於是禮謙就同俊軒提出一個大膽嘅想法...

「既然你都講到咁白啦。嗱不如咁啦，聽日放學上去醫院嘅時候，我同你分別喺醫院，同韻喬同學示愛啦…」

「咁樣我地就可以通過韻喬同學嘅反應，就知道到底韻喬同學佢，係偏好咩類型嘅另一半啦，好冇？」

俊軒於是喺腦裏面，諗返起今日自己同韻喬，以及禮謙同韻喬之間嘅互動，之後就話「你呢個提議都唔錯啊程禮謙。不過我林俊軒都會接受你嘅挑戰，反正我有信心去到最尾，都會係我同小喬可以喺埋一齊，然後照顧呢個大頭蝦一世」

「好呀，咁樣都幾有挑戰性呀，我就即管放長雙眼，睇下韻喬同學最後會點樣揀佢嘅另一半啦！但係我都好有信心我一定會贏到你！」禮謙好快就決定同俊軒一決高下





「喂小軒講返正經嘢先，咁聽日我地幾個，邊個上去醫院探病先？」
 
「嗯……不如聽日你上去先啦，你放學之後有冇嘢要留喺學校搞？」俊軒好快就反問禮謙

「我就應該冇啦，你呢？」「我呢，呢幾日仲要幫小喬整notes呀，呢度都要啲時間，所以我會留喺學校整理好先會上去。而且，我都畀個機會你，等你可以同小喬表白先哈哈。」
 
「哈！估唔到軒少會主動讓賽喎」禮謙笑笑口咁講「咁好啦，呢幾日你就加油啦，爸爸！咁我一陣就同天殷講講，聽日我地嘅探病安排啦！」禮謙雖然平日都好有禮貌，但面對死黨偶爾都會串下佢。
 
「我頂你啦，又學埋張韻喬講呢啲，喺度叫我爸爸！你地幾個呀，都要記得幫手聽書呀！知道未呀？」俊軒略帶不滿道

「知道啦，長氣！」「咁好啦，我都要做埋啲嘢先啦，聽日學校見啦」「ok，聽日見！」

喺同俊軒收線之後，禮謙就隨即打電話搵天殷。唔知天殷喺咪喺度玩緊電話，所以天殷都好快接電話……





（待續 ~）

IG link https://instagram.com/bear_big_big_writer