《愛在。貴族學園》: Ch 12 ~ 好從實招來啦下 Part 9

Ch 12 ~ 好從實招來啦下 Part 9（連載日期：2022/03/05）

但係，喺另外一邊......

「哈哈哈哈，笑死我啦，哈哈哈哈」天殷不停咁喺度笑「你地兩個真係好好笑，喺電話裏面都要鬥嘴，真係好似一對咁」

「咩……咩一對呀？我都冇同個駁嘴喬喺埋一齊！」俊軒既緊張但又好不滿咁講。

不過天殷都一於少理，繼續喺度恥笑俊軒「怕咩呀！鍾意喬喬咪去追囉，而且軒仔你依家都有小喬電話囉，以後你就可以自己打畀小喬傾計啦。我呢個中間人呢，就終於可以退休啦」
 




「學霸果然係學霸，可以諗到用notes黎打蛇隨棍上之餘，仲可以畀你大滿貫添，今次無憾啦林俊軒！」禮謙一臉苦笑道。

畢竟自己依家相對俊軒而言，已經冇咗可以直接聯絡韻喬嘅優勢。
 
「大唔大滿貫呢，其實我依家都冇以前睇得咁重啦，而且我都諗住專心一意」俊軒喺畀人寸到一棟都冇過後，就非常細聲咁講

「不過我都要講明先呀，我只不過喺單純拎notes畀小喬咋，你地兩個唔好諗咗去第二度呀！」
 
「得啦，我信得過你喎，長氣！好啦，過多一陣就輪到謙謙打畀喬喬啦」天殷道。





「小軒呀！如果你決定咗嘅話，你真係要專心一意至好啊！知道未呀？」「我知道啦！」

於是，喺過多幾分鐘之後，就到禮謙打電話畀韻喬。

相比起頭先，韻喬今次好快就接電話，而且都相對精神少少「喂禮謙同學？做咩事呀？」韻喬好疑惑咁問。
 
「喂韻喬同學呀，冇呀，因為我見你今日absent，唔知道你發生咩事，所以咪想打個電話畀你，睇下你咩情況嘛」

禮謙今次有心再問一次韻喬，而且語氣都比較有禮貌「咁你今日咩事冇返學呀？」





「哦，係啊禮謙，因為我起身嘅時候有啲發燒啫，冇咩特別，我諗抖下就應該好快冇事咖啦，你有心啦」韻喬雖然有感謝，不過語調都相對平淡。

禮謙身為其中一個戲子，雖然明知道答案，但係點都要扮下嘢，當咩都唔知「下！你發燒啊？！咁……你探熱幾多度呀？有冇去睇醫生呀？」

「我睇咗啦，醫生話我氣管炎，而且發燒度到好似……40.6度囉」

「40.6度，都好高喎韻喬同學！你呀，好好咁照顧自己身體啊，由其係你父母依家唔喺你身邊咖！知唔知道呀？」

一樣嘅40.6度，韻喬對禮謙嘅反應，就比俊軒平淡得多，至少都冇咁多鬥嘴嘅場面。

「知道啦長氣！都係等我再休息多一陣，有咩就等我返學先再講啦！多謝你先啦禮謙，bye」「Bye」佢地兩個講完之後就收線。

天殷喺心裏面比較過之後就心諗“禮謙嘅對話相對俊軒短唔少，而且由頭先嘅對答睇黎，基本上俊軒同韻喬兩個應該會比較match。莫非，我真……真係會有機會可以同……？“

但好快，天殷都將自己拉返出黎現實「兩位同學，依家點算好呀？韻喬同學依家發緊高燒，然後就自己一個人喺屋企，我真係…真係怕佢會搞唔掂自己，然後會搞到一獲粥咁」禮謙收線之後，整個人就非常擔心。





「咪就係，發燒發到成40.6度喎，燒到咁高會唔會燒壞腦咖？」俊軒接住禮謙講。

「而且點解個醫生見到小喬發咁高燒，都唔安排小喬入醫院檢查，睇下發生咩事都有嘅？」俊軒同時都覺得非常奇怪。

「我怕係醫生可能有叫到韻喬同學做，但係韻喬同學自己自把自為，唔聽醫生嘅吩咐咋」禮謙再次回答俊軒

「天殷同學，其實你身為韻喬同學嘅好姐妹，你都應該知道韻喬同學嘅性格會係點咖啦？」

「係……都係嘅」

（待續 ~）

IG link https://instagram.com/bear_big_big_writer