《愛在。貴族學園》: Ch 12 ~ 好從實招來啦下 Part 10

Ch 12 ~ 好從實招來啦下 Part 10（連載日期：2022/03/08）

「係……都係嘅」經過兩個男仔不停喺度猜測之後，天殷都越來越擔心，怕韻喬真係會唔聽醫生吩咐而亂嚟。

於是天殷喺隔咗20秒之後，就提出一個提議「我見你地兩個都咁擔心，我都覺得都係要去睇下佢啦。不如咁啦，我地依家就上去佢屋企睇下佢，至少都睇下咩環境先啦！你地依家有冇嘢做呀？」

「冇呀，而且就算有嘅話都要推啦，呢個moment人命緊要呀殷殷！」俊軒第一個贊成道「而且我記得聽日我地都冇quiz，功課都唔係話特別多，今日應該陪小喬陪夜少少都冇問題嘅。咁謙謙、殷殷，你地兩個有冇時間呀？」
 
天殷於是首先回答話「我ok呀，都係打個電話返去同蕭管家講聲咪得，基本上一講同喬喬有關，我屋企都好少唔畀嘅」





「我都ok呀，今日都真係冇咩特別。但係，你地兩個都知道佢嘅地址咩？」禮謙回答同時反問俊軒同天殷兩個。

「我地梗係知道啦，蠢人！」天殷同俊軒異口同聲回答

「程禮謙，你唔係唔記得我同殷殷，分別有做過啲咩，同埋係屬於乜嘢身份先得咖？！」俊軒同時再對禮謙多補一槍。

「呀係喎，我都差少少就唔記得，你地兩個之前都上過去添。」

「之但係，就算我地有韻喬同學嘅地址都好，我地貿貿然登門嘅話，佢會歡迎我地幾個咩？」一言驚醒洛克人嘅禮謙提出合理質疑。





「我諗喬喬應該OK嘅，而且有我地幾個上去嘅話，喬喬佢可能會冇咁悶添呀！等我一陣間打個電話，通知小喬佢一聲就ok啦。」天殷道

「by the way，等我都要同uncle 同auntie兩個，講聲小喬依家嘅情況先。」
 
説罷，天殷就喺電話裏面，先用wechat聯絡張太，好簡單咁交代佢地個女發高燒冇返學嘅事情，同時都叫張生張太唔好太擔心，先完成手上嘅工作。如果真係情況好差嘅話，就會直接送韻喬去醫院。

喺得到張太嘅同意，兼且有拜托大家照顧韻喬嘅回覆之後，天殷就再直接打電話畀韻喬。

「喂，小喬！」「殷……殷殷做咩打電話畀我呀？」韻喬都好快聽電話，不過語調都好似氣若浮斯咁。天殷聽到之後，覺得韻喬嘅情況都唔係太過樂觀。
 




「我地幾個頭先已經商量好啦，而且都已經有你爸爸媽媽嘅同意，依家我、林俊軒同程禮謙三個，會上去你屋企睇下你依家咩情況。」

「你依家咩都唔使做，你要做嘅就係等一陣幫我地開門就ok啦。」天殷同兩個男仔一邊行出校門上車，一邊同韻喬道明來意。

「下，唔使啦殷殷，我……我真係…咳…搞得掂自己咖啦，你地幾個就放心啦，我真係冇事，唔好麻煩到大家啦！」韻喬一開始就已經想拒絕大家「而且我屋企……又唔係好大，我又唔舒服緊，我怕如果我傳染到畀大家就唔好啦…咳咳…」
 
「你呀！仲好講！如果你係照顧好自己嘅話，就唔會搞到自己冷親返唔到學啦！」俊軒先蒿緊張咁喺度講。

「依家唔需要你畀唔畀啦，因為你爸爸媽媽已經批準咗我地咁做。我打電話畀你係通知你一聲，我地依家會各自開車過去你度啦！」天殷一番話令韻喬完全駁唔到。
 
「你既然都講到咁，一定要上嚟我屋企嘞，咁我都冇辦法啦，今次只好蓬門今此為君開啦。」韻喬冷靜而且非常無奈咁講

「一陣間你地幾個嚟到我屋企樓下嘅時候，你地直接撳樓下對講機上嚟，到時候我再開門畀你地啦」
 
「好啦，咁一陣見啦小喬，bye」「bye」





「成班人奇奇怪怪咁嘅，都唔知佢地想點！」一個人喺屋企嘅韻喬同自己講。

但係當韻喬諗起，佢地幾個都一齊上自己屋企嘅時候，韻喬都即刻稍為收拾一下自己屋企嘅嘢，至少都唔好咁亂先。

但韻喬嘅咳嗽都開始嚴重，連自己都忍受唔到「弊啦我依家越來越咳，佢地幾個一齊上到黎又冇戴口罩嘅話，都唔知會唔會傳染畀佢地咖？不過佢地都就上到黎啦，我都冇辦法啦……」

（Ch 12 好從實招來啦下 ~ 完）

IG link https://instagram.com/bear_big_big_writer