《愛在。貴族學園》: Ch 12 ~ 好從實招來啦下 Part 8

Ch 12 ~ 好從實招來啦下 Part 8（連載日期：2022/03/02）

「哼！又會突然之間咁精神都有嘅，都唔知道你係咪詐病唔返學？」俊軒都即刻還拖，而天殷同禮謙就喺旁邊大笑。

「你個頭就詐病！！」韻喬不服道。俊軒免得韻喬咁辛苦，於是就擔心問「唔同你玩啦，咁認真啦，做咩今日唔返學呀？你隻腳仲好痛呀？」

「唔係腳痛呀，只不過我好似發燒，所以先至請假啫。放心喎衰人，我死唔去嘅！老虎都打死得幾隻呀我同你講！」韻喬懶係精神咁講，但俊軒心裏面都知道，講得出呢句嘅人，之後多數都係會病。

所以俊軒都想透過同韻喬嘅通話，等天殷同禮謙都有心理準備先「噢，原來你發燒呀！咁你探熱探到幾多度呀？有冇飲多啲水呀降溫呀？」





「er….40.6度囉」韻喬突然之間變得好細聲咁講。

「咩話？！燒到成40.6度咁高？」俊軒嘅反應之大，令天殷同禮謙都好愕然「因住燒壞腦呀你！」

「壞你個頭！」「認真呀！小喬你有冇去睇醫生呀？」喺韻喬駁完嘴之後，俊軒就非常擔心咁問。

「有呀，今朝十一點睇咗啦，乜天殷冇同你講咩？」韻喬非常冷淡咁講

「醫生就話冇咩特別，就係有氣管炎囉，開咗藥同埋幾日假等我休息下咁。你…做咩咁擔心我呀？」





「咁我地係同學，我地會擔心你唔係都好正常咖咩？」俊軒理直氣壯咁回應韻喬嘅提問。

但換來嘅，都係韻喬一個冇心肝嘅回應「我……我先唔要你個flirt女王懶好心擔……擔心我呀！」
 
俊軒雖然好嬲，但係始終韻喬都係病人，俊軒都無謂喺度同韻喬拗，直接跳開話題

「係啦小喬，我地見你今日冇返學，所以我已經幫你整咗今日上堂嘅notes啦，你介唔介意畀你電話我，我一陣可能拎埋過黎畀你，你得唔得呀？」

“嘩下！軒少呢下真係高招喎！居然可以諗到用幫韻喬同學準備notes做幌子，然後就可以順利咁拎到小喬同學嘅電話號碼！“一旁嘅禮謙喺聽到俊軒咁講之後，就喺心裏面咁樣諗。
 




「衰人原來借幫我整notes過橋，然後就可以抄我牌啦哈哈！！」不過韻喬嘅聰明才智，都唔係一般人可以比得上，所以喺拆穿俊軒嘅計謀後就笑出聲

「唉，點解你會咁樣諗我咖？」俊軒非常無奈咁講。

「好啦，我都係講下笑咋！你唔好嬲啦！」韻喬好似一個無辜嘅小女孩咁講「咁你抄低啦喎，我個電話係……6XXXXX4X。小軒同學你會唔會今日過黎咖可？」

「我無所謂呀，最重要係你身體ok先，其實今日啲嘢…….都唔係話好急嘅」

韻喬聽到之後就諗一諗「哦，我諗我應該都ok嘅。咁如果你今日過黎嘅話，等陣你差唔多到鎎時候，你就打個電話畀我啦，我就可以落樓拎。唔該哂你喎，flirt女同讀書一樣咁叻嘅林俊軒」

「唉！都唔知點解咁講野嘅依家啲人，幫你做埋notes都仲要咁樣寸我。」俊軒又喺度唉聲嘆氣一下，但好快就好溫柔咁講

「咁你ok嘅話，你就抖多一陣先啦，等我差唔多到嘅時候，我再打電話畀你啦。但點都好，我都預祝你早日康復先」

「咁好啦，多謝你先，有心啦，一陣見，Bye」「bye bye小喬，一陣見啦」韻喬喺等俊軒講完之後，就直接收線。





不過俊軒聽得出，韻喬喺收線嘅時候，語氣都變得相對溫柔。

但係，喺另外一邊......

（某人個大滿貫終於完成，身為作者嘅我都好高興）

（待續 ~）

IG link https://instagram.com/bear_big_big_writer