《愛在。貴族學園》: Ch 12 ~ 好從實招來啦下 Part 7

Ch 12 ~ 好從實招來啦下 Part 7（連載日期：2022/02/28）

「既然係咁，咁不如我地放學之後，就喺班房裏面等啦」天殷同意道「不過呢，你地兩個就唔好太過擔心啦，一陣專心上咗堂先啦，始終依家啲老師教書教得咁快，我地又可能要教小喬功課」
 
天殷一講到功課嘅問題，禮謙就有少少膽顫心驚，始終自己成績都唔係俊軒、韻喬之流「不如，就等我負責幫小喬整今日嘅notes？」

「我怕天才就算再叻嘅話，absent一日都可能會甩哂啲進度，小喬又咁注重成績，所以呢一層我都一定要幫手」俊軒認為今次出手，會係留好印象畀韻喬嘅一個好機會，於是同天殷自動請纓。
 
「好呀軒少，橫掂你嘅成績同韻喬同學一直都差唔多。我怕小喬讀完我啲notes之後佢會想打獲我」禮謙本來都想幫俊軒手，但自知自己嘅同俊軒、韻喬兩個學霸有好大嘅差距。





所以唯有就將呢個重要嘅任務，交畀好朋友全權處理。

「就咁決定啦，今日真係辛苦哂你啦小軒，一個人要處理兩份notes，加油呀！」天殷搭一搭俊軒膊頭之後，就自己行開咗。
 
至於因為唔舒服而自己一個喺屋企嘅韻喬，喺打完電話返學校請假同喺屋企樓下醫務所掛號之後，就返上床度繼續休息。

直到十一點幾左右，韻喬先自己落去樓下診所睇醫生。

而喺經過醫生嘅診斷之後，醫生就話韻喬有氣管炎，開左啲消炎同退燒藥畀佢，同時都吩咐韻喬要休息幾日同多啲飲水。





喺出面買埋今日嘅午餐之後，韻喬就頭重重咁返上屋企休息。

話咁快到咗放學時間，俊軒今日都好認真咁聽書，同時都喺度密密寫，甚至利用轉堂嘅時間去整理notes。

喺佢整理好畀韻喬嘅notes後，就同天殷講「終於都搞掂啦！殷殷呀，我諗應該都差唔多時間啦，不如依家打電話畀韻喬同學，睇下佢今日情況點先？」
 
天殷諗一諗之後就話「都好喎，嗱小軒，見你今日咁辛苦咁落力同花咁多時間咁去幫小喬整notes，咁本小姐就借我電話畀你打先，等你同喬喬講咗先嘞！呃，一陣間禮謙，你再自己打畀人啦」

聽到天殷咁講，禮謙心裏面雖然有少少唔願意，但俊軒的確有功勞在先，所以都冇駁天殷嘴。
 




不過都喺度強調一下，俊軒其實仲未完成佢嘅大滿貫任務，就連之前要韻喬上去林家，扮自己“女朋友”嘅時候，俊軒都冇問到韻喬要電話號碼。

天殷於是已經喺電話度，撳咗韻喬個號碼出黎「唔該殷殷」嘟嘟……「喂……」好快，電話嘅另一邊先傳來非常微弱嘅聲線，斷估都係俊軒嘅呢通電話，嘈醒咗正喺度休息嘅韻喬。
 
「喂小喬同學？我係俊軒呀。做咩你今日冇返學嘅？你冇乜事呀嘛？」俊軒問道，當然係明知故問啦，畢竟俊軒都知道韻喬係因為唔舒服先會冇返學。

不過，韻喬都好快意識到「喂！點解明明……係殷殷個電話，但係會係你個衰人把聲黎嘅？」

俊軒聽到之後，自然有少少不滿「咩衰人呀？！係我主動提出話要放學打個電話畀你咖，睇下你依家點情況呀，真係好心冇好報呀！」

「林……林俊軒！你個衰人居然咁放肆咁同我講嘢！咩咩咩好心冇好報呀！？」聽到俊軒咁樣寸自己，韻喬突然之間變得精神起黎。

「哼！又會突然之間咁精神都有嘅，都唔知道你係咪詐病唔返學？」俊軒都即刻還拖，而天殷同禮謙就喺旁邊大笑。

（待續 ~）





IG link https://instagram.com/bear_big_big_writer