《愛在。貴族學園》: 特別篇 3 ~ 停一停，諗一諗 Part 7

特別篇 3 ~ 停一停，諗一諗 Part 7（連載日期：2022/02/08）

「有冇搞錯呀個政府？！點解要咁唔公平呀？！」「咪係囉，雖然今次疫情，的確係由動物傳到人度，而且係大範圍嘅人畜共同感染，但係點解要無辜嘅動物要同染病而死嘅動物陪葬呀？」

以上兩句，係韻喬佢地講嘅。因為喺過咗幾日之後，政府就宣佈為咗防止疫情持續擴散，同埋都要考慮醫療同檢疫設施嘅考慮。

所以決定除咗將部分嘅動物，保留作為科研用途之外。其他動物，包括有主人養嘅寵物同埋野生動物，都要交到政府做人道處理。

此話一出，社會上大感譁然，而且民意都偏向兩極化。支持政府嘅人認為，當局都應該要保留資源，集中幫助受感染嘅人類，避免人類因為冇足夠嘅醫療資源而死亡（雖然喺人體身上，死亡率依然高達92%，基本上感染神秘病毒嘅人，都係必死無疑），而且動物始終都係導致疫情爆發嘅源頭，要人道處理佢地都係合情合理。





但係，反對嘅聲音就認為，當局唔應該一刀切，要所有嘅動物陪葬，始終喺現行嘅法理上面，政府冇權力去要求寵物嘅主人，必須為咗某一啲原因，而交出自己嘅寶貝。

當然，支持政府嘅一方，都批評呢啲寵物嘅主人，毫無大局意識，只係顧住自己嘅寵物，但係都有可能會加劇疫情嘅發展。

而主人們嘅觀點，都會覺得佢地唔尊重生命，同時都強調自己有能力去避免自己嘅寵物感染病毒。

至於呢一單消息，當然都傳到動物界。雖然喺人類眼中，動物未必聽得明人類嘅説話，或者唔知道要點樣回應。

但其實大家都知道，動物係有靈性嘅，好多時佢地都知道人類嘅意思，甚至有時候更加了解身邊人嘅意思。





所以喺當局決定要撲殺動物嘅消息傳出之後，動物界就顯得更加不安，騷動都越來越強烈。

故此韻喬佢地雖然已經變返做人類都好，但係佢地喺外面嘅時候，都聽到動物之間嘅對話，都表達對於可能被格殺勿論嘅不滿同感概。

正因為咁樣，當外面嘅野生動物，一見到人類嘅時候，由其係身穿全套保護衣物嘅人嘅時候，基本上都即刻嘗試收埋自己，希望自己可以免於一難。

所以韻喬佢地都覺得，到底當局喺進行呢個“最終解決方案”嘅時候，到底係咪真係可以停一停，諗一諗呢？

喺返番到研究所裏面，Sharky都對政府嘅政策而辯護「同學，我相信你地都非常清楚，到底依家係邊樣引發咁大規模嘅爆發先？」





「就梗係落毒嘅人啦！如果唔係佢落毒嘅話，點解咁多動物會無辜受感染，然後再傳去寵物同人身上呢？」俊軒喺度講，而大家都非常同意。

但係，身為政府專家之一嘅Sharky就為政府嘅政策辯護「但係外國嘅相關經驗，都係要解決病毒喺動物之間傳播，然後再避免感染到人類，我地都要盡快切斷傳播，盡量可以減少感染數字嘛」

「但係我地都話過，動物嘅生命都係生命嘛！咁點解一定要動物全部死呢？」韻喬再一次質問Sharky「如果反正都係救唔返嘅機會咁大，點解唔見你地夠膽話，只要人一確診，我地就唔會救佢，由得個人死，然後啲密切接觸嘅人就要人道處理？」

「喬喬你？」大家都對韻喬嘅論點顯得十分驚訝，因為喺大家嘅眼中，韻喬一向畀人嘅印象，都係成績好之餘，明辨是非對錯嘅三觀，一向都非常正常，往往喺學校都係幫理不幫親。

而Sharky佢地一班研究所嘅專家，對於眼前呢位15歲嘅小妹妹，居然可以講出咁極端嘅説話，都唔知要點回答。

由其係Sharky一直不發一言，而其他工作人員都唔知要點打圓場，只係要睇Sharky嘅反應。

但係Sharky只係冷冷咁講咗一句「我會再考慮下，到底要唔要同其他專家組嘅成員講，關於你嘅立場同提議。」

「但係同學你地都要清楚明白，只要我地喺其中一步落錯決定嘅話，所帶出嘅蝴蝶效應都會好大，隨時都會深遠咁影響全港市民嘅生命安危同幸福」





「所以我都希望喺我再去開會之前，可以有更多嘅時間，考慮一切可以切斷傳播同埋結束疫情嘅做法」曉澄於是就話

「係啦各位同學，你地嘅睇法首席研究主任都已經非常清楚同明白，希望你地都可以留啲空間，畀我地嘅專家去討論。今日都已經夜啦，不如大家都早少少休息，聽日再繼續討論啦」

喺聽完曉澄嘅説話之後，Sharky只係點頭微笑，然後再同一大班嘅工作人員，返到去研究室繼續工作同商討對策。

但係喺聽完韻喬嘅説話過後，Sharky嘅心裏面一直都被呢位小妹妹嘅説話所纏繞，甚至同佢嘅團隊開會嘅時候，都曾經好幾次接唔上隊員嘅説話。

喺另一邊廂，韻喬佢地喺休息室裏面，都不停喺度做資料搜集，睇下全世界喺發生類似情況之後，到底要點樣反應。

不過所有嘅資料，正如Sharky之前都提及過，無論係非洲國家，定係喺歐洲、東南亞，只要一爆發，殺死動物都係第一層嘅解決方式，難怪企鵝會話全世界好多動物團滅。

始終喺外國地方比較大，野生動物同寵物之間嘅交流都比較少，所以疫情都集中喺動物身上，偶爾先會有人類嘅感染同傳播。





不過今次喺香港嘅獨特環境裏面，引發大範圍嘅寵物同人類感染，所以到底要點做，香港政府都束手無策。

「小喬呀，既然Sharky佢地都未有定論，你就唔好咁快咁嬲住先啦」天殷喺大家面前安撫韻喬嘅情緒，皆因韻喬依然好不滿Sharky為首嘅科學家，選擇用呢種咁唔公平嘅方式對待動物。

「係呀小喬，我地依家都仲係學生，都冇咩能力可以改變到Sharky佢地呢班大人，甚至政府權力核心嘅諗法嘛，應該話我地嘅無力感其實都非常之大，雖然我地都知道小喬你之前遇過咩事」恩希都加入勸韻喬嘅行列。

不過，韻喬依然都仲係非常不滿「咁係呀嘛！都唔明點解人類永遠都係咁自私，次次有事都係要動物埋單！係咪真係唔識講人話唔識反抗嘅，就要蝦佢地？然後每次都要大自然向人類反撲，人類先至識得覺醒，係咪？！」

「但係喬喬呀，你都要明白，人類喺大自然面前，其實都係好渺小咖咋。如果大家都有能力，可以研發到方式，可以避免動物通過撕咬，同埋短時間去傳播嘅話，我地都相信已經做咗」道明同韻喬講。

「所以喺呢一日黎到之前，或者人類都要都要繼續咁樣落去咖，或者Sharky佢地，都未必真係想行到呢一步呢！」韻喬聽完大家咁講，突然之間粒聲唔出，就自己跑出休息室

「喬喬！」不過韻喬完全冇回過頭，自己一個走出去喊。

就喺韻喬衝出去嘅時候，去完洗手間嘅俊軒，就見到韻喬喺出面低頭飲泣。但係自己同韻喬嘅關係，就好似形同陌路人咁，所以俊軒就輕輕敲天殷佢地房門，然後問下到底發生咩事。





天殷佢地於是就將頭先嘅事，全部同俊軒講返哂。俊軒聽哂之後就話「或者對於韻喬同學黎講，困難從來都唔係藉口，因為喺韻喬同學眼中，自己都係一路由困難之中走黎。」

「所以佢一直都對自己要求高之餘，對其他人要求都好高。呢一點，由中一到依家，佢都一直冇變過」

俊軒講下講下，就講返中一同韻喬一齊坐嗰陣嘅事。天殷同其他女同學，聽完之後都好認同俊軒嘅講法，但係面上依然都好擔心韻喬嘅情況。

不過，俊軒居然同佢地派定心丸話「放心啦，韻喬同學佢……一晚應該冇事咖啦。殷殷你都應該知道韻喬同學性格咖啦？」

天殷點點頭表示認同俊軒嘅講法，但係俊軒就話「咁殷殷，你就幫我……地班，今晚好好咁睇住韻喬同學啦」

「知道啦軒仔！」俊軒只係一下微笑之後，就離開天殷佢地嘅房間，返去自己嘅休息室度休息。

（待續 ~）





IG link https://instagram.com/bear_big_big_writer