《愛在。貴族學園》: 特別篇 3 ~ 停一停，諗一諗 Part 8

特別篇 3 ~ 停一停，諗一諗 Part 8（連載日期：2022/02/11）

轉眼已經去到喺研究所嘅第六日，當日Sharky喺早上同佢自己嘅科研人員開會，了解最新嘅情況之後，然後就喺一衆人員面前，講解自己聽完韻喬解釋之後嘅決定。

大家聽完之後就表示不可置信「Sharky sir，你真係要咁做？」「你唔會係因為聽完個妹妹仔咁講，你就去馬下話？！」

「Sharky，你到底知唔知咁做嘅話，引起嘅輿論你承唔承受到呀？你要知道班細路係喺平行時空過黎咖！」

「佢地喺我地個世界裏面出事，只要佢地返到去原來嘅世界，就唔需要負上責任呀！」另一位研究員同Sharky講。





Sharky再一次繼續不發一言，再過一陣先至講「其實呢個妹妹講得冇錯，人類其實能力真係好有限，所以我地先會要用呢種咁唔人道嘅手段，犧牲其他動物生存嘅權力，去掩飾人類嘅無能」

「我地都唔可以繼續咁自以為是，憑住因為人類有同其他人溝通嘅能力，而去剝削其他物種，甚至認為其他物種要臣服喺人類之下，咁樣做實在太自私」

「所以我先會準備喺今日嘅會議度，提出小妹妹嘅諗法」Sharky續道，其他人都再次陷入沉默。

最後，曉澄都係出聲打圓場「Sharky，就照你嘅意思去講啦，事到如今我地都已經冇其他辦法，就試一次，得就得，唔得就算，但至少我地都有努力過！搏盡無悔呀Sharky」

Sharky於是環視自己班一直幫自己打拼嘅戰友，佢地都不約而同咁點頭，表示支持對自己同曉澄嘅諗法。





Sharky唯有面露微笑感謝大家「我知道點做咖啦，多謝大家最後都係信任我，希望大家之後都可以繼續努力工作」

「知道！」「好啦，跟我去政府總部開會嘅，麻煩準備好你地嘅資料，十五分鐘之後出發去政總」

「知道Sharky！」於是研究所裏面都再一次忙碌起黎，喺準備好哂文件之後，Sharky佢地就出發。

至於韻喬佢地，除咗都係跟進下最新消息之外，都冇咩佢地可以幫到手。

而韻喬自己就經過一晚之後，情緒都已經冷靜落黎，而且都同班女同學有講有笑咁，一齊去睇下班動物。





順便都講下一齊逃離現場嘅動物嘅情況，佢地暫時都仲喺度接受觀察之中，不過都冇中招嘅情況，依然非常安全，只係等待一個安全嘅時機，將佢地放返出去野外生活。

只不過佢地一直等到下晝，研究所裏面都冇任何關於最新嘅消息返黎，搞到大家都非常緊張。

就連韻喬自己都喺度諗，到底Sharky係咪因為自己一時嘅意氣用事，搞到對方真係將呢個幼稚嘅諗法，放到政府層面上討論。

不過，喺差唔多五點幾嘅時候，電視嘅新聞突然傳出新聞，話特首同專家委員會，準備喺六點半嘅時候見傳媒，所以大家都開始緊張起黎，到底政府要點樣去處理今次突如其來嘅疫情。

去到差唔多夠鐘，韻喬佢地同埋研究所一大班工作人員，都齊集喺大控制室裏面，等候特首嘅記者會。喺開始嘅時候，特首都係喺度講好多廢話，都冇直接講到重點嘅政策。

終於過多幾分鐘，特首終於講出呢句咁具爭議嘅説話「經過多次慎重考慮，為咗避免今次疫情喺醫院裏面造成院内感染，以及醫療資源嘅有效運用......」

「我地宣佈由即日起，除非病人有足夠能力打敗病毒，否則醫院係唔會搶救得到呢個神秘病毒，而又病情惡化、需要進入ICU嘅確診患者，而會好似對待動物咁，即是以人道方式處理病患」

「雖然相關做法喺香港冇任何法定基礎，喺冇病人家屬同意之下，賦予政府去強行執行相關做法，所以我地都會以先訂立後審議嘅原則，盡快安排相關法案交上立法會進行討論」





「但係請各位市民放心，假若疫情受控，或者有藥物可以治療到呢個病嘅話，我地都會啓動日落條款，停止相關做法。」

「另外，針對呢個情況，政府將會向病患家屬提供經濟上嘅補償，至於補償嘅内容，我地相關司局長稍後都會有公佈」

喺特首公佈呢個做法之後，人類社會即刻陷入恐慌狀態，畢竟大家都預料唔到，政府會用呢種方法去處理疫情。

一衆同學都表示「有冇搞錯呀個政府？」「唔去改變對動物嘅處理方法之餘，仲要將對動物嘅方法放埋喺人身上？！」

此時嘅韻喬居然不發一言，只係好安靜咁坐喺電視機面前「小喬！小喬！」

「係係係！」「你做咩唔出聲嘅喬喬？」天殷好擔心咁問韻喬，不過韻喬就好簡單咁講咗一句話「我覺得我地應該要等Sharky返黎之後，先可以討論到底咁做係咪好！」

相對於尋日嘅激動，今晚嘅韻喬異常冷靜，應該話就好似平時嘅韻喬咁。雖然眼前呢個韻喬，先係大家熟悉鎎韻喬。





不過一向對大是大非都有見解嘅韻喬，喺特首宣佈完一個咁大嘅措施都話要等Sharky返黎先表達自己睇法，而感到非常奇怪。

於是喺差唔多準備食晚餐嘅時候，Sharky以及陪同去同政府開會嘅一班研究員，都終於返到研究所。喺齊集飯堂之後，Sharky都先同大家食飯。而韻喬其實都知道，Sharky喺返到黎之後，一定會想同自己交換意見，不過既然對方先係呢度嘅主人，所以都非常有禮貌咁，等Sharky開聲叫自己之後，先再決定。

果然，喺飯後之後冇耐，Sharky同佢一班同事，就去到韻喬嘅房間，解釋政府最新嘅政策。

韻喬第一時間就走到Sharky面前，而雪盈同天殷都跟住韻喬後面，然後就等韻喬問「我嘅冇腦建議，點解你地真係會放上枱面傾？點解你冇盡力去救動物，而係真係連人都要殺埋？」

「同學，你冷靜少少聽我講先」經過幾日嘅相處之後，連Sharky都知道韻喬大概嘅性格係點，所以都先下手為強，等韻喬可以冷靜啲先講。

然後Sharky就話「其實我都已經盡力去説服特首、高官同其他專家」

「但係佢地都覺得，動物界之間嘅傳播，以及仲要傳到人身上造成廣泛傳播，已經超乎政府原先嘅預期，再加上我地都有參考其他地方處理呢個疫情嘅經驗，基本上我地就算唔大規模撲殺都好，你點樣確保其他動物之後唔會收到感染？」

「而且重點係，就算依家你地可以救到依家喺研究所裏面嘅動物都好，你能夠確保喺將佢地放返出去之後，唔會再受感染，同埋唔會再有人投毒咩？」





「既然有咁多不確定性嘅話，我地係咪都要以動物嘅利益為依歸咩？」

「但係強行剝削動物生存嘅權利，就已經係以動物嘅利益行先咩？」韻喬終於都忍唔住，好冇禮貌咁打斷Sharky嘅説話。

Sharky繼續保持微笑，好耐心咁同韻喬解釋背後嘅原因……

「就好似賽馬比賽咁，加入其中一隻馬喺比賽途中突然斷腳，倒地不起，又或者非常痛苦咁掙扎嘅時候，你會想呢匹賽馬，要好痛苦咁忍受好幾個月唔能夠奔跑嘅心理壓力，定還是可以好舒服咁離開呢個世界？」

「要知道出面嘅馬主，佢地都用不菲嘅價錢，去投資落去一匹馬身上，目的就係希望自己嘅投資可以得到回報。當獸醫認為一匹馬要執行人道毀滅嘅時候，馬主嘅投資何嘗唔係化為烏有？」

「所以，哥哥想妹妹你明白，呢個世界好多嘢，都係相對而唔係絕對，有時候可能你覺得方法A嘅處理方式係最好。」

「但係可能喺其他角度，方法B嘅處理方式，先可能會對各方面先係最好。但最重要嘅係，都要理解背後嘅因由」





韻喬聽完Sharky嘅說教之後，都冇再反駁，而Sharky都繼續講「不過同學，其實你嘅反應，正好提醒我地一定會面對呢啲輿論嘅譴責。畢竟今次涉及到人類生命嘅道德爭議，我相信我地同政府都要面對一場硬仗」

「不過，我都請你地可以放心，我地一定會繼續努力，盡力去完成我地應該要做嘅事，而且我地都一定唔會，等出面或者喺醫院裏面，因為研究同感染而失去生命嘅人同動物白白犧牲」

Sharky講完之後，大家都係同韻喬一樣去望住Sharky，咩都冇再講。

而且Sharky佢地都離開咗韻喬佢地嘅房間，繼續長時間去做研究，務求可以喺最短嘅時間之内，可以有研發嘅成果。

結果之後第二日，大量市民上街，抗議政府嘅做法，當然喺研究所外面，都有人請願，要求政府停一停，諗一諗，到底係咪一定要咁做。

當然，呢班人都好快畀警方以防疫理由驅散，而韻喬佢地都留喺研究所裏面。

至於神秘人嘅問題，警方都表示會同内地公安部以及衛生部跟進，但有更多嘅聲音都認為應該同外國其他警察單位，甚至國際刑警、世界衛生組織去聯合調查。之但係……

「咦！」「早晨呀喬喬」講嘢嘅係天殷「你起身啦？」韻喬見到係天殷之後，就即刻好緊張咁問下對方

「呢度…我地係咪返咗黎啦殷殷？其他人呢？」「返咗黎？咪住先，乜你尋晚都有發夢咩？」天殷非常驚訝咁講。

「有呀，你都有呀？！咁係關於咩咖？」韻喬繼續好緊張咁追問天殷。於是天殷都將尋晚嘅夢境講出黎，但係韻喬聽聽下覺得「點解我地個夢都一樣嘅？唔通真係有啲咁奇怪嘅事？雖然我都覺得好有趣」

「我唔知呀，可能就係我地兩個啫，我覺得可以問下其他人先喎！」天殷回答韻喬道。於是喺大家訓醒之後，佢地大家都互相講返夢境嘅事。

當然場景都係一樣，所以到最後，佢地決定先進行水game，然後到下晝，佢地再圍埋一齊去討論呢個夢境。

不過，佢地都覺得，發得呢個夢，大家都要思考到底人類對大自然同動物，係咪真係最好？有時候人類嘅行為，係咪其實都係剝削其他動物生存嘅利益？

到底一切嘅動物實驗，係咪真係對動物係人道？呢啲都鼓勵咗一班同學，喺呢個camp裏面，去思考同可以有額外嘅得着。

至於最後神秘人搵唔搵到？最後都係搵唔到啦。

但係，一衆同學都覺得，人類對所有同動物、大自然嘅嘢，係咪都應該停一停，諗一諗先繼續去做。希望天下間唔好再有呢啲剝削動物權益嘅事情發生……

（特別篇 3 停一停，諗一諗 ~ 完）

IG link https://instagram.com/bear_big_big_writer