《愛在。貴族學園》: 特別篇 3 ~ 停一停，諗一諗 Part 6

特別篇 3 ~ 停一停，諗一諗 Part 6（連載日期：2022/02/06）

大家知道咁多巧合之後，就梗係大吃一驚啦，始終大家都未試過，可以全班幾十個人，發埋同一個夢，再跌落去另一個世界裏面。但係，韻喬都知道事情唔係咁簡單同巧合，而係想知道更多嘅細節。

「我想問下，到底呢個係咩病毒，會引發你地同埋啲動物咁大嘅反應嘅？」

「其實同你地所形容嘅差唔多，就係有一個非常神秘嘅組織，裏面應該有一個國家級嘅機密實驗室，研發同收藏唔少致命病毒。」

「或者係有人因為為咗自己嘅一己之私，所以喺實驗室裏面偷帶病毒，出去世界各地將呢種致命病毒，混入食物裏面」





「目的就係要睇下，自然界動物對於呢種致命病毒嘅反應，同埋可以傳染到幾多代、幾多種類嘅動物。」

「但係既然你地都已經搵到線索，而且都知道到底發生咩事，咁點解你地都仲未捉到放毒嘅人呢？」韻喬聽完覺得都係未滿足自己嘅要求，所以就繼續追問。

Sharky跟住就嘆一口氣話「如果係你想象中咁簡單，就唔會搞到我地依家咁」

大家都唔明白Sharky佢地嘅意思，所以Sharky就繼續講落去「就係因為每次佢地所加嘅分量，都只係夠一隻動物食，而且每一次嘅食物都唔一定相同，可以係你地頭先所講嘅西瓜，但係都可以係一塊芝士」

「而且呢個神秘組織嘅人，都好似識得變身甚至隱身術咁，就算案發現場可能會有閉路電視都好，我地都冇辦法得知疑犯犯案之後點樣甩身」Sharky續道「呢個先係我地，應該話世界各地執法同野生動物保護單位頭痛嘅地方」





「原來係咁，所以其實之前喺其他地方都已經有相關嘅個案？」天殷好好奇咁問。

而Sharky都即刻點頭同意「係，不過暫時都未有大規模傳人個案，但係大家都要小心啲」

其他同學於是就繼續休息。但係好快，就傳出壞消息「Sharky，報告！大事不妙」

「咩事呀，曉澄？」一個急速嘅女聲，突然之間喺大屏幕裏面傳出「頭先喺馬鞍山附近，一隻梅花鹿喺公園衝撞，懷疑咬到人嘅寵物，將病毒傳到一隻寵物狗身上。然後隻狗咬到自己主人同其他狗隻，依家馬鞍山公園開始失控！」

「收到！我地即刻派人過去！」Sharky即刻非常緊張「大家準備定籠同埋槍，同埋再開多個隔離室，同時通知HA、消防處同警方」





「Yes Sir！」於是大隊就即刻準備定全套裝備，準備出發。

但當然，呢班學生就當然唔可以一齊去，所以Sharky喺臨行之前，就同韻喬佢地講「唔好意思，你地唔可以去，因為實在太危險，而且你地今日配合我地調查，其實都已經好攰，一陣間我地囘派人接你地去休息室度休息，曉澄，麻煩好好安排」

「收到Sharky Sir！一陣間All the best！」曉澄回答之後，Sharky同佢嘅大隊就出發去馬鞍山部署，而韻喬佢地就已經喺休息室裏面梳洗同補眠。

喺去到夜晚食過飯之後，研究所嘅工作人員，就帶住其中幾個入去動物隔離室。

喺裏面，大家都見到好多唔同種類嘅動物，佢地嘅樣子變得異常不安，畢竟野外動物一下子見到有咁多人類喺度，精神難免都會緊張起黎。

不過，喺動物開始叫嘅時候，韻喬佢地居然聽得到班動物想表達嘅意思。

所以，之前變成一隻野豬嘅韻喬，於是就走埋去其中一隻同佢地逃命嘅野豬度，問下野豬到底做咩咁不安。

原來隻野豬話自己個族群有成員，頭先冇跟到韻喬佢地一齊走，擔心會被感染病毒，所以想盡快返到去野外，搵返自己嘅家族成員。





韻喬聽到之後面上顯得非常難過，於是就問研究所嘅人員「我想問下，佢地仲有冇機會可以返到去野外？」

「正常就可以嘅，畢竟我地研究所嘅空間非常有限，但係如果真係收到感染嘅話，好大機會都要人道處理佢地」

「下，咁殘忍？」大家嘅反應都係一樣，但係工作人員就好無奈咁話「因為按照外國之前嘅案例，呢個病毒暫時冇任何藥物可以對付到，而且最重要嘅係，佢每入到一個新嘅宿主嘅時候，病毒都會產生新嘅突變」

「所以好似之前嘅其他病毒，可以通過疫苗同藥物研發嘅應用，去抑制病毒生長同傳播。」

「不過對於呢個病毒嘅特性，每進入一個宿主就即刻會有突變，所以就算有疫苗研發都好，根本都只係對某一個受感染嘅個體有效」

「而且個重點係，研發嘅速度都追唔上感染嘅速度，而且我地都嘗試將基因排序，但結果發現病毒嘅結構複雜，根本就冇一個pattern喺度，所以唯一可以做嘅，就係撲殺受感染嘅動物」

「當然，我地都會嘗試喺已經死咗嘅動物身上做研究，希望可以得到一個方案，去應對久唔久就發生嘅爆發」工作人員最後都分享好多有用嘅訊息畀佢地，雖然唔係個個都聽得明，但至少都知道今次嘅問題都非常之大。





不過，喺佢地經過一晚嘅休息之後，佢地喺食早餐嘅時候，就發現Sharky佢地冇辦法阻止病毒傳播，因為經過幾代嘅傳播，受感染嘅動物已經可以將病毒長時間傳播之餘，仲可以透過包括空氣在内嘅法式傳開，搞到一下子有好多寵物，已經被佢地咬傷嘅傷口，或者噴出嘅體液而受到感染。而喺動物隔離室裏面，都住滿咗好多大大小小嘅動物喺度。

佢地面上流露嘅，就只有不安、擔心同恐懼，因為佢地都已經知道，呢個病毒喺短時間之内，將佢地族群嘅成員，大規模咁感染同殲滅。動物雖然唔可以好似人咁，通過説話去表達自己。

但係重點嘅係，動物都係有靈性，所以佢地都會知道要點樣對待自己嘅族群成員，然後都會將自己嘅情緒，刻畫喺自己嘅表情或者其他小動作之上，等人類可以解讀而知道佢地嘅需要。

不過，到底人類係咪真係可以咁成功咁，去了解動物嘅思想，就真係可圈可點啦。

後來，因為病毒喺動物之間嘅傳播實在太快，好多寵物都受到其他動物嘅感染，甚至有部分嘅動物，因為同寵物喺短時間内有親密接觸而受到感染。

而同時因為有主人，根本就唔知道自己嘅寵物受感染，而繼續同自己嘅寵物有親密接觸，所以都受到感染。

正正就係因為咁，所以病毒最終都發展成為人傳人。但係因應病毒嘅特性，人類嘅反應都非常之大，重症患者都越來越多之餘，甚至已經向其他地方傳播。

但同一時間，因為有確診嘅寵物主人甚至有寵物本身，喺潛伏期間曾經到過寵物店，幫自己嘅寵物買食物，又或者帶寵物去美容所以出事。





一下子，病毒就喺香港迅速爆發，大量動物喺街上因為染病，而發癲瘋狂咬其他動物同人類，動物世界固然係躁動不安。

但係喺人類嘅世界，都已經因為呢種奇怪疫症而擔驚受怕，好多市民都出去搶購物資，包括口罩、厠紙、糧食等等。

當然，政府當局都成立一個以科學家同醫生嘅顧問隊伍，去協助當局去評估同處理今次突如其來嘅疫症之餘，同時都要盡快安撫民心，至少等市民唔好因為恐慌而出去盲搶物資，而增加社區持續爆發嘅風險。

不過，每日確診嘅人同動物都不斷增加，死亡率高之餘，而且受感染嘅範圍都越來越大。而政府都好心急，想盡快撲熄今次嘅，避免疫情拖延影響經濟，於是喺研究所裏面……

（待續 ~）

IG link https://instagram.com/bear_big_big_writer