《愛在。貴族學園》: Ch 11 ~ 首次獨處 Part 6

Ch 11 ~ 首次獨處 Part 6（連載日期：2022/01/19）

俊軒講完頭先嘅一句，就開始急步咁，抱住韻喬去醫療室。

不過由於學校醫療室同Studio都有一段距離，而且沿路都要上落樓層，所以俊軒都抱到搖下搖下咁，唯有就安撫一下不安嘅韻喬。

「小喬，你如果怕跌嘅話，就攬住我啦」「下，但係……」韻喬非常顧忌咁答，但俊軒就即刻反駁「唔……唔緊要啦，最重要係唔好令你再受傷呀，知道未？」

「嗯嗯！我知道啦，今次真係麻煩你啦」韻喬聽到之後，塊面就更加紅，因為……怕醜吖嘛。





最後，韻喬都將原本捉住俊軒校服嘅手，改為攬住俊軒條頸，就好似女朋友攬住男朋友咁。

雖然依家都唔係咩浪漫時刻，但此刻嘅佢地，心跳其實都加速咗好多，大家都互相感覺到内心嘅悸動，韻喬嘅眼神就更加變得迷離。
 
不過好快，佢地都要返到現實，俊軒就抱住韻喬去到醫療室，俊軒先將韻喬平放喺床上面，再去醫療室嘅登記簿度，然後再去藥箱裏面搵藥油。

但就喺搵緊藥油嘅時候，俊軒非常唔識死咁問「小喬呀，其實介唔介意話我知你幾重呀？」

依然好痛苦嘅韻喬，突然之間就精神起黎「死人頭林俊軒！！你依家咁講到底係咩意思呀？！」





「嘩，突然之間精神咁多嘅？喔，原來你係一隻肥豬黎嘅，唔怪得頭先咁鬼重啦！」俊軒嘻嘻哈哈咁回答韻喬。
 
不過韻喬聽到之後，就嬲到即刻鼓起泡腮道「哼！你個死人頭！我係肥豬吖嘛，擺到明係重咖啦，係咪唔得呀依家？！而且都冇人叫你抱…….抱我落黎咖衰人！！」

之後腳受傷嘅韻喬就好大力咁，一掌拍落去俊軒嘅背脊度。
 
「頂你啦！見到你受傷抱埋你過黎仲要打人！真係好人冇好報呀！」俊軒抗議道。

但韻喬一邊奸笑一邊講「鬼……鬼叫你頭先話人係肥豬呀！抵你畀人打啦，都唔知呀點解啲女會鍾意同你一齊咖！！」
 




俊軒並冇回答韻喬嘅疑問，喺搵到藥油之後，就好溫柔咁問「小喬同學，你邊度覺得痛呀你？你指一指畀我睇下」

「嗰度呀！」韻喬好快指住腳眼嘅位置「ok，咁我依家同你除鞋除襪先啦！」
 
「好……唔……唔該小軒」於是俊軒就第一次同韻喬獨處嘅時候，就有肌膚之親，當然韻喬都係非常緊張同怕醜啦。

喺俊軒見到韻喬受傷嘅位置時，就非常驚訝咁話「嘩陰功！完全係腫起咗喎，今次真係唔搽油都唔得啦」

「不過小喬，一陣間同你搽油嘅時候，可能會有少少痛咖，你介唔介意一陣間要忍一忍痛？如果你ok嘅話，咁我就開始同你搽咖啦！」

韻喬於是面紅紅咁點點頭，但係面上就因為痛嘅關係毫無笑容。

之後俊軒就好細心咁，幫韻喬用藥油搽傷口，同時都用少少力去幫韻喬按摩。不過

「啊！好痛呀！」韻喬就痛到就快喊出黎，於是就好大聲咁叫，而且眼角都開始有眼淚流出，於是又話





「大佬呀，你細力少少得唔得呀？啊…！！！！！」韻喬仲痛到要捉住病床上嘅床單，額頭仲出埋冷汗。
 
「小喬呀，你就忍下先啦，而且唔大力啲搽嘅話，又點會快好呢？喂小喬麻煩你再放鬆少少隻腳啦，唔該你」俊軒一路講，一路就繼續幫韻喬搽藥油。

喺呢個時候，韻喬個心再一次悸動得好快，不過韻喬都因為腳痛而面無表情，而受傷隻腳嘅肌肉都仲係比較緊。

喺搽咗十幾分鐘嘅藥油之後，俊軒再一次好溫柔咁問韻喬「點呀小喬？隻腳仲痛唔痛呀？同你搽咗咁耐，都應該差唔多啦啵」

（待續 ~）

IG link https://instagram.com/bear_big_big_writer