《愛在。貴族學園》: Ch 11 ~ 首次獨處 Part 5

Ch 11 ~ 首次獨處 Part 5（連載日期：2022/01/17）

之所以話韻喬嘅傷勢，比起自己想象中大，皆因韻喬痛到連想扶住禮謙起身都起唔到，成個人坐返喺個地板度，然後繼續用手撳住自己腳眼好痛嘅地方。

禮謙於是就好緊張咁問韻喬「小喬同學，你係咪覺得好唔舒服呀？如果唔得嘅話就真係唔好亂郁啦！」

「Sorry呀禮謙同學，我諗我都係唔得啦，我連企起身都起唔到，啊……嘶……好痛」韻喬再一次面容扭曲兼略帶歉意咁同禮謙講「真係唔好意思呀」

喺講嘅時候，韻喬仲開始眼含淚光。「小喬同學又唔好咁講，係我頭先落地嘅時候唔小心，踩到你隻腳你先會咁痛同整親，係我對你唔住就真」





禮謙喺道歉之餘，都關心韻喬嘅傷勢「使唔使同你去醫療室呀？見你好唔舒服咁！」
 
不過，韻喬都未開始答禮謙，喺冇幾遠嘅俊軒，見到韻喬痛苦嘅表情之後，於是就主動同天殷講「唔好意思呀殷殷，我諗我地要停一停先」

「嗯？做咩呀小軒？」天殷聽到俊軒咁講就有少少奇怪。

於是俊軒就指向韻喬嘅方向，而天殷見到之後就知道發生咩事

「我…要帶小喬去一去醫療室，你同謙謙繼續練舞先，ok嗎？」





「冇問題呀，咁你好好咁同我地照顧喬喬啦，我同謙謙跳得咖啦」天殷欣然答應。

因為天殷知道，依家係俊軒做啲嘢，去補償韻喬嘅時候，所以天殷都願意放俊軒去照顧自己好姐妹。

但係當天殷知道一陣要同禮謙一齊跳舞嘅時候，塊面就唔知點解開始好紅。
 
俊軒同天殷於是就走到去禮謙同韻喬面前，然後俊軒就同禮謙講「謙謙，一陣你就同天殷跳住先啦，等我帶小喬去醫療室度搽一搽藥油」

禮謙點頭同意之後，就準備同天殷繼續跳。





「咁小軒，我就將小喬同學交畀你啦，記得幫我地睇實小喬呀！」禮謙不忘提醒俊軒「咁我地繼續跳啦，殷殷！」

「嗯….記得看實喬喬呀，咪睇佢讀書咁叻呀，佢其實係正宗一個大頭蝦黎」天殷一面擔心嘅同時，都不忘要取笑一下韻喬。
 
畀人笑嘅韻喬繼續坐喺地上面，完全無力反駁，繼續號痛苦咁撳住扭親嘅地方。

不過，禮謙知道天殷喺度諗緊咩，所以都出言安撫對方「軒軒佢一定會好好睇住小喬咖啦，你就唔好太擔心啦殷殷」天殷繼續紅住面咁點頭。

俊軒於是就烏低個身，問仍然坐喺地下嘅韻喬，柔聲道「小喬，你係咪真係痛到完全行唔到呀？」

韻喬於是就好無助咁點點頭。俊軒覺得韻喬嘅情況已經唔可以再拖延，於是二話不說咁將韻喬抱起。

不過，面對俊軒突然抱起自己，而且仲要係公主抱，韻喬就當然有好大聲咁叫啦。

而韻喬叫得咁大聲，自然就引起Ms Chan嘅注意「林俊軒同學、張韻喬同學，請問你地發生咩事？」





俊軒於是就同Ms Chan講「Ms Chan，張韻喬同學頭先整到腳，依家痛到行唔到，所以我想帶佢去醫療室搽下藥油，舒緩一下情況」

Ms Chan見到韻喬面部表情扭曲得好緊要，於是就話「ok，咁你地兩個小心啦，同埋睇實張韻喬同學」

「放心啦，我會咖啦，Ms Chan」俊軒回答道，然後就同韻喬講「小喬，咁我依家同你落去啦，你扶實我啦！」

「知……知道！唔該……小軒」韻喬塊面又一次紅起上黎，除咗係因為第一次畀男仔抱之外，更重要係，俊軒將自己手放咗喺韻喬大髀嘅敏感位置度，韻喬都難免有少少反應。

（待續 ~）

IG link https://instagram.com/bear_big_big_writer