《愛在。貴族學園》: Ch 11 ~ 首次獨處 Part 7

Ch 11 ~ 首次獨處 Part 7（連載日期：2021/01/21）

「點呀小喬？隻腳仲痛唔痛呀？同你搽咗咁耐，都應該差唔多啦啵」俊軒喺度問受傷嘅韻喬。

「我仲有少少痛呀，不過比起頭先已經舒服咗好多啦，唔……唔該你呀小軒！」

韻喬一臉感激咁同俊軒講，而且面容已經冇頭先喺Studio嘅時候咁辛苦，仲開始同俊軒吹水添「哈哈，不過我估唔到，原來你個大少爺手勢都唔錯」

「哦！我平時都係跟譚管家學咖咋」俊軒非常謙虛咁講「如果之後有機會嘅話，我再教你囉，好冇？等你平時都可以幫你父母按摩下」





「好呀，咁我都多謝你先」韻喬好開心咁回應俊軒。

再搽多幾分鐘藥油，俊軒再一次問韻喬「點呀？今次應該都真係差唔多咖啦小喬，不如你依家試下落床，睇下可唔可以企起身？」

經過俊軒嘅悉心治理之後，韻喬嘅情況已經好咗好多。

韻喬於是就按照俊軒嘅指示落床，果然已經可以企返起度，雖然都要扶住俊軒去做平衡

「ok啦！今次真係唔該哂你啦！」韻喬終於都有返少少笑容咁回答俊軒。
 




「唔使客氣，咁不如我地再坐多幾分鐘，先再慢慢行返去Studio上堂啦？」俊軒提議，然後又想整蠱韻喬問「咁要唔要孭你返上去呀？」

「唔使啦，我諗我應該都行到啦，而且呢度係學校黎咖，我地都無謂……做埋啲會俾人誤會嘅嘢啦」韻喬有少少怕醜咁講。

韻喬心中雖然有少少想俊軒孭自己，但畢竟依家喺學校，而且仲要係上堂時間，所以唯有婉拒俊軒嘅一番好意。

過多幾分鐘之後，韻喬就同俊軒講「小軒，我地都係返去啦，都係唔好要其他同學擔心！」
 
「我無所謂呀，最緊要係你唔好受傷咋」但係韻喬最後決定都係要出發。





之後，俊軒就好小心咁扶住韻喬，慢慢離開醫療室，同時都完成繼上一次去林家“見家長”之後，第一次獨處嘅時間，返去Studio繼續上堂。

不過，因為韻喬整親嘅關係，所以喺上返去Studio之後，佢就同俊軒坐埋一邊，靜靜咁喺度睇其他同學跳舞。

當然，Ms Chan都有趁空閒時間，走黎關心一下韻喬嘅情況，不過韻喬都話自己冇咩事。
 
落堂之後，天殷同禮謙就第一時間問侯韻喬「小喬，你隻腳點呀？仲痛唔痛呀？」「其實都仲有少少啦…」韻喬回答道

「不過，頭先都好在有小軒幫我搽藥油，我依家先至冇咁痛咋，而且佢手勢都幾正宗。今次我真係要多謝佢啦！」
 
「喬喬你冇事咁就好啦！今次真係多謝你喎小軒！」天殷上前抱住韻喬，然後都用眼尾望一望俊軒，好似要暗示啲嘢咁。

俊軒都即刻回應話「都係舉手之勞啫，係我嘅榮幸黎」「不過喬喬呀，你今日放學都係唔好坐巴士返屋企啦」
 
「嗯殷殷，點解咁講呀？」韻喬一臉疑惑咁反問天殷「但係如果我唔坐巴士嘅話，坐地鐵又要行好遠又要轉車喎，而且仲會冇位坐添呀！但係坐巴士嘅話，好多時候都會有位坐嘅」




 
「唔係呀小喬，你頭先先整至親黎，我怕你坐巴士樓下冇位坐嘅話，一陣上落樓上嘅話再整親就麻煩啦」

「而且你爸爸媽媽又唔喺屋企，你出事嘅話邊個仲可以照顧到你呀？」天殷道出理由。然後再問一下俊軒「嗯，軒仔呀，我想請問你今日放學得唔得閒呀？」

「你話我？！今日都……應該ok啦。做咩呀事殷殷？」突然被人cue嘅俊軒表情都好愕然。

但係好快俊軒都知道天殷嘅意思，於是就反問天殷「你地，係咪想問我可唔可以放學之後，抽時間送韻喬同學返屋企？」

（待續 ~）

IG link https://instagram.com/bear_big_big_writer