《愛在。貴族學園》: Ch 9 ~ 嬲到爆炸嘅韻喬 Part 2

Ch 9 ~ 嬲到爆炸嘅韻喬 Part 2（連載日期：2021/12/02）

「反之，如果你真係對張韻喬同學冇意思嘅話，唔該你一陣間同韻喬同學講清楚之後，就自己抽身，等件事慢慢淡化，以後唔好再私底下有任何聯絡，有咩就喺學校裏面解決咗佢就算啦……」禮謙繼續將頭先嘅説話講埋落去。
 
「俊軒、禮謙，你地兩個個麻煩上一上黎我間房，我地四個自己傾一傾先」喺過多十幾分鐘，韻喬同天殷換完衫之後，天殷就落去大廳度，邀請兩個男仔上自己嘅睡房

「知道啦，殷殷」兩個男仔就起步，上去天殷嘅房間。
 
「啦小軒，我估天殷已經幫你勸咗小喬同學一輪啦，而且小喬同學都應該冷靜咗落黎咖啦。」





「如果你仲有咩要講你嘅，你就自己同小喬講清楚啦。」禮謙再一次拍一拍俊軒膊頭之後，就上咗天殷間房。

入到房之後，俊軒同禮謙就見到韻喬坐喺天殷張書枱嘅凳上面，雖然韻喬黑哂塊面咁望住佢地幾個，就好似話畀大家知佢都仲係好嬲咁。

但同頭先喺林家座駕上面嘅時候相比，韻喬已經相對平復心情，而且都睇得出韻喬有喊過嘅痕跡。

喺閂好門大家坐低之後，大家都dead air咗30秒。

「對唔住呀，小喬，今次真係要你受太大嘅委屈啦，真係唔好意思，為咗幫小軒搞到咁…」最後由主人家天殷負責破冰，佢首先開口安慰韻喬，再緊緊咁抱住佢





「畢竟最後嗰part，實在太殺大家措手不及，呢個我諗大家都唔會估得到。希望小喬你會原諒我地幾個……」
 
「其實林auntie可能心裏面都知道，小軒佢到底係咩料子，所以佢先要你地兩個玩到咁大。」

「但無論點都好，我自己都要同你講聲對唔住，小喬同學」一直喺呢件事上力勸俊軒唔好玩咁大嘅禮謙，喺兄弟有難嘅一刻，點都要幫口勸説一下韻喬。

不過，解鈴還須繫鈴人，由頭先入房到依家，整件事嘅始作俑者—林俊軒都仲未出過聲。

其實韻喬都好想知道，俊軒到底點樣去解釋頭先喺林家大宅臨走之前，所發生過嘅事。





於是，身為好姐妹嘅李天殷，點都要為韻喬做返少少嘢，或者叫做將功補過吧

「喂林俊軒，你係呢件事嘅男主角，我地再同你講幾多好説話都好，説服力都唔會夠你一個多，所以，你依家有咩要同小喬好好解釋咖？」
 
「係……係，我知道」如同之前講過，俊軒每次見到韻喬嘅時候，都會好似依家咁非常緊張，而且都會方寸大亂，今次都當然唔例外啦。

而韻喬依然都用一個非常不滿嘅眼神，望向應該要同自己道歉嘅俊軒。

終於再過多兩分鐘，俊軒都肯開口講嘢「張韻喬同學，今晚嘅事，真係好對唔住。」

「頭先喺坐車過黎嘅時候，我先發覺到今次我真係自己過太自私，鋌而走險，以為自己搞得掂我媽媽…」

「但依家嘅局面話畀我知，我林俊軒其實都係一個好渺小、不經世事嘅高中生，講心計嘅話，我根本就唔係我媽媽嘅對手。」

「如果我一早估到我媽媽會喺背後同我玩陰嘅話，我都唔會講呢個大話，然後再要你上去我屋企見家長…」





「小喬，今次真係好對你唔住，同時都對唔住為咗幫我，而安排一切嘅天殷同埋謙謙。」

「因為我自己一個唔成熟，結果搞到大家今晚原本可以順順利利都變到依家咁唔開心……」

「但喺道歉嘅説話講完之後，我都要好多謝小喬同學，你為咗幫我而作出嘅犧牲；」

「要多謝今晚幫小喬打扮得咁出衆，同埋被逼背叛、隱瞞好姐妹度橋嘅天殷；當然仲有今晚抽時間陪我嘅死黨禮謙」

「就算今日順利咁過咗我媽嗰關都好，依家我個心都好唔安樂，由其是係對住小喬同學。」

「如果我真係有得再一次選擇嘅話，可能我都會選擇放棄今晚嘅行動，聽我媽話繼續去相睇party」

「又或者認認真真咁，同一個自己鍾意嘅女仔拍拖，總好過去傷害一個好女仔。」





「再一次多謝你地今晚嘅付出同埋安排，對唔住」俊軒將心底話講出黎，同時都對韻喬佢地三個鞠躬道歉。

（待續 ~）

IG link https://instagram.com/bear_big_big_writer