《愛在。貴族學園》: Ch 9 ~ 嬲到爆炸嘅韻喬 Part 3

Ch 9 ~ 嬲到爆炸嘅韻喬 Part 3（連載日期：2021/12/05）

喺聽完俊軒嘅心底話之後…「林俊軒你正一衰人黎咖，係都要搞喊我！」天殷已經眼紅紅，仲流注兩行長長嘅眼淚，然後望向身邊嘅韻喬

「喬喬呀，你會唔會原諒我地幾個咖？你會唔會一陣間嬲咗我地，甚至退學咖？」

韻喬聽完之後暫時冷靜落黎，而且面無表情，再用一個冰冷無比嘅單一語調，同在場幾位同學講......

「事情唔發生都已經發生咗啦，都冇咩可以點嘅，如果我嘅付出，可以能夠幫到俊軒同學你就最好啦，至少大家一直嘅努力都冇白費到……」





但係，喺講到一半嘅時候，韻喬嘅情緒又再一次被挑動起黎「不過……」

「不過咩呀喬喬？做……做咩你突然之間又想喊咁嘅？」天殷非常緊張咁望向韻喬，自然俊軒同禮謙都係一樣。

韻喬之後都再開口講「不過，有一件事今晚真係非常可惜，而且任憑林俊軒你點樣對我好都好，你…..你都唔會補…補償到畀我。因為……因為……」

韻喬眼角已經再一次滲出淚水，於是天眼就拎紙巾畀韻喬。

「乖呀喬喬，到底發生咩事啫？」天殷再一次半推半請咁，叫韻喬講出心底話





「因為頭先喺林家嘅……門口，我…我將我嘅……」韻喬嘅眼淚都越來越多……

禮謙喺聽到“林家嘅門口”呢幾個字，就知道韻喬所講嘅呢件事，應該就係林太要俊軒同韻喬喺佢面前kiss嘅一刻......

於是就碌大對眼掩住自己個嘴講「唔通今次你付出咗……」

「你付出咗你嘅初吻，畀我？係咪呀，張韻喬同學」俊軒接住禮謙當面問韻喬。

當然，天殷聽到之後，終於都意識到問題嘅嚴重性，而且比之前更加嚴重。





但天殷完全冇出聲，只係等韻喬自己答。

「係……係呀！」韻喬過咗一陣，終於都回答呢條令人難以啓齒嘅問題，然後再好大聲叫「我……我嘅初吻竟然…….竟然就咁畀咗林俊軒你……你呢個衰人呀！！！」

「佢……又唔係真係我男朋友！點解個花心王可以有我嘅初吻喎！我……越諗越唔抵呀嗚嗚嗚！…」之後韻喬就喺大家面前，再一次痛哭起黎。

「喬喬呀！你冷靜少少先啦……」天殷被韻喬突然嘅脾氣嚇到，就即刻安撫對方話「雖然我住得咁偏僻，但係聽講校長都住喺呢度附近咖咋，你咁大聲可能會畀其他人聽到咖。」

「如果真係咁樣嘅話，你就有可能唔可以再喺呢間學校讀書咖啦！乖啦」

既然天殷都講到咁，韻喬又開始發下細路女脾氣「唔喺度讀咪唔喺度讀囉！最多我咪返去真光！點解我要忍個衰人喎！」

俊軒聽到韻喬呢句心底話，其實都好難受，應該話深受打擊，畢竟原來四年前一手帶住嘅插班生，居然係咁樣睇自己。

不過俊軒為咗唔想進一步刺激韻喬，所以選擇將自己嘅委屈吞下，感受一下韻喬今日心目中嘅感受。





至於天殷，就不停講説話安撫韻喬，不過韻喬好快都再一次冷靜落黎。

等大家再一次安靜落黎之後，「其實林auntie 呢一招真係好高，大家都完全估唔到佢有呢一着。」

「小軒，你媽媽捉人心理真係好勁，睇落都應該係喺商場裏面學返黎，再套喺你身上。」

「唔怕得罪講句啦小軒，你媽媽城府好深，我勸你以後唔好再同你媽媽鬥……你一定會輸」禮謙非常冷靜咁，講出上面嘅一段說話。

「城府好深？同媽媽、auntie鬥一定會輸？點解咁講呀禮謙？」另外嘅三個人帶點疑惑咁，齊齊去問禮謙呢段説話嘅原因。

（待續 ~）

IG link https://instagram.com/bear_big_big_writer