《愛在。貴族學園》: Ch 9 ~ 嬲到爆炸嘅韻喬 Part 1

Ch 9 ~ 嬲到爆炸嘅韻喬 Part 1（連載日期：2021/11/30）

就喺林家嘅座駕上面，座駕正由林家大宅開去李家大宅……

「林俊軒!！！！！！！！………」喺離開林家大宅之後冇耐，韻喬就突然之間好嬲咁，大聲吼叫俊軒全名。

俊軒聽到之後即刻用手遮住韻喬嘅口，唔畀佢再繼續講落去。然而，因為韻喬實在太大聲嘅關係，林家嘅司機都畀韻喬嚇到心都離一離。

於是就打死火燈將座駕停埋一邊，然後轉過頭望一望，了解究竟後座發生咩事「二少爺、張小姐，請問有冇咩事？」





「我同張小姐都冇事，你專心揸車就得咖啦司機，仲有嚇到你真係唔好意思」俊軒一面歉意咁同司機講

「係啦司機，我同我朋友會一齊返去李家大宅度玩，你繼續揸過去就得咖啦，唔該」

「知道啦，二少爺。」司機於是繼續一邊揸車，一邊回應俊軒。

俊軒之後再同韻喬講「小喬呀，我知道你依家喺度諗緊乜。不過，我地依家仲喺路途上，有咩嘅話一陣間去到殷殷屋企先再講啦，你等我地司機專心揸車過去先，求下你可以嗎？」

韻喬之後就輕輕「哼」咗一聲，就冇再理到俊軒，自己一個望住窗外嘅風景。





話咁快，衆人就返抵李家大宅，而喺落車嘅時候，韻喬仲係嬲爆爆咁嘅樣，但係見到李太嘅時候，都有同天殷嘅媽媽打招呼。

至於其他三個人，佢地都知道今次韻喬畀林太過一棟玩到咁大，以韻喬嘅性格，之後一定會爆seed鬧人，所以佢地都唔敢再多事。

天殷第一件事，就係同韻喬返房換衫。而兩個男仔，就喺大廳度等。喺天殷返上房之後，就喺Singal群裏面同兩個男仔講……

「5A李天殷：小軒，今次我都唔知道要點氹返小喬啦，你自己一陣間都好自為之啦        20:45」
 
兩個男仔見到天殷嘅留言都表示極度無奈「唉，今次真係畀我阿媽玩出火啦，真係搞出個大頭佛啦，唉唉唉…」俊軒先向禮謙抱怨





「韻喬同學今次實嬲死我都似！而且，可能返到學校又要畀人講閒話，唉」

「大佬，我一早都叫咗你唔好玩到咁大咖啦！依家出哂事啦，搞到大家都落唔到台啦，你話點收科啦？」

禮謙起初都略帶激動同俊軒講，但之後都明白俊軒都畀林太過咗一棟嘅受害者，於是就嘗試開解對方……

「其實小軒呀，就算你唔鐘意去相睇都好，你之前有冇嘗試過同auntie講出你自己嘅想法先？如果有嘅話，咁就證明auntie嘅思想極其頑固，而且難以應對，你絕對唔係佢嘅level。」
 
「不過，如果你之前冇提出過意見嘅話，我做死黨嘅就唔怕同你講，你今次真係一鋪清袋啦。因為我地都冇人知道，到底韻喬同學會幾時先下到火。」

「但唯一可以慶幸嘅係，今次你再樣衰都好，都係我地班裏面自己嘅事。」

「如果今日你所搵陪你去你屋企食飯嘅女仔，係其他班嘅人嘅話，我肯定到時候你一定會畀最少兩班嘅人講你閒話，你想唔上secret都唔得啦。」
 
「唉，呢啲嘢我都梗係知啦，咁但係我應該再點補償韻喬同學先？依家最重要嘅，就係要擺平韻喬同學嘅憤怒呀」俊軒仲係好擔心咁同禮謙講





「Secret方面我就唔擔心嘅，如果韻喬同學自己放上去嘅話，我相信佢自己都可能會有人講閒話。」

「以前畀secret講嘅閒話嘅人，應該都唔會將自己快樂建築喺別人痛苦之上掛？」

禮謙於是就拍一拍俊軒膊頭，當係勉勵一下對方「嗱，道歉就一定要咖啦，呢個就係最基本嘅嘢。」

「不過呢，如果你自問自己對韻喬同學真係有意思嘅話，咁我勸你呢就的起心肝，認認真真咁追人地，然後再好好補償佢……」

（待續 ~）

IG link https://instagram.com/bear_big_big_writer