《愛在。貴族學園》: Ch 8 ~ 逃過一劫的吻 Part 10

Ch 8 ~ 逃過一劫的吻 Part 10（連載日期：2021/11/29）

「因為我地發現，張小姐你好似好抗拒同我地小軒，做一啲情侶好經常做嘅行為」

「等Auntie我舉個例子啦，就好似拖手咁，呢個動作係一對喺埋一齊冇耐嘅情侶裏面，係最常做而且係最容易做嘅事……」林太繼續講出佢嘅原因

「但係唔知點解，我發現每次當小軒準備拖起張小姐你隻手嘅時候，張小姐你都顯得好抗拒，好似唔想小軒拖你咁」

同一時間，韻喬嘅心裏面都變得非常恐懼，畢竟原來自己一個小小嘅不願意，就成為咗一個被發現破綻。





不過，韻喬心底裏都好佩服林太超強嘅觀察力，但同時都令自己相信，林太就如俊軒所講，係絕對唔容易應付嘅人。

「不過唔緊要嘅，可能因為有長輩喺度，張小姐你或者想低調少少，又或者可能怕我同爸爸會唔鍾意，所以先咁抗拒我地小軒嘅行為。」

「但係，我自己都想可以更加確定，你地之間嘅關係係咪情侶。所以我想，你地喺我面前做一樣嘢，希望你地兩個可以應承我」

俊軒同韻喬都驚到要吞一吞口水，然後再一齊講「請……請問係咩事？」

「如果你地兩位，依家夠膽喺我面前kiss嘅話，我就會相信你地兩個之間真係情侶關係」林太諗一諗之後就講。





韻喬於是即刻瞪大對眼，然後過咗十幾秒嘅dead air之後，韻喬就嘗試同林太解釋

「林Auntie，其實……」「啜！」

不過，韻喬都未講完呢句説話，俊軒就因為感覺到，韻喬有機會喺呢個時候打退堂鼓，甚至可能會將自己講大話嘅事踢爆。

於是俊軒就即刻將自己嘅嘴唇，完完全全覆蓋到韻喬嘅嘴唇上，同時都瞇起自己對眼，同韻喬深情一吻。

不過喺kiss嘅時候，俊軒都可以感受到韻喬嘴唇嘅柔軟，當然都感受到唇彩嘅質感，完完全全衝擊住自己嘅心臟同腦袋。
 




而面對俊軒強行突襲自己，韻喬心中感到非常憤怒。但自己又唔想前功盡廢，所以都為咗交戲，而唯有選擇去配合俊軒，同樣先閉上自己嘅眼睛，回應住俊軒嘅呢一吻。

但就喺俊軒親吻自己嘅同時，喺韻喬嘅身體裏面，同樣都有一股之前未感覺到過嘅強力電流，由嘴唇向住自己嘅腦部衝去，同時身體都感到無比嘅灼熱，就好似發燒咁。
 
至於一直喺身邊陪住韻喬嘅天殷同禮謙，到依家都唔敢相信，林太會睇得出佢地嘅破綻之餘，仲居然要喺大家面前，作出如斯大膽嘅要求，所以都已經睇到O哂嘴，而禮謙仲更加覺得唔好受。

但佢地嘅關注點，係佢地兩個都唔知道，一陣喺離開林家大宅之後，韻喬到底會對俊軒有咩嘅報復行動。

因為佢地知道韻喬嘅性格，今晚嘅事，韻喬一定唔會就咁算數。

喺等俊軒同韻喬鬆開口之後，韻喬嘅面色都唔係好好，搞到俊軒都有必死嘅準備。

但係，林太就非常滿意咁講「好啦小軒、小喬，既然你地兩個都夠膽喺我面前kiss咗，做到情侶應該會做嘅事，咁我就相信你地真係拍緊拖啦……」

「咁林auntie我都會祝你地兩個以後都會幸福，小喬，如果你得閒嘅話，你都可以多啲上黎食飯！然後之後我再請你同你爸爸媽媽上黎食飯」





韻喬於是就好尷尬咁點點頭，露出一秒鍾嘅冷笑「多謝你呀，林auntie」

但事實上，依家嘅韻喬憎到林太同俊軒一個點，畢竟韻喬都好討厭啲有錢人，將佢自己呢啲喺普通人家出身嘅人，當成係馬騮咁玩。

而俊軒都意識到，韻喬好快就會情緒大爆發，林家大宅根本不宜久留，於是就提出「咁媽媽，我依家送小喬返屋企先。天殷、禮謙，你地都要準備行啦」

「知道啦小軒！」但天殷同禮謙同樣都好擔心，一陣間韻喬點樣喺車度對待俊軒。

「好啦。咁多位再見，有機會再上黎食飯啦！」林太再次送別幾位後生仔「bye bye林auntie!」

四人同時回應之後，再分別上返頭先嘅座駕，向李家大宅方向駛去。

（Ch 8 逃過一劫的吻 ~ 完）





IG link https://instagram.com/bear_big_big_writer