《愛在。貴族學園》: Ch 8 ~ 逃過一劫的吻 Part 8

Ch 8 ~ 逃過一劫的吻 Part 8（連載日期：2021/11/25）

「啊，小喬！」俊軒突然之間又叫韻喬「嗯？做咩呀？」「擘大口啦，啊！」

俊軒突然之間餵韻喬食雞，嚇得韻喬差少少就反應唔黎。

但係佢地為求今晚嘅“表演”逼真，韻喬都冇抗拒俊軒嘅行為，於是就打開口，任由俊軒將舊雞放入自己個口裏邊。

「啊，」「哈哈，好唔好食呀？」「好好食呀！你都食一舊先啦！」「好呀，唔該小喬！」





韻喬說罷都夾起一舊雞，喺大家面前準備送入俊軒口中「啦，小軒擘大你個口啦，啊！」

「啊……咳咳」不過同俊軒唔同嘅係，韻喬係特登用好大力，塞一大舊雞入去俊軒個口度，作為剛剛俊軒如斯惡心行為嘅報復。

「好唔好食呀，小軒？」韻喬用一個甜美又帶點殺氣嘅笑容，望向喺度食緊雞嘅俊軒。

而俊軒都非常識做話「好食呀小喬，而且女朋友餵嘅食物，真係寧舍好食嘅哈哈！呃……」

就當俊軒講出呢句嘅時候，韻喬又喺枱底下面，踢咗俊軒小腿一下，警告佢唔好再咁得戚。





坐喺韻喬同俊軒對面嘅天殷同禮謙，都覺得對面俊軒同韻喬呢對所謂“情侶”，不停咁派閃光彈同狗糧，感到非常尷尬。

而且都覺得好眼冤，基本上都唔想再對住對面嘅“小情人”，於是禮謙又一次決定出手，唔畀俊軒同韻喬繼續殘害大家，就對天殷講話

「天殷同學，等我都幫你夾菜呀，好嗎？」天殷點點頭後，禮謙就將兩條菜夾入去天殷個碗度「唔該禮謙。」
 
「唔使客氣啦！大家都咁耐朋友同同學！」「哈哈，咁禮貌上點都要嘅！」天殷回應道。

不過，對面嘅俊軒同韻喬，都見到對面有難得一見場面「咦，睇落謙謙都幾gentleman咖喎！」韻喬見到之後對禮謙講。





「喔哈哈，因為我都近得你“男朋友”多嘛，所以最近都染上咗唔少佢嘅習慣」禮謙呢句説話，搞到大家都喺度笑，但係天殷塊面就已經紅哂。

「不過謙謙你呢學還學，唔好學佢把口就得咖啦！」韻喬笑笑口咁講「佢把口都好似啷過油黎咁，成日都口甜舌滑！」
 
「小喬呀！Uncle都想問你少少嘢，唔知可唔可以？」林生突然之叫咗韻喬，於是韻喬都即刻回應

「係，請問Uncle有咩事？」「Uncle都係想知道，你同小軒一齊咗幾耐？」

俊軒聽到林生呢個問題，即刻心裏面又開始不安，因為都怕韻喬玩踢爆甚至玩前言不對後語。
 
「喔！其實我地兩個都唔係一齊好耐咋，都係最近三個禮拜裏面嘅事」韻喬其實都知道配合劇情，於是繼續講頭先同林太講過嘅大話出黎「點解……uncle你會咁樣問嘅？小軒佢之前冇同你地講？」
 
「哦，原來係咁。唔怪得上個月佢去party嘅時候，小軒都未同我地話佢已經有女朋友啦。所以我先會問你囉，韻喬小姐」林生非常慈祥咁答韻喬。

不過，當韻喬又一次聽到party呢個字之後，就掩住半邊嘴喺度偷笑。





因為韻喬佢都已經FF到，呢個花心到一個點嘅林俊軒，被逼同啲dry到不能再dry嘅有錢auntie，喺個dance floor度，非常心不情願咁跳舞嘅情景。

「不過，無論如何都好，我同auntie都希望你同我地小軒可以長長久久，甚至喺學業上邊可以互相幫助」林生再補充嘅同時，就將韻喬由自己嘅幻想世界出返黎。
 
「多謝Uncle同Auntie嘅祝福。我都希望我同俊軒可以長長久久，係咪呀俊軒？」

今次，韻喬非常主動咁，大力挽起俊軒隻手道。

當然，雖然畀韻喬搞到痛都好，俊軒都有對韻喬微笑回應，然後話「Me too！」

（待續 ~）

IG link https://instagram.com/bear_big_big_writer





另外今日雙平台點擊數達到5萬點擊次，多謝大家持續支持，稍後時間先會安排加更，又或者同時出兩集