《愛在。貴族學園》: Ch 8 ~ 逃過一劫的吻 Part 7

Ch 8 ~ 逃過一劫的吻 Part 7（連載日期：2021/11/23）

韻喬打咗俊軒一下之後，俊軒今次又一次話「（張韻喬！你可唔可以唔好咁暴力呀？成日都少少嘢打個男朋友都有嘅？）」

不過俊軒過多幾秒鐘就話「（呃……都係冇嘢啦小喬）」

俊軒之所以秒速變成隻死狗咁款，係因為韻喬已經喺度睥實俊軒。

當然，天殷同禮謙兩個，就繼續喺度食花生啦，差少少就忍唔到笑。





再過多幾分鐘，林太就同俊軒嘅爸爸林生，一齊由樓上黎到飯廳。

喺林氏伉儷坐低之後，林生就同已經就坐嘅四位年輕人打招呼「大家晚安」

「林Uncle(爸爸)你好。」四人於是都同林生打招呼。
 
林生喺由耳邊聽完林太嘅説話之後，就即刻望住韻喬話「小軒，着住紫色裙呢位，就係你嘅女朋友，小喬？」

「係呀，爸爸。」俊軒回答道，然後轉身同韻喬講「小喬，同我爸爸打個招呼吖」
 




韻喬於是就點點頭，然後就望住林生「林Uncle你好，我叫張韻喬，大家平時都叫我小喬，係你二仔嘅同班同學兼女朋友。」

「今次都係第一次同你地兩位見面，以後都請uncle auntie多多指教。」韻喬稍為簡單介紹咗自己，當然都有少少緊張。
 
林生非常滿意咁點頭，然後就同俊軒講「唔錯唔錯，小喬你睇落又有禮貌又nice。小軒，你真係要好好地同小喬相處啦，難得有一位靚女肯做你女朋友，知道嗎？」

「知道啦爸爸，我會好好照顧小喬咖啦。」之後俊軒就拖住韻喬隻手，但韻喬即時啤咗一眼俊軒，覺得佢藉機抽水。但因為劇情需要關係，所以韻喬都冇再對俊軒做啲咩。

「不過，點解殷殷同程公子，點解你地都會喺度嘅？」林生嘅呢個問題，都令到天殷同禮謙有少少尷尬「你地兩位拍緊拖呀？」





喺問埋呢條問題之後，天殷同禮謙就更加尷尬，而天殷塊面就已經紅哂，一面無助咁望住禮謙。

禮謙於是就出手解圍話「唔係啦林uncle，我同殷殷都仲係同學嘅關係。而且今晚都係小軒同小喬兩個一齊邀請我地黎嘅。」

「主要都係因為小喬同學佢第一次見家長，佢怕自己會緊張講錯嘢，然後留一個壞印象畀你地，所以咪邀請埋我同殷殷上黎」
 
「哈哈原來係咁！不過放心啦小喬，我同我老婆都好nice，當食一餐便飯就得咖啦小喬」

「知道！多謝林uncle」韻喬又一次好怕醜咁回應。

「好啦，廢話我地唔好講咁多啦。幾位今晚酒微菜薄，招呼唔到，不過大家都食多啲啦！大家食飯」

林生微笑咁同大家講，而衆人都以「大家食飯…..」回應。
 
因為都叫要招呼自己個仔嘅女朋友（同埋同學）嘅關係，所以今晚林家嘅菜餚，都比平時更加豐富，肉、菜、雞、海鮮都已經有幾樣，再加個老火湯。





對於平日都食得比較簡單嘅韻喬黎講，今晚呢餐飯已經算係非常好嘅一餐，甚至可能畀做冬、過年嘅時候更加豐富。
 
「（俊軒同學，我想問你地平時食飯，都會有咁多餸菜咖？）」韻喬好輕聲咁喺耳邊問俊軒。

「（唔係咖小喬，今晚完全係為咗你，所以餸菜都比我地平時豐富咗好多下。）」俊軒如實回答自己個“女朋友”「係呢，小喬你想食雞定食魚呀？等我幫你夾吖！」
 
雖然都知道俊軒咁做，係刻意令兩個大人相信，佢地依家拍緊拖，但係韻喬此刻都感到一絲從來未感受過嘅溫暖，於是就話「咦小軒乜你依家咁暖男咖咩？」

「唔得咖？咁你想食咩呀？」「唔係，咁我要魚呀….唔該小軒」

韻喬語畢，俊軒就將魚夾落韻喬個碗度。「唔該小軒…..」俊軒同韻喬有少少尷尬咁對望。

不過，聰明而且老謀深算嘅林太，都開始懷疑韻喬同俊軒，到底係咪真係一對情侶。





於是，林太準備喺飯後，韻喬離開林家大宅之前，親自測試佢地兩個......

（待續 ~）

IG link https://instagram.com/bear_big_big_writer