《愛在。貴族學園》: Ch 3 ~ 對好友嘅求助 Part 1

Ch 3 ~ 對好友嘅求助 Part 1（連載日期：2021/09/12）
 
（張韻喬視角）

「殷殷啊，我有啲嘢想同你講呀」聽到打鐘聲之後，我就鼓起勇氣同殷殷講「做咩呀小喬？咁你有咩咪喺度講囉」

「不過呢，呢樣嘢我唔方便喺度講，不如我地出去先講囉，好冇呀？」於是Ms Wong一落堂嘅時候，我就即刻拉住天殷離開班房，去到走廊尾一個比較少人嘅空間再問對方。
 
「喔，好呀，喂…….唔好跑得咁快呀喬喬！！！」天殷一下畀跑得好快嘅我，拉到上氣唔接下氣咁。





所以佢一去到走廊尾之後，天殷就即刻同我抱怨......

「喂張韻喬你依家好心急咩？你跑咁快真係就快跑死我啦！」
 
「好啦對唔住啦殷殷」首先我一定要耍lum啦，但係唔該你都做多啲運動啦，平時仲不停食食食！一陣肥死你呀肥婆！

雖然我都唔係咩校隊，不過我都有每個禮拜去跑步咖，一時會跑上寶馬山，一時就會跑海邊咁。

「但係，因為呢樣嘢，真係真係真係唔太方便響班房裏面講，所以先要咁急拉你出離傾咋嘛，希望你就唔好怪責小妹我啦。」
 




「呃，咁係關於啲咩咖？無啦啦好似要講啲咩天大秘密咁！」天殷一面疑惑咁望住我。
 
「咁我就唔兜圈直接講啦。頭先上LS堂嗰陣呢，我聽到……聽到…..」

一諗返頭先林俊軒同程禮謙喺班房嘅對話内容，突然之間我都好難為情，紅都面哂咁，完全唔知點樣面對殷殷。
 
「張韻喬你到底今日做咩啊？又話直接講…..但突然間又塊面紅哂又吞吞吐吐咁？奇奇怪怪都唔知你想點…..」殷殷突然之間仲伸手摸一摸我個額頭，想知我係咪發燒。
 
呃，張韻喬既然你都選擇咗要講，係姓張嘅就直接一鼓作氣講出黎啦。
 




「冇呀，喺頭先上LS堂嗰陣，我聽到個花心王林俊軒同程禮謙求救，話想拎我嘅電話號碼….。而且林俊軒仲話點解自己可以攞哂全級女仔嘅電話，就偏偏幾年時間都攞唔到我電話號碼喎….」
 
「嘩！條友仔啊…..」殷殷一臉愕然，就好似聽完人地啲爆嘢咁嘅樣「原來已經攞哂全級女仔嘅電話號碼呀！咁佢拎哂我地啲電話號碼做咩呀？」

「唔通…佢想喺學校開後宮選妃呀？定係想做超級player哦？」
 
「但係，我想問下你同佢相處或者傾計嘅時候，佢有冇同你講啲奇怪嘅説話？甚至係同你講變態嘢先？」

「你知啲男仔佢地有時候喺班房都走去講AV啲大波姐姐咖啦」我其實知道殷殷一直有同林俊軒同學signal，但係我就真係唔知道佢地平時講啲咩多。
 
「咁又冇喎，通常我地都係講功課多囉。而且我地父母本身都認識，俊軒一定唔會對我亂黎嘅。」

「你知啦，功課就梗係要“參考”咖嘛，如果我次次都問你嘅話，班老師自然都會睇得出啦……」
 
果然又係同抄功課有關-,-，李天殷點解你可以咁鬼懶都有咖？唔係問我抄功課就問林俊軒抄。唉以後都係唔好對你咁好啦，廢事我一陣間真係害咗你呀！




 
「咁都好啲。」聽完感覺應該可以比我電話號碼佢……掛，定係再睇定啲先呢？但係抄功課嘅事就點都要講咖啦

「不過你啊李天殷！好心你啲功課就自己做啦，我同林俊軒跟得你一時，唔跟得你一世咖嘛！」我繼續講。
 
「知啦長氣！」殷殷聽到我借機入佢之後好似都有少少唔爽，不過至少佢都知道我咁講都係為佢好，所以都唔會發我大小姐脾氣。
 
之後我就拉翻去正題上面繼續問殷殷「咁以你地平時對話嘅内容，你覺得，如果佢直接問我要電話號碼嘅話，我應唔應該俾佢好呢？」

（唔知天殷之後又會點同韻喬講呢？）

（待續~）

IG link https://instagram.com/bear_big_big_writer