《愛在。貴族學園》: Ch 3 ~ 對好友嘅求助 Part 2

Ch 3 ~ 對好友嘅求助 Part 2（連載日期：2021/09/14）

（繼續張韻喬視角）

「er…..我自己就覺得ok嘅。不過，佢有冇對其他女同學有狗公行為嘅話呢，本小姐就真係唔知啦,一係你就自己睇下啦」殷殷一路講嗰陣，都順便俾我睇咗啲對話。

喺我睇過哂之後，其實都覺得冇咩問題「唔該殷殷」

「但係呢，我自己就覺得，喬喬你可以試下打聽其他女同學嘅意見，甚至隔離班啲女仔都可以嘅。」





「畢竟我地兩家之間有來往，軒仔都一定會好小心，但係其他女同學呢，我就真係唔太清楚啦。」

「但係喺我印象之中，隔離班好似都有好幾個女仔，都同林俊軒傾得好埋下。」

「如果你都仲係覺得唔放心嘅話，你都可以試下問下佢地意見咖」殷殷收埋部電話之後再同我補充。
 
「不過殷殷阿，如果我突然之間就咁去問人地呢啲嘢嘅話，佢地會唔會覺得好奇怪先？甚至，我怕有人以為我對林俊軒有意思，而俾人講壞話咋…..」我當場表達咗我嘅憂慮。

但係，如果對住殷殷表達嘅話，其實講咗同冇講都係冇咩分別。
 




「咁呢個就靠喬喬你嘅聰明才智啦XDXDXD」拿，大家明白我上一句嘅意思啦，李天殷又係傳返個波去我到。
 
「又講呢啲。喂，咁今日lunch食咩好啊？我今日冇咩idea啊！」其實，呢個都係我地，甚至係每個學生每日嘅重點話題之一。

不過，今次我居然畀人cue返轉頭，因為天殷喺度講「喂張韻喬，你頭先上堂嘅時候，唔係話你喺度諗緊lunch食咩咖咩？做咩依家又走黎問我呀？」

「咁啫係你頭先喺度講大話，然後一直就喺度諗林俊軒同學嘅事啦下話？」殷殷呢個衰妹仲要咁大聲喺度補多一槍，搞到我即刻碌到隻眼好大咁望住佢......

「喂呀李天殷你個死人頭！你細聲啲啦！我唔想之後有其他人知，或者上secret呀！」





冇錯，其實我地學校都一直有個secret，好多時候我地啲花生都係喺嗰度黎。學校好多有關同學，甚至係老師嘅傳聞，都係由secret傳出去先。不過，其實都冇多少傳聞係真嘅。
 
「好啦好啦，唔玩你啦張韻喬！」天殷怕真係出事之後，都唔敢再咁大聲討論，然後將話題轉返去食飯上面「至於lunch食咩呀……不如，我地今日食米線好冇呀？我地都好似好耐冇食啦喎」

「而且成日都食canteen嘅話，我會覺得好鬼無聊囉」天殷口中嘅呢一句，其實都喺大家嘅心聲黎。

雖然話我地學校嘅canteen都已經好過出面其他學校少少（畢竟我地同學屋企個個都咁有錢，一陣間啲嘢食唔啱班少爺、大小姐胃口嘅話，到時候真係會畀班家長投訴到癲。當然，除咗我之外啦），但極其量都只係真係少少咋，因為其實都唔係話特別好食，只係單純唔使出去方便咋！
 
「都可以嘅，今日就食米線啦！」「Yeah！」

「係啦殷殷呀，橫掂我地都出咗黎啦，不如我地去埋洗手間之後先至返課室囉？」

「好啊…..」於是我地就去洗手間啦。小息過後，大家都係如常上堂。甚至去到lunch嘅時候，我都冇再同殷殷講過呢件事。

不過喺lunch之後，其實我自己都賣甩天殷，做咗少少嘢嘅。





但唔知點解，無論喺行返埋位，或者上堂、轉堂嘅時候，我自己都偶爾望向林俊軒個位嘅方向。

而林俊軒個衰人都，好似有喺上堂嘅時候偷望我，而且有一次，我地仲對到眼添呀！真係好鬼老尬囉！！

唔會嘅唔會嘅，張韻喬你唔可以亂諗咖！你邊得黎有可能會對林俊軒呢個花花公子有意思先得咖？！

而且你都可能喺佢自己其中一隻棋子黎咖咋，快啲專心啲上你嘅堂啦！於是我自己都飲啖水去冷靜一下自己先。

不過，喺放學嗰陣......

（待續~）

IG link https://instagram.com/bear_big_big_writer