《愛在。貴族學園》: Ch 2 ~ 兩個詭計多端嘅八公 Part 3

Ch 2 ~ 兩個詭計多端嘅八公 Part 3（連載日期：2021/09/09）

（繼續張韻喬視角）

但我都好慶幸，自己個電話號碼仲未失守比呢個花心 flirt女王咋！睇黎我都係同媽媽講，要轉定電話號碼先啦下。
 
不過喺呢個時候，我見到程禮謙同學個表情就想失控大笑。點解？

因為佢嘅白眼已經反到上天花板，然後對住林俊軒講「啊林生，你到底係發燒吖定係食錯藥呢？都唔知係咪梁靜茹俾你嘅勇氣，去講啲咁唔要面嘅説話呢？」





哈哈哈！對於突然得到好友如斯口吻嘅回應，林俊軒明顯反應唔黎啦。

於是佢就追問程禮謙同學「下，你做咩咁問啊？乜我咁樣講真係好唔要面咩？」

「冇啊，你一下就咁爆seed所以就嚇一嚇啫。不過，如果你一個唔小心，畀張韻喬同學聽到呢番説話嘅話，搞不好佢對你嘅印象會唔係幾好哦！」禮謙嘗試反嚇俊軒。

但學霸好似唔太get佢嘅意思，於是程禮謙就嘗試轉話題「係啦，我今日lunchtime要去Music Studio練豎琴，唔同得你食，sor」

「喔，加油啦，咁我唯有去搵其他飯腳啦」





但係佢地講完食lunch嘅話題之後，又返返去拎我電話號碼嘅話題上邊......

「喂，聽講你唔係有個家姐咖咩？女仔通常都應該知道女仔嘅諗法咖喎。既然係咁，點解你唔去問你家姐意見，而係走黎問一個你嘅潛在競爭對手呢？」

下？乜原來連程禮謙都對我有意思咖？我到底係咪真係咁受歡迎呀？點解好似個個見到我，都係走埋黎想追我咁。但係，我又有咩好呢？

錢，我屋企一定唔夠佢地多。打扮，我又好少，都冇好似其他同學咁多護膚品。衫，新嘅我又唔多。到底班男仔喺度諗咩咖？

不過，個衰人其實仲有個家姐，就係唔知道佢咩樣啫。





但係喺我諗緊嘢嘅同時，林俊軒又開口講啦「車！問我家姐真係哂gas啦！佢呀，都唔知係咪單身主義者黎嘅，又係好多人追，但全部都拒絕哂，成個冰山美人咁」

「咦，咁咪同張韻喬同學好相似？」嘩！居然程禮謙會諗到呢樣，心思都唔錯喎！

「但係你都係返去問你家姐啦，女仔嘅心理都唔係我呢啲直男可以理解嘅。而且你都知道我屋企幾嚴咖啦，講到拍拖都好似罪大惡極咁。所以呢，我都係幫唔到你住啦」林俊軒聽完之後好無奈，畢竟佢嘅好兄弟請佢食檸檬。

林俊軒呢個死狗之後都冇咩講，唯有死死地氣繼續上堂。而我食完花生之後，同樣都繼續上堂。
 
講完兩個男仔就講下其他啦，呢間學校嘅學生其實都算幾臥虎藏龍咖，連豎琴呢種大型嘅冷門樂器都有人識玩，仲要係男仔學！

我估，禮謙學得成嘅話，都應該可以引死女同學吧？

但唔知點解禮謙佢對其他女仔都好冷淡，唯獨對住我就成日四萬咁口咁，唔通……可能因為都好似係鍾意我啦。

不過，佢又真係幾真心嘅，而且又有禮貌，完全唔同隔離班啲狗公一個種類。




 
「喬喬？」「喬喬？」「張韻喬！」我嘅好姐妹天殷突然之間叫我，將我由對林俊軒呢個衰人嘅諗法，拉一拉返黎Form 5A嘅現實。
 
「嗯？做咩無啦啦叫我啊，殷殷大小姐？」我hang機左兩秒先識得答佢。
 
「你頭先做咩呆左咁嘅？」天殷用一個好擔心嘅樣眼神望住我「冇呀！」

「喬喬你今日係咪唔舒服呀？定係你今日period，所以成個人都失哂暈咁嘅?」不過講到period我就覺得好笑啦，明明上個禮拜先黎完，痛到我癲咁滯。
 
或者因為天殷都好少見過上堂發夢嘅我，所以先會咁大反應掛？畢竟我平時畀大家嘅印象，都係上堂好認真聽書嘅乖學生。

其實到底…..我應唔應該將頭先兩個男仔嘅對話同天殷講呢？嗯……但就算係講嘅話，都係等一陣lunchtime先講啦！
 
「冇……冇事啊我，我喺度諗緊一陣lunch食咩姐」我用返平時一貫親切嘅笑容回應佢「不過都係繼續上堂先啦，一陣小息再傾啦！」
 




「哦，如果你冇事，咁就好啦喬喬！上堂啦！」天殷嘅世界真係好簡單，只不過係少少嘢都可以好開心，不過佢亦都可以因為好小事而唔開心成日甚至一個禮拜。

而呢堂都好似過得特別快咁，可能都係因為我用左唔少時間，去八卦嗰兩個男仔喺度講咩啦。

不過最後我都係決定同好姐妹講返呢件令我煩惱嘅事，畢竟佢作為我嘅死黨，就算幫唔到幾多，點都可以幫我分擔一下吖嘛。

（Ch 2  兩個詭計多端嘅八公 ~完）

IG link https://instagram.com/bear_big_big_writer