《愛在。貴族學園》: Ch 2 ~ 兩個詭計多端嘅八公 Part 2

Ch 2 ~ 兩個詭計多端嘅八公 Part 2（連載日期：2021/09/07）

（繼續張韻喬視角）

「5A林俊軒：Hello張韻喬同學，我想同你一齊去下街，唔知你會唔會賞面呢？     09:52」
「5A林俊軒：如果會嘅話，唔知幾時方便你呢？          09:53」
 
麻鬼煩，仲要又係想約我去行街，真係一啲新意都冇之餘，仲覺得佢好鬼懶添呀！

其實我都係想就咁block咗佢就算，咁就可以一了百了，反正我都唔係太想同佢出去。





但問題係佢又係我同班同學，變咗block佢嘅話又會有説話聽。

不過，其實有時候我又覺得，如果可以自己一個隨心所欲咁行街，或者同爸爸媽媽行下仲開心仲舒服。

反正有錢人嘅世界，我唔懂而且都唔想懂。

當我準備收返埋部電話入櫃桶嘅時候，喺課室嘅另外一邊，忽然聽到兩個男同學嘅對話。

果然我都冇估錯，講嘢嘅就係林俊軒同程禮謙--呢pair喺5A裏面公認嘅其中一對超級死黨。




 
呢兩個人有時候真係好鍾意好鍾意上堂講嘢，兩個都正一八公黎咖!仲八過我地班啲女仔！

重點係有時佢地兩個講到興起嗰陣，就會好大聲，但佢地兩個自己喺度阻住人上堂都唔知。

「唉，謙謙啊」林俊軒一副失落嘅樣道

「學霸軒，做咩突然之間咁愁啊？頭先上Maths堂嗰陣有嘢唔明？」程禮謙自然第一時間回答對方。
 
冇錯，林俊軒佢依家嗱埋口面，一副15/16咁嘅樣對住程禮謙，都唔知道佢突然之間成個女人咁嘅樣到底做咩，小妹我睇唔透。





「呃，做咁多年兄弟你都咁唔了解我都有嘅，我真係對你有少少失望囉！」「得得得，係我錯，咁你繼續講啦」

「Mr Ho講書我梗係明啦，不過我係有另一樣嘢拆唔掂姐，而且拆咗幾年都拆唔掂」So Gay!
 
咩話？呢個世界居然都會有嘢難倒林俊軒佢，到底係咩呢？哈哈，我真係好想知你有咩搞唔掂啦。

於是我就有少少八卦，一邊扮聽Ms Wong講題目，然後將自己成擔心機，轉左去嗰兩條友仔度。
 
禮謙一臉驚恐回應，而且個樣仲好鬼搞笑下，差少少就笑埋出聲「喂好心就唔好玩我啦你！呢樣嘢如果連你搞幾年都仲係搞唔掂嘅話，咁我又點會有能力一時三刻幫你搞得掂呢？」
 
俊軒聽到之後瞪大自己對眼「車，又唔係學科上嘅嘢就得咖啦。嗱，咁多年兄弟，我就唔兜圈啦」

「唔知你可唔可以話我知，到底我要點樣做，先可以拎到張韻喬同學嘅電話號碼呢？」





禮謙佢一聽到即刻打咗個突，道「啊喲，原來我地班最聰明嘅高才生林俊軒，居然用咗幾年時間，都冇能力將張韻喬同學嘅電話號碼拎到手！嗚，完全睇唔出你喎，原來你想追我地班，啊，應該話係想追我地學校嘅平民女神啊……？」
 
咩話？！有冇搞錯啊！？林俊軒居然想要我電話，仲要想追我？！！！！啊啊啊啊啊！嚇到我差啲好大聲叫出黎！！

不過張韻喬你要冷靜啊！！上緊堂咖，如果唔係一陣畀老師罰就麻煩咖啦！而且講明先呀，我先唔係咩學校嘅“平民女神”呀！
 
唔通林俊軒佢又……唉，希望佢唔會又好似隔離班甚至其他form啲狗公咁掛住溝我啦。

我一直都只係當佢係同學咖咋, nothing else。但係，點解我一直都咁介意佢騷擾我咖呢？

林俊軒繼續頹樣回應「唉，我都唔知啊。之不過，其實我都已經攞哂全級女同學嘅電話號碼啦，依家就差張韻喬佢一個，我就可以集郵完畢啦啦啦。」

「都已經咁多年啦，而且我地都係同班同學，我都唔明點解用盡任何方法都好，我都攞唔到佢電話號碼囉。」
 
嘩！睇唔出你個死人頭林俊軒，咁厚面皮嘅説話都可以講得出口！！居然已經收藏哂全級女同學嘅電話號碼！！！





真係成績好又靚仔，就可以口花花四圍flirt死女囉，呢個世界公平咩？
 
但係，唔知點解喺聽到佢嘅垃圾計劃之後，第二個反應就係自己嘅身體，突然覺得好唔自在......

（待續 ～）

IG link https://instagram.com/bear_big_big_writer