《愛在。貴族學園》: Ch 0 ~ 序章 Part 2
Ch 0 ~ 序章 Part 2 （連載日期：2021/08/29）
「早晨呀文曦！我地都好耐冇見啦！」媽媽都有同呢位昔日同學打招呼，再同對方黎一個擁抱。
「係啦，真係好耐冇見啦，希洛都咁快咁大個啦！」Ms Fong道。
「係囉，不過以後真係麻煩要你同其他老師，好好幫我睇住我地個麻煩仔希洛。希洛，快啲同Ms Fong打招呼啦！」「Good Morning Ms Fong！」
「乖啦，林希洛同學…」Ms Fong微笑道「你放心啦小喬，我地會幫你同小軒睇住佢咖啦，希洛佢如果有咩大問題，或者犯校規嘅話，我都會第一時間通知你地咖啦！」
「所以呢，林希洛呢六年你最好同我醒醒定定啦！」
「知道啦Ms Fong！」希洛回應道。
「好啦，我同爸爸都要走先，我地仲要送思韻、思喬返學。今晚見啦希洛，記得乖乖地呀！」媽媽再一次吩咐道。
「知道啦，你快啲送埋兩個妹返學先啦，我自己搞得掂咖啦！」希洛回應道。
「小喬，可唔可以順便幫我問候一下小軒，仲有思韻、思喬兩姐妹佢地呀？」Ms Fong 問道。
林太聽完之後就話「梗係可以啦，話哂大家以前都一場同學呀嘛！新學年，都希望你唔會畀啲學生激親先！」
「承你貴言呀小喬！希望可以啦，哎諗起舊年個學生就頭痛啦。不過相對啲學生，有時候家長先麻煩......」Ms Fong對林太抱怨道。
「今年唔會嘅，放心啦。好啦時間都唔早啦，我走先啦，bye！」
「再見啦小喬！」「bye媽媽！」之後希洛就喺Ms Fong陪同之下步入校門，而且仲喺進入校門之後，向車上嘅爸爸同兩個妹揮手。
而媽媽自己就行返去座駕上面。司機好快就將座駕開離學校，向思韻、思喬就讀嘅小學開去。
「老婆呀，時間真係過得快啊可？咁快希洛就做我地嘅師弟啦可...」爸爸喺媽媽上返車之後，就拖起媽媽隻手。
而媽媽就好怕醜，同時望住無名指上嘅戒指「係囉！完全都冇諗過點解時間可以過得咁快咁，總係覺得我地尋日先都仲喺呢度返學咁！」
「Daddy Mammy，你地又諗起以前返學嘅事呀？」思韻用一個天真嘅語氣問佢地父母。
「係呀，大妹。不過我記得嗰陣媽媽你，好似到10月先入黎呢度讀書？」
「係呀，咁我嗰陣時都係轉校生，中途插入去你嗰班啊嘛。」
「但其實我原本間中學都唔係差嘅……」媽媽平心靜氣咁講。
「我知道呀，大坑真光呀嘛！真光妹！」爸爸回應道。
「不過，就算有幾唔捨得原本班同學也好，我都好慶幸契媽都畀我轉咗過黎嘅。」媽媽若有所思咁講。
「點解慶幸呀？我知啦，肯定都一定因為係我啦，哈哈！」爸爸嘅輕佻再一次引來媽媽嘅暴力對待，而兩個細女聽到之後都喺度笑⋯⋯
「林俊軒！你會唔會對自己太有自信、太過自我感覺良好下話！我喺真光轉過黎讀，都係想有一個更好嘅發展機會咋嘛，邊係為咗你呀？！」媽媽非常認真回答。
「至於你啦喎，都有嘅……係囉， Form 5嗰年就係咁畀你呃咗返黎囉......」
「唉！我都唔知點解我當年咁容易就會落你個花心flirt女王叠！依家真係越諗就越唔抵呀死人頭！！」後來仲怕醜到用手遮住自己塊面。
「哈哈，早就冇得你唔抵咖啦，你都已經做咗林太咁耐啦，劉總裁！冇咖啦，你已經返唔到轉頭兼唔可以後悔啦。」林生道。
「不過呢，無論點都好啦，我都多謝你陪住我一世。希望希洛之後都可以喺學校，搵到我地兩個當年嘅足跡吧！」
「相信再過多兩年，思韻、思喬兩個都可以做到我地師妹嘅......」
「而且到時候，希洛已經升Form 3，有個啊哥帶住，佢地應該都唔會有問題嘅！」林生續道。
「知道啦林大狀，都唔明你咁多年點解簡簡單單嘅説話,係都要拖到咁長黎講嘅?你平時喺court都一定係咁浪費client時間啦下話？」林太有少少不滿道。
「冇呀，我點會為咗嗰少少錢，而去做臭自己個名先得咖？拿拿聲做好哂啲嘢，然後早啲返屋企陪下我個小喬老婆唔好？」之後就錫咗林太一啖。
「拿拿拿！你又好似以前咁口花花啦！都唔明已經過咗咁多年啦，點解你都仲可以咁教而不善咖？！」林太面都紅哂咁繼續抱怨，但林生都冇再回應，轉而同兩個女講嘢。
「思韻、思喬，你第日想唔想入Daddy Mammy同哥哥間中學讀書呀？」
「可以嘅話，我地都想啊Daddy，而且我同妹妹都想知道Daddy Mammy喺呢間學校相識、一齊讀書同相愛嘅往事添！」思韻興奮地道。
「哈哈，既然你地都咁想知道嘅話，咁你兩姐妹都要俾心機啦，呢兩年都要考呈分試，不容有失呀，知道未？！」林生再同兩個寶貝女道。
「知道Daddy！」兩姐妹又係一齊回答林生，畢竟思韻、思喬佢地兩個係孖妹黎，所以好多時做咩都會一齊做。
喺送咗希洛返學之後，林太腦中就回憶起中學時代嘅往事，除咗有自己學習嘅回憶之外，
當然仲有同其他同學相處嘅回憶，以及同身邊呢個付托終生嘅男人、認識、相恨同相愛嘅回憶……
（Ch 0 序章 ~ 完）
IG link https://instagram.com/bear_big_big_writer