《愛在。貴族學園》: Ch 1 ~ 中五那年的數學堂 Part 1

Ch 1 ~ 中五那年的數學堂 Part 1 （連載日期：2021/09/01）

腦海一轉，故事返到去兩位主角讀高中嘅年代......

喺香港南區某間廣受上流社會知名嘅直資中學入面，因為辦學嘅團體都係比較有錢嘅關係，於是學校都願意用大量銀彈攻勢，聘請非常有實力嘅老師返黎任教，甚至好高調咁去其他學校度挖角。

同時，辦學團體每年都會大灑金錢，改善學校嘅教學設施。基本上有好多設施都係好多其他學校都未必會有，包括多個練舞室、實驗室，專用嘅室内、室外運動場，全天候恆溫泳池等等，以便同其他傳統官、津名校甚至國際學校競爭。
 
不過，正因學校嘅日常營運成本比較高嘅關係，基於羊毛出自羊身上嘅道理，學校嘅學費自然都比其他直資中學高。





而學校嘅學生都係城中富有家庭嘅子女，最窮嘅都可能住喺中產區。所以呢間學校都被外界戲稱為”貴族學園”。

但係，為咗辦學團體嘅面子，同對外有非常正面嘅形象，學校每年都會邀請部分家境比較冇咁富裕，不過成績非常優異嘅同學入讀，去栽培更多嘅人才。

而學校都會提供助學金去資助佢地，以減輕喺學費同其他雜費方面嘅負擔。

時間好快就黎到九月尾，某一個秋意漸濃嘅朝早，喺Form 5A嘅班房入面，大概有十幾位嘅同學，一齊趕住做數學功課，而班房裏面氣氛非常緊張而且安靜，靜到連蚊飛過嘅聲音都可以清楚聽到。

反而平時講話今日去邊食lunch、邊個邊個明星動向之類嘅八婆話題完全消失。
 




依家距離交功課嘅deadline仲有五分鐘嘅時間，而且今日嘅第一堂就係數學堂，就意味住大家唔可以利用其他課堂，以及小息、午飯時間去完成呢份功課。
 
而正當大家都仲繼續R爆頭唔識計啲題目，因而亂撞答案，甚至9寫steps嘅時候，班房嘅門突然被打開，而同時間全部同學都停哂筆，再將視線集中到門口啱啱入班房嘅女同學度。
 
喔，原來係衆人嘅救星 - 全級考第一嘅張韻喬同學 - 返黎啦！

韻喬返到班房之後，人都未坐低，就已經有三、四個同學跑去韻喬個位度，想借韻喬份功課”參考“，或者對答案。

好彩嘅係，韻喬同學平時喺學校都毫無架子，每每都願意借出佢嘅數學功課畀大家”參考“，外加上天生美人坯子，身材又好，所以喺5A甚至整個Form 5人緣都非常之好。





「你地對答案好啦，唔好下下都借我功課抄呀！」韻喬一邊打開書包將Maths功課拎出嚟一邊講。

「知道啦小喬！不過畀我地借埋今次啦！」一個坐喺附近叫李瞳欣嘅同學回答韻喬。

韻喬於是好無奈咁講「次次都話借埋今次，結果呢？」

「小喬，你咁好人，我地都知道你一定唔會見死不救嘅！唔該你啦！」瞳欣再喺度求韻喬。

「會呀，我會推你去個flirt女王度，你地去佢嗰度慢慢“參考”啦！」韻喬跟住仲嘟埋個嘴，再喺書包拎出自己嘅早餐喺度食。

正因為係咁，雖然韻喬嘅家境一般，但因佢出衆嘅外貌都令自己身邊出現唔少追求者，好多男同學都好想嘗試去追求呢位外貌與智慧都並重嘅超級高材生。

但韻喬對於一衆男同學嘅追求，都冇咩意思，所以基本上咁多年黎，學校都冇男同學可以攻得陷張韻喬呢座冰山，令韻喬喺學校更添一種神秘感。
 
至於點解要將參考兩個字括起，相信大家好都清楚，而且喺學生時代，就算操行長期A+嘅同學，都一定有做過呢樣嘢。





如果有人話自己咁多年黎，完全冇參與過呢樣嘢嘅話，要麽佢喺學校畀人杯，要麽就喺度講大話。所以就算好似韻喬呢一類乖乖女，其實都有份參與其中。

再過多兩分鐘......

（待續 ~）

IG link https://instagram.com/bear_big_big_writer