[愛情] [校園] [足球] 我鐘意左個第一句就講粗口嘅女仔: 45.

我地行到學校門口，我突然感覺到後面有一陣涼氣，另轉頭睇發現係有三條友係後面偷望緊我

係邊個我諗都唔洗我講，就係啊羊啊婆同啊賢呢三條撚樣，佢地扮哂野咁係到傾計，但係就望撚實我係到淫笑。

曉瑩無另轉頭，我估應該唔知佢地嘅存在，學校有兩條路可以行番落地鐵站，左邊就係正常嘅行人路經商場落番去，右邊另一條就係戶外嘅山路，比較多馬路。

正常人通常都會行第一條路，因為商場涼啲之餘仲可以買野飲，正當曉瑩諗住向左轉嘅時候，我拍左佢膊頭一下，「不如我地今日行山路啊？好無啊？」

「下，點解嘅」曉瑩疑惑地問，我見佢咁即刻凹一凹頭扮傻仔咁講「唔知喎！突然好想，你陪下我啦！我都陪你去溫書啦係咪先！」





「唉，好啦，反正我都好耐無行過山路，就成全你一次」曉瑩講完之後就另轉番個身去右邊嘅山路，我心入面即刻＂YES" 左一聲

當我地行到轉角位嘅時候，見佢地三個向左邊行然後見唔到我，好似係到四圍望搵緊我地咁，我即刻行快左兩步，就係咁輕鬆擺脫左呢三隻淫蟲嘅追擊　

係我仲望緊後面睇下佢地有冇跟住我之際，曉瑩突然間叉腰同我講「馬子朗！我陪你行左山路你一陣要同我醒醒定定溫好啲書啊！你再發夢嘅話我實打死你！」

「知道啦！今日係咪得我地兩個啊曉瑩姐」我趁機問佢，「暫時係囉，不過啊朱可能晏少少會黎喎」曉瑩好平靜咁答

＂下，我屌啊，我個二人世界又無撚左啦，上次三個人講住電話溫都算啦....今次仲要現實三人行，玩乜啊＂我心諗





「好啦」我好細聲，帶住少少失望嘅聲線回應，曉瑩都好似無察覺到。

行左十五分鐘左右終於到自修室，入面無乜人得蚊滋仔三四隻，我地求其搵左個角落頭位坐。

「我地今日溫咩啊曉瑩老師」我扮乖學生咁樣問曉瑩，曉瑩聽到我問之後拎左本數學嘅練習薄出黎然後講「那！今日就係比你重考嘅一日！」

仆街又係個啲唔知乜乜定律，都唔知讀黎有乜撚用，老實講，我上堂睇到個啲三角形都唔知係乜黎，唔同又真係出到黎做野會用到咩，我又真係唔係幾信。

我探個頭細細聲問佢「如果我重考合格有冇獎勵㗎？嘻嘻」，曉瑩聽到之後諗左一諗，「有！但今次合格嘅標準係高分過我哈哈哈，因為我上次其實都係高你幾分嘻嘻嘻」





「下。。。但係我真係乜都唔識㗎喎，定係你教陣我先啊」我扮慘嘅眼神望住曉瑩

「梗係啦！你覺得我會唔教你直接比你考咁衰嘅咩！？哼！」曉瑩繑住隻手講，「但係獎勵係咩黎㗎」我問

曉瑩托住頭諗左一陣，「啊！就不如用番我地個麥旋風賭注啦！低分啲個個要請高分個個食麥旋風！」

＂我地＂個賭注！？唔通曉瑩已經當左麥旋風係我地連結嘅其中一樣野？佢之後係咪每次見到麥旋風都會諗起我呢哈哈哈哈

＂啪＂突然一聲我個頭感受到前所未有嘅痛楚，因為原來係曉瑩一隻手掌拍左落我個頭到

「仲發夢！係到笑咩啊！？叫左你幾聲都唔聽！仲話要我教你」曉瑩嬲嬲地講

仆街，仲係到發緊甜夢添，唔記得現實嘅我地都仲係普普通通嘅朋友關係...唉

「黎啦！開始溫啦，黎緊呢幾個鐘辛苦你了...」我望住曉瑩唔好意思咁講