[愛情] [校園] [足球] 我鐘意左個第一句就講粗口嘅女仔: 46.

平時見到教科書都會作嘔嘅我，竟然會留左係自修室到乖乖地溫左三個鐘頭，可能係愛情嘅關係吧

係堂上面冇聽到嘅書亦都慢慢咁由唔識變番識少少，雖然曉瑩讀書都唔算係好勁，但佢點睇都應該勁過我。

見到曉瑩開始休息睇電話，我都暫停左手上嘅工作，原來已經八點鐘

「不如去食野囉？今日都溫得差唔多，我都好攰啦」曉瑩突然提出

「好喎！不如去食打邊爐啊？我記得附近有一間！」我突然諗起，一黎我好想食，二黎打邊爐代表可以慢慢食，姐係可以見耐啲嘻嘻





我係到期待緊曉瑩嘅回覆，佢諗左一陣之後講，「好啦！不過食完之後你要陪我食糖水喎！」

「好！殺你」我笑住大聲咁講，仲有糖水食姐係仲有得見耐啲，呢個買一送一實在係求之不得

正當我講完呢句野之後，曉瑩突然間拎著佢隻手封住我個嘴，「喂！呢到自修室黎㗎！你咁大聲做咩啊」佢細細聲咁講

我塊面好紅好紅，曉瑩呢個舉動好突然同有啲親密，呢次應該係我地兩個暫時最親密嘅接觸，所以我塊面紅之餘，感覺到自己嘅心跳已就快要快到爆炸。

曉瑩塊面亦都紅左，亦都發現佢下意識咁放左隻手上黎，佢縮番手之後我地大家都冇再講野，唔知係氣氛尷尬定係仲係自修室關係。





我地各自執完野就好快離開左自修室，出到黎外面大家先敢講野

「頭先你塊面好紅喎，係咪知道自己柒左所以怕醜呢～」曉瑩出到黎第一時間講

死啦原來佢發現到，「你咪又係好紅！我柒左就話怕醜姐，咁你點解又會面紅呢黃小姐～」我反問番佢

我咁樣問佢唔係想笑佢，係想知道佢面紅嘅原因係唔係同我一樣。「咁我同你一齊坐㗎嘛！你大聲左我都會尷尬㗎！好心你就唔好咁大聲啦，搞到我勁驚啊！」曉瑩停左一陣然後講

如果佢真係純粹覺得我同佢一齊，所以我唔小心大聲左佢都會尷尬，而唔係岩岩嘅動作的話，我估佢對我都可能仲係朋友嘅感覺？定係向好啲咁諗佢唔抗拒對我做呢啲舉動？





一時三刻真係未可以肯定到，不過算啦活在當下就好了，起碼呢一刻係佢隔離嘅係我，可能咁諗會好啲。

「唔好嬲啦！對唔住囉嘻嘻」我扮可愛咁道歉，「好啦！今次就放過你啦」曉瑩好溫柔咁講，但講完呢句之後即刻變面　「不過，糖水你嘅！哈哈哈」

「好啦好啦，就當係我柒左拖埋你嘅懲罰啦」我講完之後心諗＂其實都幾抵啊？一餐糖水可以換到岩岩嘅待遇，我比多三餐都好撚抵，哈哈！＂

打邊爐嘅途中除左我地一食住一路講「嘩呢個好好食啊！」之外，都冇特別事情發生，都係講下學校嘅大小事，同埋我講下我同足球隊啲野咁。

「話說你知唔知啊婆之前係我小學嘅補習班嘅同學黎㗎！佢細個好曳㗎！」曉瑩聽到啊婆個名突然間醒起

「咁佢依家都唔係乖得去邊姐，都係傻傻更更同我差唔多咁」我講

「哈哈哈，咁佢睇黎都仲係好曳喎～」曉瑩望住我講，「做咩咁望住我先！姐係你講我都好曳啦係咪！」我問

曉瑩諗都冇諗就點頭答「係啊，你好曳！所以要懲罰你請我食糖水，行啦嘻嘻！」





食完糖水之後，我就好似平時咁送曉瑩番樓下，佢都好似已經習慣左咁。

「係喎！你係咪過埋個考試就繼續學界啦？」曉瑩突然問起，係喎我都差啲唔記得左，「係啊，過埋個考試就可以解放全程投入踼波啦！耶！！！」我答

曉瑩聽到之後個樣有啲唔自然，然後講「你啊～你知你岩岩傷完㗎啦...你要睇住你隻腳黎踼啊」

「放心啦！我狀態已經番緊黎！我地今年一定會嬴！」我拍拍心口同佢講

「咁你嬴左嘅話我就請番你食糖水啦～！」曉瑩聽到之後個樣都冇變好，「做咩個樣咁啊！你放心喎！我發毒誓我應承你我會完全好番㗎啦！如果唔係嘅話我就再傷多一呃呃呃呃」

我未講完句野曉瑩又再用手封住左我個口「唔比講啊！好啦我信你啦！一定要嬴喎！」佢好似小朋友一樣期待住有糖食嘅眼神望住我，好靚，好得意

講到中途我地都行到佢屋企樓下，開心嘅時間又過得特別快





「知道啦嘻嘻，到時送埋個獎牌比你影相都仲得！」我答佢，「我好似二月尾就踼啦！今日係幾多號？」我問佢

「今日係二月十三號！啊唔係喎，過左十二點係十四號啦喎」曉瑩望住電話咁答

二月十四？今日原來係情人節，好彩過左十二點後先要離別姐！雖然聽日都有得係學校見

「好啦咁新一日就祝你二月十四號快樂啦！」我嘗試好婉轉咁同佢講情人節快樂

曉瑩好似仲未明我講緊啲乜然後問「咩啊！？我日日都好快樂㗎喎！你好唔快樂咩？」

「唔係啊！我好快樂啊，總之就二月十四號快樂啦！拜拜！」我推左佢入大堂門口

曉瑩都冇再追問就同我講左拜拜然後上左樓，完全唔記得原來過左十二點係情人節，我諗我咁樣表達都已經係最好，畢竟對我黎講所有野都係未知數

總有一日，我會堂堂正正同到你講 ＂情人節快樂，黃曉瑩＂