[愛情] [校園] [足球] 我鐘意左個第一句就講粗口嘅女仔: 44.
第二日番學老師已經開始派緊Past Paper比我哋，建議我哋係考試之前做哂佢
好老實講，中學生涯我都未做過一份試卷，之前嘅考試都係臨考前一日溫，背下小小書就直接考
前兩年都好好彩咁試升到班，因為我都唔係最差個班人，不過每年嘅年尾都要提心吊膽咁去過，每年嘅最後就係每日留意留班嘅名單有冇我份
今年其實本來我都打算咁，但係經過尋日呢件事之後我諗呢個機會就難少少。始終都應承左曉瑩，無理由放佢飛機㗎
過多左兩日之後，足球隊訓練完之後我係電話就見到曉瑩嘅訊息 7:40pm (llwhyll) : 星期五，放左學之後係xxx圖書館隔離嘅自修室，我同你放左學一齊行過去！
星期五…好似冇野做，我係電話到回覆 8:02pm (mtl1018) : 好啊，我個日唔洗練波。
其實我星期日有比賽，我諗前兩日當做休息下都得嘅，反正練左咁多日狀態都已經番左黎
「喂牙朗！行啦仲坐係到做咩」覆完手機之後就已經比啊行叫走左離開球場
「嘩，我哋而家呢個狀態，睇黎下一場我哋應該想輸都難」啊婆自從傷癒好之後就好有自信
「真係喎，我哋今年仲係細B，如果我哋下年夾埋啊希佢哋，我地應該拎硬冠軍」啊行附和
啊希係我哋今年大C grade嘅其中一員，佢亦都係全隊波唯一嘅左腳仔
啊羊聽到之後亦都好冷靜咁同大家講「咪諗住下年先啦，踢好黎緊呢一場再諗之後嘅賽事」
佢嘅角色係足球上就好似我地第二個教練咁，佢所講嘅野同諗嘅野比我地都更加成熟。我地聽到之後都好快比佢所講嘅野暫停左未來嘅諗法，始終打贏左下一場先會有之後嘅賽事
「係囉，踢好下場先啦！首先啊賢唔可以再咁樣比人過左先囉，哈哈哈哈」我特登向住啊賢講呢句
「收皮啦！我唔同啲踢唔到全場嘅人講野嘅！屌你！」啊賢聽到之後都好快反擊我
呢啲係我地五個嘅溝通方式，雖然外界聽到我地咁樣串大家同鬧大家會覺得影響到友誼，但係我地呢個溝通嘅模式係我地鼓勵大家嘅方法。
當我地比對方串親嘅時候，就係我地激發我地想進步嘅動力。就好似今日比啊賢串咁，會令我更加想練好自己等我唔洗再比佢串我踢唔到全場。
我估啊賢比我串完番去都會好好練下防守，雖然我諗唔需要我串佢都會咁做。
「嘩屌，仲有兩日就比賽啦，估唔到踢完一場之後都仲會緊張」我上堂前同啊羊係班房講
今日已經係星期五，亦係我放左學要同曉瑩去溫書嘅一日
曉瑩呢個時候已經坐係自己嘅位到，我亦都坐番左埋位，坐左無十秒曉瑩已經係後面拍我「馬子朗！你記唔記得我地今日有啲咩做啊？」
我嘗試扮傻睇下佢有啲咩反應「下？今日有啲咩做啊？上堂囉！」
曉瑩好似真係以為我唔知，諗住提醒下我「放學呢～我地要去邊啊？」
「哦！練波囉！你係咪想睇我練波呢～！」我再答
「喂也！我地今日放左學要去自修室溫書啊！你唔係真係唔記得啊嘛！」曉瑩開始皺眉頭語氣嬲嬲地咁講
算啦，雖然唔知佢係真嬲定假嬲，都係唔好再扮傻啦
我拍左一拍曉瑩個頭講「傻瓜！我記得啊！放學後啊嘛～我地係課室呢到等？」
曉瑩亦都拍番我個頭一下，不過好撚大力「哼！仲等你係到扮野！拍醒你先哈哈哈哈」
＂叮噹叮噹，叮噹叮噹＂放學嘅鐘聲響起，我最後個堂實在係太眼訓，就算老師走左我都仲訓緊
「喂！柒頭星期日比賽啦喎，不如今日....」啊婆同啊賢落左堂都好快過左黎我地課室
「係囉！我地五個都好耐無決戰過街場啦喎，不如去踢下啲街場友誼波當做最後訓練呢？」啊賢講
啊行同啊羊聽到佢地講野都行左過黎「咁就不如行啦，一人一對白飯魚直接走起」啊羊好快就講
「但係我今日約左女神BB豬去溫書喎，不如聽日先啦...」啊行好細聲係我地五個面前講
啊婆聽到佢咁講突然好激動「屌，咁唔好理佢啦，我地四個去啦！朗，起身執野走啦」佢嘗試拉我起身
仆街，曉瑩仲係後面聽住我地講野，但我又真係好想踢波，難得可以齊人街場，唉...點揀好
我另轉面望左一望曉瑩，佢嘅眼神雖然好似好溫柔，但佢笑得好唔自然，仲好似有啲奸。
唉...始終都有約在先，睇黎我又要忍痛割愛多一次 「唉...都唔係真係齊人，聽日啦不如！啊行聽日得唔得閒啊」我無同佢地講我今日其實唔得閒，但係見在啊行已經講左先，就用黎做藉口
啊行講「得啊，不如聽日啦，最多我地唔用全力踢嘅姐～」
「就咁話啦！我地聽日再去，照舊十點老地方等？屌唔屌？」我問佢地
「唉好啦...大家聽日都得㗎啦！咁聽日先啦～今日就放過你」啊賢指住啊行講
「好啦，咁我走先啦，大家聽日見」我首先拎起書包企起身講
啊婆見到我咁樣同我講「下？你今日自己走咩？」因為佢平時係同我一齊走，但今日見到我咁樣有啲突然
「唔係啊！唔講啦聽日見啦！拜拜，喂行啦！」我嘗試暗示後面嘅曉瑩
曉瑩都好識做好快跑左出黎跟係我後面行，佢地四個見到呢個畫面都突然好激動，好似有啲嬲嬲地咁想行過黎
我一枝箭跑左出去，佢地都無再追我，大聲講左句「屌你啦馬子朗！正撚樣！」
就係咁，我同曉瑩行左出課室，踏出左校門準備前往自修室嘅路上