[愛情] [校園] [足球] 我鐘意左個第一句就講粗口嘅女仔: 43.

「喂！馬子朗！你有無聽到我講野㗎！？」曉瑩突然好大聲咁講

我地已經溫左兩個鐘頭到，但其實呢兩個鐘我講嘅野兩隻手都數得哂

你問我點解？明明有得同曉瑩講電話喎，仲會唔講野嘅咩

呢兩個鐘就真係同內容一樣，溫書，溫書，同溫書。一直都係曉瑩問緊啊朱關於考試上嘅問題，然後啊朱就會用好＂溫柔＂嘅語氣答佢

到我問嘅時候，雖然佢都會答我，但聽得出佢答曉瑩同答我係完全唔同。三人行嘅我已經無哂癮，我寧願退出個群組通話自己溫好過，但同時我私心亦都唔想曉瑩同其他人二人世界，係我自私唔想見到咁樣先一直留住自己係到。





但長時間我都係發緊呆，溫書嘅進度係一個鐘頭先學到一個概念到。

「有有有！我岩岩太入神溫緊野先無聽到你講野！Sorry！」我扮住傻笑咁樣講

「哼，都唔知係咪㗎，我話不如我地搵一日約出黎溫書啦！好似咁樣會比依家更有效率」曉瑩好似有啲嬲嬲地咁講

「呃，但係我唔知會唔會撞到學界同練波啲時間喎...我再睇下點啦」我雖然係好想見到曉瑩，但係我確實唔係太想三人行

再過多左一個鐘，大家都開始攰，曉瑩亦都提議今日就係咁多，聽日大家再努力過。





「好啦，咁我走先啦，有啲眼訓，啊媽都催訓教，拜拜！」啊朱首先講

佢講完之後都離開左通話，淨番我同曉瑩兩個，雖然我估佢都差唔多訓

「咁你係咪都要走啦？早啲休息啦！」我率先問曉瑩

「我....未啊！不過溫左咁耐都有啲攰，想抖下煲下劇嘻嘻」曉瑩原來都未眼訓 

「咁好啦！咁我唔阻你？我都走先啦」其實我心情都唔係咁好，同埋我估曉瑩都應該想要啲自己嘅私人時間





「呃...咁啊....好啦....」曉瑩聽到我咁講好似突然有啲失望咁　「唔係！等陣先！我考你今日三條問題，好簡單㗎咋，如果你答唔到其中一條，你就要同我出去自修室溫書！」

我突然比佢呢句野嚇親，因為我都唔知聽到係開心定唔開心好，就算我識晒，我都唔知答唔答岩好。。。

「黎囉！驚你啊！」聽左先囉，又唔會有啲咩事嘅...當時我係咁諗

曉瑩聽到之後都開始問問題　「好！第一題....我地今日溫嘅係咩科！？」　嘩屌，佢係咪真係當我弱智...如果三條問題都係咁嘅話我分分鐘唔洗去

其實我想唔想去呢？我同時又好想去但又唔想去，原因好簡單我都唔再重複

「數學囉！」我好輕鬆咁答曉瑩　「好！第二條問題！請講出今日我地學左嘅兩個數學公式！」曉瑩再問

雖然我係發緊呆，但我都唔會蠢到唔知啲公式叫咩名嘅，雖然我就真係唔太知點用....

「因式分解！同埋指數定律！曄你啲問題咁簡單，睇黎你唔想我陪你去溫書喎～嘻嘻」我開始得戚串串地咁講





「哼，最後一題你肯定唔識！你依家睇我電話比你嘅題目，我比兩分鐘你解，如果你兩分鐘都解唔到嘅話就當你輸！」曉瑩都無比我串到，反而好有信心咁講

＂叮！＂電話響起，題目係有條好多唔同數字同英文嘅題目，老實講，我真係完全睇唔撚明，唔通個天都要我去...唉

11:34pm (llwhyll) : Factorise  4(x+y)2 – 28(x2 – y2) + 49(x-y)2

我嘗試上網搵呢題答案，但我連個啲次方我都唔撚知點打，仲有個啲XYZ都唔知係乜撚黎，明明係數學點解無啦啦又括號又英文

努力左兩分鐘之後，最後我都係搵唔到個答案，我無講野直至曉瑩完左個計時

「夠鐘！馬學生請交卷！」曉瑩用老師嘅口吻咁同我講

「呃...我白卷啊....你比時間地點我啦都係....」我無奈地答佢，曉瑩聽到我呢句之後好大聲咁樣笑我，然後同我講「哈哈哈哈傻仔！我自己兩分鐘都解唔到啊哈哈哈哈！」





我屌....「下！咁樣唔算數喎，你自己都解唔到....唔公平，我要求重考！」我一邊笑住一邊講

「哈哈哈哈，我唔理啊你輸左！你要重考嘅話就出黎面對面溫書嘅時候考啦！」曉瑩仲笑緊...

「好啦，你再同我講幾時去啦....屌...比你玩左次」我抱住複雜嘅語氣咁講

曉瑩聽到之後都好滿意　「就咁話啦！我遲啲再比時間地點你，唔好唔到啊！我差唔多上床攤啦！聽日見啦～」

「好啦，早啲休息！拜拜～～」睇黎我都係逃唔過呢個命運