[愛情] [校園] [足球] 我鐘意左個第一句就講粗口嘅女仔: 41.

羅x中學嘅球員係我地換人嘅期間行左埋去教練到聽左二十秒到嘅指令，佢地都換入左一個高高大大嘅9號仔。

上到場之後原本羅x中學打右翼嘅換左去左翼，而9號仔就代替左佢右翼嘅位置。

界外球由佢地中圈位開出，右閘一個手榴彈式嘅掉波一野掉左落我地防線嘅後面，我地嘅左翼同左閘就算跳起都唔夠高頂。呢個時候，9號已經出現左係我地防線嘅背後，開始推波進發，好似完全知道呢件事會發生一樣。啊賢一直跑住跟緊9號，可惜佢嘅速度實在太快，如果要比分分鐘快過我同啊行。

9號係右邊嘅禁區外開始推入大位，啊賢亦係呢個時候追到，令到佢至少唔係單刀，一打一嘅情況下，我認為啊賢係唔會輸。

啊賢首先擺出一個四十五度角嘅身軀面向佢嘅姿勢，等待緊9號作出任何反應。當9號仔一推個下，"嗖" 一聲直接用速度推過左啊賢兩個身位，就算啊賢想拉住佢都已經拉唔到。個一下直頭係快到有職業嘅水準，無一個人係擋得住。我係後備席望到亦都放大雙眼，O撚哂嘴，唔敢相信我當時唔係發緊夢。





龍門見狀亦跑出黎嘗試阻止射門，好可惜係龍門出黎嘅第一時間，9號已經係佢出黎嘅瞬間挑起左個波，龍門完全無為意到佢會凹，慢慢彈左入網。一比一

我見到球入球完全比唔到反應，因為呢球實在太靚，我地係戰術上同個人能力上都唔知點應付呢一球。聽到旁邊林sir亦讚歎左一句＂嘩，有無咁靚啊＂，然後鼓勵番我地隊嘅球員

啊賢亦都企左係到，完全比唔到任何反應，我估佢係第一次比人咁樣過，仲要係一打一。

「喂！未輸㗎，繼續啊！」我大聲叫左出黎

啊婆亦係中場線番左後場同啊賢講左幾句野，雖然我聽唔到佢地講左啲咩





9號無慶祝而係好快係網入面拎番個波出黎放係中圈，示意緊佢地係黎贏而唔係淨係想追平咁簡單。

＂嗶＂係我地真誠中學嘅開波，我地嘅士氣的確比岩岩個球打沉左少少，見到佢地都開始踢得唔太自信。

一直去到最後兩分鐘，雙方嘅攻勢都愈黎愈多，大家嘅犯錯都一樣。啊婆係中線成功搶奪對方嘅傳球，開始引球推進，對方亦已經上哂前場，番唔切黎防守。

啊行亦都一支箭咁跑左最前，同前鋒一樣等緊機會。啊婆傳左去右邊後備入替嘅啊為，啊為前方淨係得一個防守球員，只要過到我地就有三打一嘅黃金機會。

啊為呢個時候選擇左係有防守球員面前底下傳波，可惜一個撻Q傳左個波比羅x中學嘅後防，呢個時候我地嘅中場防中都已經上哂前場，相反對手嘅中場仲係我地嘅半場。

羅x中學4號一腳大斬，斬中比左佢地嘅進攻中場7號，由於啊賢防緊9號，佢已經無人看管，攞定左個波仲有好多空位同時間諗。已經推到禁區外，7號已經準備好拉弓嘗試遠射。

呢個時候啊羊已經番到黎嘗試阻擋佢嘅射門，突然一球完美嘅直線由7號交出，比嘅正正係啊賢防緊嘅9號。

再次係一打一嘅狀況，坐係後備席嘅隊友已經垂低左頭唔敢再睇。淨番我一直望住啊賢，因為我覺得佢唔會再輸，9號拎到個波一樣想好似頭先入波個球推過再射，同樣嘅情況再次發生，啊賢亦都係比佢推過左一個身位。

＂澎！＂9號嘅射門今次好大力，唔似上球咁想凹過龍門，啊賢飛身一鏟好似改變到少少方向，但望落射門仍然中龍。

「頂住啊啊啊啊啊啊！！！」我再大聲叫左一聲，希望奇跡嘅出現。

＂Pung!！＂呢球好好彩地中柱彈出左係十二碼點附近，正當7號想上黎補腳嘅時候，啊羊已經一腳大腳清走。

＂嗶....嗶......嗶嗶......." 球證吹雞示意完場，最後一比一完場，我地B Grade嘅第一場就以和局終結。

我跑左出去搭住啊賢，因為岩岩個球致命嘅射門佢封住左。「好波啊賢哥，真係唔叫番你聲賢哥唔得！」我講

「行左去敬禮先，一陣再講，我好撚攰」啊賢一路抖氣一路講

「多謝指教」我地全足球隊一字排開同對手羅x中學嘅教練鞠躬

羅x中學嘅教練而都滿臉笑容，然後講「真誠中學，我會記住你地，好少學校可以同到我地踢得咁不相百仲，希望我地係決賽再次見面。大家都好好波，由其是你啊4號仔，唔係有咁多人防得住我地樂仔㗎」

唔知呢一句係讚美定係諷刺緊，不過啊賢聽到呢一句之後企左上前同教練講「我下次就唔止淨係封佢射門咁簡單，決賽見」

其他人聽到呢句野之後都好似覺得啊賢係唔係上左頭，敢同對方教練講埋啲咁嘅說話，即刻立番啊賢落黎

「哈哈哈，好！4號仔我欣賞你！我都會叫樂仔加強啲訓練，期待你地下次嘅對決」教練好似無被冒犯到，反而比岩岩笑得仲大聲咁講

我地番到去比林sir訓話左一輪之後大家都開始執野走，因為今日係星期六，所以我地五個決定去食個野先再番屋企。





「嘩，啊賢你岩岩個球真係好撚型啊！咁都擋到！」我等緊飯到嘅時候攬住啊賢講

「真係，仲有好彩啊羊及時清得切球波咋，如果唔係我地都係會輸個球」啊婆認同

啊賢呢個時候企左係身，豎起兩隻手指然後講「我xx賢，唔會輸比同一個人,Twice」

「屌你你估你係京一咩柒頭，收番埋啦，你差啲輸㗎啦」啊行即刻講　

呢個時候我地嘅野食都上齊哂，大家比賽完都好肚餓。見到野食之後大家都無再講野，全部人都好似飢餓左成年嘅猛獸一樣，開始狼吞虎嚥。

「但係我地個球入波其實真係好靚，我唔係讚緊自己，但係個下配合真係超靚」啊羊食到中間突然間咁講

「唉如唔係牙朗比人換走左，我地都唔洗要啊賢擋個球，分分鐘連波都入埋」啊婆有啲不憤咁講

我都失望細細聲地講「唉，我都想仲係場上面，如果我當時未換走的話，我都幾肯定我一打一會過到對手。啊為嘅打法太驚，可能佢未適應打比賽掛」





無辦法啦，如果我仲係場，有機會拎哂三分嘅係我地而唔係互取一分。不過無辦法啦，唔黎嘅都黎左，好好放眼未來下一場嘅賽事

「你下場出唔出到全場啊？我唔想再好似今日咁又要打和，反正下場仲有成個禮拜，快啲拎番好個狀態踢全場啦」啊行問我

啊行講得岩，最緊要係自己復原得到，比林sir知道我係踢到全場，依家拎得番狀態先係最重要嘅事