[愛情] [校園] [足球] 我鐘意左個第一句就講粗口嘅女仔: 40.

「你估我地今年呢班細B有無得入決賽啊啦？」啊婆係比賽路上嘅巴士問

啊賢聽到之後即刻係架巴士到企左起身「咩決賽啊！我地拎埋冠軍添啊！！Wohoo！！」

「喂坐番低啦！一陣撞死無命陪比你屋企人啊大佬」林sir見到我地成班人好興奮之後大聲講

無錯，今日係我地B Grade嘅第一場學界，我亦都傷癒得七七八八，比賽前嘅最後一次訓練亦都同林sir傾好左：頭一兩場有正選但無得打哂全場

對手係羅X中學，係呢個區域黎講算係不過不失嘅隊伍





「其實你估我地今年有無得贏」我問坐我隔離嘅啊羊

「唔好話我卑觀，但我覺得我地下年先係我地最強嘅時候，今年我驚連分組賽都出唔到線」啊羊嘆左聲氣然後講

我拍一拍佢問「下，點解呢？但我地係夠班大B踢㗎喎」　「就係因為連我地班細B都夠大B踢，所以先覺得好危險。你諗下，我地夠我地自己啲大B踢姐，唔代表夠人地個啲踢㗎嘛」啊羊加以解釋

其實啊羊講得的確無錯，不過我唔想我地開波前士氣就咁低落。「唔好咁啦，我地實夠踢嘅！點都會拎個冠軍番黎嘅」我搭住啊羊膊頭講

啊羊係我地隊入面最有天賦嘅一個球員，傳波，射波，速度，全部都有。所以佢咁樣諗法某程度都影響到我少少。





「係喎，話說個日你地一齊番學之後個日點啊，有無啲咩進展？」啊羊已經轉左話題講緊我嘅野

「無啊，咪又係咁，之後都無再一齊食過早餐啦無一齊番學啦。不過係學校有傾多左計嘅，電話都有多左訊息嘅」我頭擰番轉個頭望向窗嘅方向講

啊羊好似聽到我講呢句說話嘅時候語氣有啲失望「唔好比你依家嘅心情影響到你一陣嘅表現就得㗎啦，球場外嘅野唔好放係球場內」佢講

「收到你啦，你幾時變得咁成熟㗎」我問

「起，我都係講下姐我見平時啲教練都係咁講咪試下囉哈哈」啊羊摸住頭尷尬地講





－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－

「今場打四四二，陣型同上次練波講嘅一樣。記住今年你地比較多細B，可能體格上會有啲吃力，所以你地要靠多啲跑動令到你地多啲空位製造攻勢」林sir係開波前同我地訓話

＂嗶嗶！！＂球證亦示意球賽開始，我亦係右邊開始跑動。

過左半場大家都互有攻勢，但大家都未能把握到，暫時零比零進入中場休息時間。

「防守個到係咪發緊夢啊？點解可以咁樣比人比穿到個球㗎？」「中場！你地要波同比波都出多句聲啦，全部都無人講野，好似死左人咁，咁點樣知道邊個要邊個唔要啊？」「前鋒個到，暫時可以落黎多少少幫下波，有時走得太前可能中場個波都未做到就比人打反擊」

「我地仲有下半場，我知對手可能係比我地身型上佔優勢，但係我地唔係唔夠踢，比多少少力，每人出多句聲我地實贏」林sir係中場休息嘅時候同我地講嘅野大概就係咁多

＂子朗，你踢多十五分鐘得唔得？＂林sir係我臨出球場前問

「我當然可以啦」我答佢





下半場嘅賽事正式開始，大家嘅士氣亦係林sir嘅訓話後更加高漲。

六十五分鐘，啊婆拎住個波係中場開始推進右手邊，我見到佢嘅眼神後我立即係由右邊切入中間

一個靚嘅直線由啊婆直接打穿係我腳前，我係靠右邊嘅禁區頂拎到個波，前方仲有兩個防守球員，我先推右走左推過一個直落底線，仲有時間比我望住比

上左前面嘅啊行已經幫我引開哂兩隻中堅，禁區峨嵋月頂嘅啊羊空哂，我片左一球平飛嘅地波直落啊羊嘅腳前

啊羊諗都無諗，控都無控就一腳射埋去，力量非常之大，＂澎＂一聲直飛死角。一比零

啊羊入波之後立即跑過黎我到慶祝「Yes!!，好波啊啊羊」我同佢拍左下手然後講

其餘嘅隊友都一一跑上黎攬住啊羊，最興奮嘅係啊賢「嘩！！！好波啊，準備好贏啦我地wohooo!!!」





我地都番左自己嘅半場，對手亦都好快開左波

係七十分鐘嘅時，係一球界外球之前，球證指示換人調換。我係換人板上面見到二十一號，亦都係我嘅號碼。

我慢慢跑番去後備席，換入左代替我打右翼嘅啊為。「好波啊，岩岩個球無你嘅話都唔會入，好好唞下啦」林sir拍一拍我背脊講 「好波啊子朗，岩岩個球真係配合得好靚」羅sir亦有讚揚我

我行番去嘅時候一直睇緊場波，心入面希望隊友可以頂住。正當我仲行緊去後備席同隊友拍緊手準備坐嘅時候，無諗過呢件事發生左...