我次次拍拖都拍唔長，因為我……: 女鬼篇
阿謙講到好激動，面紅耳赤手握實拳頭，現晒青筋想殺人咁款，Emma嚇到手忙腳亂，不知所措咁講「你...冷靜啲，聽我解釋啊」
阿希都嚇到畀唔到反應，可能佢都係第一次見阿謙咁嬲，不過都好難怪阿謙咁嬲嘅，呢單嘢差啲搞出人命，Emma的確係唔抵幫，但宜家最緊要係平伏咗阿謙嘅心情先，我話「阿希你講啲嘢緩和下個氣氛先」阿希下意識地搭住阿謙緊握拳頭嘅手話「你冷靜啲先，唔好咁激動，你啱啱先好番，咁樣對你身體啱好㗎」
由佢一搭住阿謙隻手果下，阿謙就好似即刻通咗陰陽眼，仲帶住疑惑咁望住我，我當時企咗係床尾，之後又望咗眼企係隔離嘅Emma,佢指住我問「小姐你係邊位？」
睇嚟佢見到我係到好似冇咁癲，可能有生保人係到，我話「我係阿希嘅朋友，見你病情好番所以同阿希一齊嚟探病」佢收歛地咁話「哦，係啊...」
Emma知阿謙見到佢之後即有話「sorry啊
搞到你咁係我唔啱，係我對你唔住，之前係我任性，想你以後都可唔可以陪我，但我知錯喇，聽完阿希嘅說話，我都覺得愛一個人係唔應該咁自私，係應該要學識放手，我以後都唔會再傷害你.....我會盡快投胎唔會再騷擾你，我只係想係我離開你之前，可以見到你最後一面，同你好好道別」阿謙靜咗落嚟，冇再埋怨Emma,仲眼泛淚光咁望住Emma，睇嚟佢嘅怒火都熄滅咗，Emma烏低身攬住阿謙，兩個人都冇再出聲，只係攬住對方係到喊
眼淺嘅阿希都睇到喊，睇嚟呢個係大團圓結局，雖然兩個人以後都唔會再起埋一齊，但阿謙都放低仇恨原諒咗Emma,而Emma都選擇放手，睇到呢個情景我諗緊，到時我遇番阿聰會點，會唔會好似Emma之前咁，陷害阿聰要整死佢，定選擇原諒唔再嬲阿聰，我都開始糾結緊，我將來應該點做