我次次拍拖都拍唔長，因為我……: 家姐篇

今日星期六，按照同細佬嘅約定，我哋會去某間茶餐廳食晏，到時再扮遇到聰哥叫佢一齊搭枱食飯，細佬今朝早都番咗屋企，同我哋一齊出發去食飯

時間約十二點半，我哋到咗餐廳，一眼就見到聰哥坐咗係餐廳中間嘅圓枱，我即刻扮嘢話「譚sir,好耐冇見喇，又會咁啱係到食飯嘅」聰哥話「咦，Gigi，好耐冇見喇喎，最近點啊？」

我話「幾好啊，譚sir 你係咪自己一個食？不如一齊坐喇？」聰哥點頭話好

我隨即扮嘢同細佬老豆講「佢係我中學嘅阿sir,呢排都退咗休」老豆見到聰哥都即刻打招呼話「你好啊，譚sir ，我係Gigi 老豆，多謝你以前對阿女嘅照顧」睇嚟橋唔怕舊，老豆都信聰哥係我老師，一啲都冇懷疑過，仲放低戒心同聰哥吹水

佢話「係呢，譚sir,你教開咩科？」聰哥話「我教開體育」睇落都似嘅，聰哥黑黑實實，佢哋一路都有傾吓計，大家食飯果陣言談甚歡，之後老豆仲話「呢餐我請喇，當多謝你中學時照顧阿女」之後大家食完飯之後就分開咗，我哋就番咗屋企，聰哥扮有嘢做走先





我隨即signal 問聰哥「點啊？知唔知我老豆係咩事」

聰哥覆「佢應該係中咗情降，姐係有人怕你老豆有桃花，落咗降影響佢嘅異性緣，其實比起好多降頭嚟講，呢種又唔算嚴重，但當你老豆接近啲女同事或朋友時會令你老豆性格有變，可能會性格暴躁，令異性對佢反感」

我話「咁點算好，要點化解？」聰哥話「我遲吓會畀啲嘢你，係由符磨成嘅粉抹，你要加入佢嘅飲品或湯到，總之佢要飲晒啲粉，另外為咗令你老豆唔再中降，我會畀件開咗光嘅玉石你，我將佢整成咗做一件飾物，你睇下有冇方法勾落你老豆啲鎖匙或銀包到，可以畀佢旁身」

佢都諗得幾周到，知我老豆唔信呢啲嘢，所以諗定所有安排，不過最令我費解嘅係，到底邊個要落我老豆降，佢咁做又有咩動機？為咗搵出真相，我決定查下究竟係咩一回事