我次次拍拖都拍唔長，因為我……: 阿希篇

琴日畀大叔嚇親，突然間將我推倒仲做埋啲咁曖昧嘅嘢搞到我成晚都訓唔著，個心囉囉攣，唔知呢啲算唔算係另類表白呢其實我有啲暗爽，第一次見到呢個玩世不恭嘅大叔咁緊張，驚我畀人搶咗咁，咁睇嚟都唔係我一廂情願咁暗戀佢，亦都證明咗佢係鍾意我，不過家姐睇嚟好唔鍾意大叔，如果我同佢講我同大叔拍拖，佢一定好大反應

我一路行去醫院一路諗緊呢啲瑣碎無聊嘢，突然間阿儀同我講嘢，將我由幻想中抽離番現實，佢問「阿謙係咪轉咗病房？」我話「係啊，佢病情好番，轉咗去八樓普通病房」

我哋一齊搭𨋢上八樓，搭搭吓又見到上次果個搭順風𨋢嘅阿伯，佢認得我仲同我打招呼話「早晨啊，今日咁早嘅」

我點頭微笑話「係啊，朋友就嚟好番出院喇」佢話「咁咪好囉」我話「你去邊層？」

佢話「我老婆整親骨折，我宜家成日係骨科陪住佢，間中又落去樓下同啲朋友吹下水」去到三樓佢話「我到喇，走先」





眨下眼部𨋢都到咗八樓，我去到阿謙嘅病房，當時佢冇閂房門，我見到伯母係入面，Emma都企咗係阿謙隔離，伯母見到我話「早晨啊希仔，入嚟啊，我宜家會落樓食早餐，你哋慢慢傾喇」每次伯母都好識做，會畀空間我同阿謙單獨傾偈

我入到去話「點啊，睇你面色都好番好多」阿謙話「係，做完手術都精神番好多，而且好彩地身體冇排斥屍肝」

我話「有啲嘢我想同你講....雖然你未必相信」佢眼神帶住疑惑咁問「咩事？」我話「其實我有陰陽眼，我一直見到Emma係你身邊，之前你昏迷果陣，我有同Emma溝通，佢話有啲嘢想同你傾」

阿謙聽到後冇好驚訝，反而好冷靜咁話「原來上次唔係我發夢，你哋所講嘅嘢係真...」我話「你聽到我哋講嘢？」

佢話「係，我病到昏迷果陣隱約聽到你嚟咗，仲係我隔離講嘢，我仲聽到Emma把聲，我仲以為自己出現幻覺」無諗過阿謙竟然會聽到，仲要聽到Emma講嘢，咁佢咪知道自己女朋友想殺佢死喇，呢下我都唔知點兜好





佢繼續講「我都冇諗過我最愛嘅人竟然會害我，平時佢點任性，點公主病都好我都會包容佢，佢仲好意思見我？知唔知醜㗎，你啊，宜家係咪係我隔離？係嘅唔該你即刻走啊，我唔想見到你」