我次次拍拖都拍唔長，因為我……: 阿希篇

嘩屌聽大叔講完，雞皮都起埋毛管棟，竟然有啲咁恐怖嘅嘢，但平時老豆份人平易近人，待人有禮又唔似會得罪人，點解會畀人落咗降，我諗極都唔明

大叔話「唔洗太驚嘅，你都早發現，應該搞得掂嘅」

我話「我聽日都會去搵師傅問吓，睇吓點解決」阿儀話「你聽日約左幾點見師傅？」我話「聽朝早約咗十一點，我會偷偷影低個師傅個樣，我係某購物網到訂咗支偷拍筆，上面有冇細嘅攝影鏡頭，平平地98蚊，我一陣試吓影成點」

我試完偷拍筆，發現cheap嘢真係cheap嘢勁唔清，影到起晒格咁，十足n 年前老豆用啲nokia 電話咁，二百萬像數咁款，不過算，勉強都影到樣嘅，我問大叔借咗件淨色polo shirt,貪佢心口有個袋可以插支筆落去，方便聽日偷拍

老實講，我心情都好焦急，淨係想啲時間快啲過，可以盡快見到個師傅，一嚟想盡快搵出老豆發生咗咩事，同埋想睇下佢究竟係咪殺阿儀個兇手，成晚我都眼光光，都好似冇訓過教咁





朝早阿叔起身梳洗到整整齊齊咁話「我出門啦，今晚我收六點」我仲訓咗係梳化到，望下個鐘見到，咦都周嚟八點半

我見都訓唔著，所以打算著好衫，打算落樓食個早餐之後就出發去搵譚耀聰

雖然約左十一點，但其實我都早咗到，我大約十點半都到咗佢鋪頭門口，我望下間鋪招牌寫住「茅山天師」，門口寫住營業時間「十一點至六點」，睇嚟我太早到，佢都未開門，我企咗係門口一路撳電話一路等，等等下見到有個阿六七十歲嘅阿伯行緊過嚟，佢行到拐下拐下，要靠柺杖助行

佢問「你係咪約咗十一點果位客人？」我話「係啊，早晨啊，聰哥」佢二話不說打開咗鋪頭嘅玻璃門，叫我入去坐先，之後打開咗店入面嘅燈，鋪頭唔算大，應該得幾十呎，所有嘢都一目了然，入面得張辦公枱同兩張櫈，辦公枱隔離仲有個舊式木櫃，雖然地方細細但啲嘢都尚算整齊

佢話「等咗好耐啊？點稱呼呀？」我話「都唔係等咗好耐，我叫阿希，最近呢排身邊發生咗啲奇怪嘢」





我對佢打量咗一下，佢一頭短白髮，皮膚黑黑實實，睇落係個普通嘅阿伯，頸到掛咗一件玉器，但睇落唔係成日見開嘅墨綠色，反而係藕粉色，都幾特別

佢話「你呢排有冇乜唔妥？」我話「冇啊，今次係個屋企人有事，所以嚟問下咩事」佢話「唔係喎，你面色都唔太好喎，你似畀鬼搞喎...」心諗，唔通我成日同阿儀接觸所以影響咗自己嘅氣息，不過我今次嚟嘅重點係問關於紅線嘅嘢同調查佢係咪當年嘅殺人兇手，所以我求其帶過就算，我話「話說我有陰陽眼，但我呢排睇到啲好古怪嘅嘢，我見到我老豆最近頸上纏咗條紅線，唔知道係咩嚟，所以想嚟問下...」

我話都未講完，佢就插咀講咗句「你有陰陽眼唔代表你應該同佢哋接觸，你冇學法更加要小心啲，我勸你都你少啲接觸佢哋為妙」我咩都冇透露，但佢好似知道我好多嘢咁，我聽完佢嘅忠告後都唔知畀咩反應好，只好點頭算

佢繼續講「你講嘅所謂紅線，其實係南洋嘅邪術，姐係降頭，降頭有分好多種，所以聽你就咁講我都好難判斷佢中咗咩降頭，最好都係帶佢本人嚟，等我可以對症下藥，順便解埋降」果然同大叔講嘅一樣，老豆的確係中左降，但老豆都唔信呢啲嘢，我好難遊說佢嚟

我同師傅講「我老豆唔係好信呢啲嘢，要我帶佢嚟睇嚟有啲難度」佢話「咁又唔一定係咁死版，要佢坐係到畀我作法先解到降嘅，你可以當朋友聚會咁叫你老豆出嚟食餐飯，畀我睇下佢咩事，我都有啲簡單方法幫佢解降」





我追問「簡單方法？姐係點？」佢懶神秘咁講「方法係點到時你見到就知」老實講，我唔太鍾意呢個阿伯，講嘢都唔按規矩出牌，總係講得佢講嘢咄咄逼人，但我又有求於佢，所以都唔打算搏咀

佢話「你星期六約你老豆出嚟同我食餐飯，呢件事就可以解決到㗎啦」我話「好，我試下約佢出嚟食飯，約得成之後會通知你，另外想問下，解降頭收費幾多？」

佢話「見你家姐上次幫襯過我，都算熟客，收二千吧」我話「好，我會同家姐講聲」佢話「仲有冇嘢問？冇嘅今次諮詢費五百...」

心諗，係咪都畀咗錢，唔爭在問多啲嘢，我話「如果我有陰陽眼想封眼，收費又大概幾多？」

佢諗咗陣，之後話「其實所謂封眼唔一定會成功，有機會封咗你都會見到，所謂見到鬼嘅情況好似你係一個收音機，你係某個頻率，所以你接受到佢哋嘅訊號，而封眼係試圖改變你嘅頻率，雖然話係改變你嘅頻率，但有機會你仲係個頻帶入面，姐係會接受到微弱訊號，姐係話封眼後都有機會睇到鬼，但可能會冇咁清晰咁，做封眼收費就二千蚊，但老實同你講句，你仍然有見到鬼嘅可能」

真係長知識佢用深入淺出嘅方法解釋咗見鬼嘅原理，而且佢都唔係啲淨呃錢嘅死神棍，仲好坦白講咗封眼唔一定得，咁所以之前大叔去封眼唔成功都可能係佢個講法