我次次拍拖都拍唔長，因為我……: 大叔篇

今日心情非常好，見工好快都通知咗我，仲叫我聽日九點番去報到咁高興即刻開鋪機嚟打下先，打打下機feel 到背脊有啲涼，心諗唔通又係隻仆街女鬼搞鳩我

我繼續扮到冇嘢咁打機，我都唔明宜家我都冇咗陰陽眼，點解我琴日會聽到佢發癲鬧我，仲要啲內容聽得好清楚，嚇到我琴日即刻衝入廁所煲支煙定下驚，睇嚟我以後講嘢都係小心啲好，廢事佢又發癲搞我

打機打到十點左右見有啲餓，求其碌個杯麵再叮翻熱琴日食淨擺係雪櫃嘅燒肉食埋佢，正當我開緊餐之際，阿希番咗嚟，見佢仲買咗啲嘢番嚟，手持一個膠袋

佢話「啱喇，我買咗嘢食畀你做宵夜」我話「少有喎，請我食嘢」

佢話「見你新工見得成當慶祝下囉」佢隨手打開咗個外賣盒，傳嚟陣陣滷水味，原來佢買咗啲滷水鵝片番嚟





我話「咁大盒，食唔晒喎，一齊食喇，鵝片正喎，送啤酒一流，我晏晝落街買咗啲啤酒啊」

阿希聽到之後打開雪櫃攞咗罐啤酒畀我，話「聽日番工啊，唔好飲咁多」我話「得啦，飲少少姐」

阿希一路食一路講「我想問，你有陰陽眼果陣，有冇見過一樣奇怪嘅嘢？」我問「咩嘢？」

佢話「咁嘅，今日我老豆番嚟好奇怪，佢條頸纏住條紅色線，唔知咩嚟....明明入咗屋....但條線又冇消失，唔知係咪撞邪」

我問「你老豆係咪係東南亞地區做嘢？」佢話「係啊，你又知嘅？」





我聽到都心知不妙，我話「你老豆應該畀人落撚咗降，東南亞啲人好興呢味嘢，雖然唔知佢中咩降，不過真係盡快搵師傅睇下好」

阿希聽到嚇到筷子都跌撚埋，好激動咁講「吓，中咗降，唔係掛會點㗎？」我話「詳情我都唔知.....我又冇修法，不過當年我老豆都中過，我果時都見佢條頸有條紅線綁住，我同佢關係唔太好，佢成日群埋啲唔三唔四嘅人，家用又唔畀，又成日打鳩我同我老母，以我所知佢成日去泰國走粉，可能得罪人畀人落降掛」

阿希問「之後點，你有冇同佢講，佢有冇搵法師搞下？」我話「呢啲撚樣我由不得佢死啦，不過當時我仲細，都唔知佢呢啲叫畀人落降，最後佢都死撚咗」

阿希好驚恐咁問「點死㗎佢？中降中到死咗？」我話「佢死果陣人在泰國，驗屍果陣發現佢胃入面有一包包膠袋入住嘅白粉，都唔奇嘅，佢不嬲都走開粉，但最出奇係，佢胃除咗有毒品仲有兩三枝針，驗屍官話啲針拮穿咗啲膠袋，啲白粉流晒出嚟，所以佢係毒死，細個諗緊，佢做咩咁on9 吞啲針落肚....但大咗睇到啲靈異網站講，有樣嘢叫飛針降，中咗嘅人會無故地內臟疼痛，照咗x ray 會見到有針係身體入面」