我次次拍拖都拍唔長，因為我……: 女鬼篇
阿希終於番嚟喇，我問「點啊？順唔順利？影唔影到個師傅嘅樣」
佢話「影到，我過落個電腦到畀你睇下我拍成點」阿希打開咗個電腦，將偷拍筆嘅記憶卡拆咗出嚟，插咗落電腦到，我細心咗睇佢偷拍嘅影片，睇嚟像數比較低，啲片有啲朦朧但都叫勉強睇到
係我眼前出現咗一個阿伯，白髮平頭裝，雙眼唔算大但都算炯炯有神，皮膚幼黑，可能曬得多，佢面部皮膚都幾粗糙，睇嚟佢唔係阿聰，阿聰好鬼貪靚，之前留開中長髮，平時有少少太陽都怕曬黑，同眼前呢個阿伯嘅打扮截然不同，再者阿聰佢眼大大，面長長，面部輪廓都唔太似眼前嘅呢個阿伯
阿希問「點啊，呢個聰哥係咪你講開果個阿聰？」
我搖搖頭話「唔係，我唔識呢個人」阿希話「唔洗失望，我諗就算唔係同一個人，但都係同門師兄弟，我打算繼續同佢打交道，遲吓熟咗就直接問佢識唔識陳振聰，一定會搵到個衰人出嚟」
我話「好喇
希望搵到佢喇，麻煩晒你....題外話，你爸爸單嘢點？解決咗未」佢話「師傅要求同我老豆見個面，會約今個星期六見，我陣間都要同家姐商量下，睇下點安排」突然間，阿希放係枱頭嘅手機響咗一下短嘅鈴聲，佢望下電話發現係阿謙媽媽wtsapp佢，內容話「阿謙嘅手術好成功，佢逐漸地恢復意識，終於唔洗插胃喉，可以食番嘢，你聽日得唔得閒，可以嚟醫院探佢」
阿希睇完呢個訊息後，面露笑容話「佢好番喇，伯母叫我聽日可以去探佢，你聽日一唔一齊去？」
我話「好啊，反正我屈係屋企都冇嘢做」