我次次拍拖都拍唔長,因為我……: 阿希篇
話說我帶咗阿叔入家姐間房後,我見到佢個樣好唔妥,好似嚇到面青口唇白,唔通佢真係見到間房有嘢?我問佢「你係咪睇到啲咩?」
阿叔細細聲講咗句「er......我想......食煙....附近有冇士多,我想買包煙食」睇嚟佢想搵籍口離開我間屋,我話「有啊,村口有士多,我帶你去啊」
我帶咗佢離開屋企,我一路行一路問「做咩啊?係咪有啲咩問題?」阿叔全程一言不發,之後係褲袋攞咗包煙出嚟,點咗支煙吸咗兩口,我話「不如去附近籃球場坐下好冇?」佢點咗下頭
我哋坐咗係籃球場啲長凳到,大叔由沉默變番正常,開口講嘢,佢問「你家姐啲衫係邊到買?」
「唔知啊,應該都係網購買,佢成日都買啲日系二手衫」
大叔嘆咗口氣咗講「唔怪得之啦,你家姐間房好撚猛啊,應該係啲二手衫出事」我唔係好明佢講咩,問佢「你意思係啲鬼跟住啲二手衫入咗我屋企?」
佢話「啲二手衫呢,好多都唔係從正當途徑收集番嚟,好多係故衣嚟,姐係死人衫.....果啲朋友仔係附咗係啲衫到,所以我勸你哋以後都唔好買二手衫」
聽完大叔嘅解釋,我心入面不禁有種不寒而慄嘅感覺,連大叔呢啲見鬼見到慣嘅人都咁大反應,睇嚟當時個畫面真係好衝擊。
我繼續追問「頭先你見到幾多隻朋友仔?佢哋係點嘅樣?」
「望咗眼見到有大約六至七個......佢哋附咗係啲衫到,一個個好似被衣架掛住咗係晾衫架上面,佢哋本身應該feel到有客人入屋,所以匿埋係你家姐架房到,唔想畀人見到,當你一打開門果陣佢哋都不約而同咁望住我哋,個種眼神好似覺得我哋好滋擾咁」
我話「唔撚係掛
![](https://cdn.lihkg.com/assets/faces/normal/@.gif)
大叔冷笑咗下「都有啲似掛爐燒鴨嘅......唉,時候都唔早啦,我番屋企先.....遲下再聯絡」
我當時心諗,仆街咁冇義氣,咁快走
![](https://cdn.lihkg.com/assets/faces/normal/devil.gif)
正當佢想起身走人果下,我即刻反射動作,轉身攬住佢條腰,唔畀佢走....雖然果下動作好基,但我冇辦法,冇人陪我我根本唔敢番屋企,我死死地氣話「救命啊大佬,唔好走,幫幫手諗下點送走啲朋友啊,唔該」