我次次拍拖都拍唔長，因為我……: 大叔篇

唉，跌咗個桔都好彩執番個橙，本身我想快啲飲完杯咖啡就走，但聽到條傻仔有個年約廿幾歲嘅家姐，仲兩個一齊住，心諗，如果我話幫佢，借啲易上佢屋企咪有機會識到佢家姐。作為一個長期單身嘅毒撚，我當然唔會放過呢個機會啦，扮到好積極想幫佢咁，我問佢「你幾時發現屋企開始有朋友仔？呢排有冇做過啲咩，去過邊到？」

阿希話「冇啊，冇去過咩地方，dse放完榜後都冇野做，成日屈係屋企打機。早一兩個月吧，屋企開始有啲靈異現象，例如廁所會無故有沖廁聲，客廳會有人拉凳敲枱咁......」

我話「咁猛？你地冇打算搵法科師父搞搞佢？」阿希嘆氣講咗句「我都想搵師傅呀，但我又冇錢啊，再者老豆又唔信，唯有自己解決，如果我見到佢哋，想鬧走佢哋。你係咪有方法可以開眼啊，係點做㗎，開咗之後就長期會見到？」

我笑笑口同佢講「我呢個方法聽落有啲基，但包你會見到鬼」佢聽完黑人問號咁款，我指一指cafe水吧附近張吉凳，叫佢望住，再叫佢伸隻手出嚟，佢不以為然照做，我捉住佢隻左手，佢頓時呆撚咗，擘大個口完全唔識畀反應，過咗十幾秒我就鬆開手，再問佢「點啊？睇唔睇到啲咩？」當時張凳有個朋友仔坐緊，佢望住個咖啡師係到沖咖啡。

佢開始回過神嚟，輕輕點咗下頭，咀角微微抖動，睇嚟真係嚇撚親，佢用嚇到振晒嘅手攞住枱頭杯mocha飲咗兩啖，睇嚟想飲嘢定下驚，之後佢細細聲問「你......點做到㗎？點解我會突然間睇到......果啲野」





我將拖手通靈嘅事解釋咗畀佢聽，佢擺出難以置信嘅樣，好似接受唔到啱啱發生嘅事，我話「係咪好驚，接受唔到啊？又話想同屋企啲朋友仔講數，見一隻都嚇到咁嘅樣」阿希佢扮到好鎮定咁話「我未ready姐，突然間見到緊係嚇親啦，我冇野喎，佢地咪又係同常人一樣咁......都冇想像中咁恐怖」

雖然阿希扮到好淡定咁，但佢之後全程都唔敢望去水吧個方向，為咗令佢冇咁驚，我話不如買單出去行下，佢點頭話好，佢出咗餐廳後好似鬆咗一口氣，果然係個膽小嘅細路。

我搭住佢膊頭笑笑口問佢「點啊，仲係咪決定要睇下屋企有冇鬼啊？見你驚青成咁.....」

佢發脾氣用膊頭撞開我隻手，大聲咁講「驚你老味啊！我嚇大㗎⋯⋯我點會驚呢啲嘢，我不知幾想快啲番屋企睇下邊條仆街霸住我間屋，快啲趕佢走啊」

我話「咁啊，擇日不如撞日，宜家上你到，同你探下你屋企個朋友仔啊」我打算用激將法，趁機上佢屋企





佢一口答應咗「好啊，冇所謂，我都想早啲解決個問題」


Yeah，計劃通終於可以上佢屋企，咁就可以見到佢家姐

話說阿希屋企係元朗某條村到住，我哋去到市中心又要轉小巴先到佢屋企，落咗車後我跟住阿希行咗入條村，入面有好多間村屋，我哋穿過啲窄巷行咗約三分鐘，終於見到阿希屋企，眼前係一間三層高嘅舊式村屋，阿希一家係住地下果層，雖然間屋睇落有番咁上下樓齡，但又未至於日久失修溶溶爛爛咁，冇想像中咁陰森。

一入到佢屋企，就望到佢個飯廳，我問阿希「咦，你家姐呢？」阿希話「佢今日番工，應該晏啲番嚟，你要唔要飲嘢？」我見有啲口乾話想飲嘢，佢叫我等等，我坐咗係張梳化到周圍望，暫時都冇見到啲咩，間屋都乾乾淨淨啊，唔似有鬼，接過阿希手上嘅可樂，我隨即打開嚟飲，一路飲一路問「呢到買定租？見你室內都有翻新，裝修都幾新淨」

阿希話「租㗎，住咗兩年左右啦，呢到三房一廳，我哋屋企人各自都有自己間房」我話「暫時睇落到「乾乾淨淨」呀，介唔介意帶我去房睇下周圍嘅環境？」





阿希話好，帶咗我去佢自己間房，雖然睇落有啲亂但又未見到有朋友仔嘅蹤跡，我搖頭示意話見唔到有嘢，之後佢帶我睇埋佢家姐間房，佢開門前話「家姐間房好亂，佢呢排網購咗好多嘢周圍扔，唔好見怪.....」佢打開房之後，我嚇到腳軟，我咁大個人都未撚見過咁恐怖嘅場面

間房細細大約七八十呎，但入面竟然企咗六七件朋友仔係到，講錯咗唔應該係用「企」呢個字，係應該用個「掛」字，佢家姐間房冇衣櫃，係用一個鐵嘅晾衫架，啲衫都係用衣架一件件掛咗係上面，我當時見到啲朋友仔係著住佢掛係到嘅衫，一個個好似被掛咗係個晾衫架上面，我果下嚇到畀唔到反應，完全呆撚咗⋯⋯