我次次拍拖都拍唔長，因為我……: 阿希篇
我叫阿希，今年十七歲，本身唔係好信有鬼，但呢排屋企出現咗好多古怪嘢，好似真係撞咗野，本身有叫家人搵啲法科師傅嚟睇睇，但佢哋都唔係好信，又話搵師傅要錢，唔想畀埋啲無謂錢，簡單介紹下我屋企，我屋企係單親家庭，老豆就長期係外國工幹，屋企得我同家姐住，家姐大我八年，都出咗黎做嘢，我就中六畢業後又升唔到學搵唔到工，日日屈係屋企，可能得我一個長時期係屋企，所以只有我撞到啲靈異嘢。
有時得我自己一個係房打機，都會聽到客廳有拉凳聲，出去廳到睇又冇咩嘢，但見到係梳化啲咕臣畀人扔晒落地，有次仲離譜，廁所冇啦啦傳嚟沖廁聲，屋企明明得我一個，我檢查完廁所沖水掣又唔覺有壞，我硬係覺得屋企啲朋友仔想話畀我聽，佢哋存在係到，想同我溝通咁。
後來上連登見到有個人開post話可以幫人見到鬼，所以就膽粗粗約條友出嚟，睇下係咪真係有方法見到鬼，同靈界朋友溝通。
我約咗個叫阿林嘅網友出嚟，佢睇落去係個三十歲嘅阿叔，見佢gel晒頭戰鬥格咁出嚟，唔講以為佢去飲，我拍一拍佢膊頭，見到佢個樣好似馬明咁呆撚咗，從佢失望嘅眼神我估到佢應該本身以為我係女女，為咗緩和呢個尷尬嘅場面，我建議去附近嘅cafe一路飲嘢一路傾，我見佢全程不停望住自己隻手錶，就知佢冇心想同幫我，想求其敷衍我。
入咗cafe，佢一坐低就一言不發咁㩒電話，為咗氹佢幫我，我打算言談間透露自己有個家姐，引起佢嘅注意，我話「唉，最近屋企好似撞咗嘢，嚇到我同家姐死呀⋯⋯」佢一聽到家姐兩隻字就冇再㩒電話，仲扮到好關心咁問「屋企咩事啊，講嚟聽下？」
心諗，死狗公，果然一聽到有女就態度唔同晒，不過我又要佢幫我，所以我忍住不屑嘅表情，扮到懶友善咁同佢講「話說我同家姐兩個住係元朗嘅村屋，最近屋企成日有啲古怪野發生，所以想知屋企係咪真係有鬼」阿林話「所以你想我幫你開眼睇到朋友仔？」
「係啊，我想睇下屋企咩事，或者啲朋友仔係咪想同我地溝通」
阿林搖搖頭話「我勸你最好都唔好同佢哋溝通，佢哋好煩㗎，真係易請難送，佢哋知你見到佢就會不停煩你，要你幫佢哋......所以見到嘅話都扮睇唔到就最好」聽完佢呢句咁語重心長嘅說話，我靜咗陣唔知畀咩反應好，本身我都估緊眼前嘅大叔係咪個神棍，扮幫人開眼呃蝦條或者騙財，但睇到佢抑鬱嘅表情，好似同我哭訴緊佢平時食咗唔少苦頭，睇嚟有陰陽眼嘅人平時都好多煩惱。