我次次拍拖都拍唔長，因為我……: 大叔篇

話說我係一個年過三十歲嘅毒撚，但次次拍拖都拍唔耐，我一直都唔知咩原因，一直諗緊係咪自己做錯咗啲咩，得罪咗人哋，每當問對方咩原因分手，對方都吞吞吐吐，好似有難言之隱咁，直到上次同一個女仔friend出街食飯後我終於知係咩事.......

我天生有陰陽眼，成日都睇到啲人哋睇唔到嘅野，老實講我慣咗，都唔當係咩嘅一回事，亦冇好刻意同人講，包括以前啲女朋友。

最近我識咗個女仔叫阿欣，我同佢有好多共同話題，好快就熟落咗，之後仲會成日出街，有次同佢行街佢話想行捷徑，行後巷穿番出大街，但我望到後巷有一堆「朋友仔」，我話「唔好啦，後巷污糟呀，不如兜個圈啦」之後佢都肯兜大圈行去隔離街，但見到佢有啲黑面。

第二次約咗佢去戲院睇戲，我哋買咗中間位置嘅飛，我一入到戲院，即刻屌咗出聲，又見到有幾個「朋友」坐咗係中間位置，坐正我哋買咗嘅位，我細細聲同阿欣講，今日個場都唔係好爆......不如我哋坐側邊啲位囉，阿欣燥底講「做咩呀？明明買中間位又唔坐，係要坐側邊，都坐得唔舒服......」我話「當就下我啦，中間位凍啊，側邊位冷氣冇咁勁」佢之後死死地氣都肯陪我坐側邊位，但全程都冇出聲，塊面黑過鍋撈。

睇完戲去到夜晚，氣氛都有啲薑，我想緩和下個氣氛，問佢想食咩，佢話想食附近一間日本菜，我話好啊去食啦，去到間餐廳門口都feel到唔妥，透過門口塊大玻璃都見到班「朋友仔」係入面，成個場得一張吉枱，其他枱都有人坐，佢哋三件朋友坐咗張吉枱，心諗一陣入去實係要坐果張枱啦，即刻同阿欣講「不如轉場啦，唔好食呢間......」阿欣勁嬲話「你個人真係好撚奇怪架喎，睇戲又咁，平時行街又咁，成日做埋啲莫名其妙嘅野，明明餐廳仲有位，又突然間話要轉場唔食，我唔理呀，我係都要係到食！」





佢一枝箭咁衝咗入去，我都喝佢唔住，但果下我淨係想阻止佢，唔想入去食飯，我一下止捉住咗佢隻手，當時我右手拖住咗佢左手，兩人手心貼手心，突然間阿欣面對住張吉枱，呆咗幾秒，之後下意識嚇到即刻鬆咗手，面有難色擰轉頭講咗句「都係唔係到食啦......轉場啦我哋」我哋四目交投，果下我知道阿欣應該都睇到張四人枱有三個黑影圍住坐咗係到，呢下拖手好似將我嘅陰陽眼傳咗畀佢，我終於明點解同我拍拖嘅人都好快同我分手，原來拖手果下對方都會睇到我平時睇到嘅野.......之後阿欣都冇咩再同我聯絡疏遠咗我。

果次同阿欣不歡而散之後，我一直都冇女埋身，諗緊呢個世界會唔會有唔驚鬼嘅女仔，如果對方都唔驚鬼，會唔會接受到同我拍拖呢，所以我屎忽痕，係連登開咗個post問，「有冇人信有鬼？」想識啲唔驚鬼嘅女女，結果都冇咩人覆我。

得一個絲打屌鳩我話：「呢個世界邊有鬼架，除非畀我見到啦」

我膽粗粗覆咗佢話「你係咪真係想見到先，我有個方法幫到你見鬼」

佢話「咩呀，嚇鬼呀，點見啊？」





我話「想知詳情就tg 我，我tg係xxxx」

其實我都冇預佢會搵我，但好神奇我tg 彈咗個notice ，有條友問「你係咪理大王師奶啊？」我睇到個msg 心裏面不禁爽咗一下，秒回覆咗佢話「係啊，你就係果個絲打？」佢話「係啊，我叫阿希，你點稱呼啊？」我話「叫我阿林啦，你對靈界嘅野有興趣？」佢話「都有啲啦，你話有方法可以令我見到鬼，係咩方法？你係茅山師傅，幫人開眼果啲？」我即刻打蛇隨棍上「我果種方法唔似係茅山，不如咁啦，約出黎見下面，我再詳細講你知」阿希過咗幾分鐘話「姐係點啊，懶神秘......係咪真係見到架」我話「包你見到啊，但你見到之唔好後悔啊」之後佢答應咗我，星期六見面，心諗呢鋪我得米啦，終於約到女女出嚟好嘢！

星期六到了，我滿心歡喜，打扮到靚靚仔仔咁出街，gel 個靚頭先出街，打算畀個好印象對方，果日約三點，我刻意早啲到，兩半都到咗地鐵站，一邊幻想緊對方係咩樣，一邊㩒住電話睇下時間到未，想對方快啲嚟到，終於就到三點，阿希sd咗個msg 嚟「我就到啦，你著咩色衫？」我秒回話「深藍色polo衫，企咗係售票機隔離」隔咗半分鐘左右有個人拍咗我膊頭一下，我擰轉頭一望，果下呆撚咗，一個年約十六七歲嘅𡃁仔搭住我膊頭，我都未嚟得切反應，佢笑笑口講咗聲「hi,我係阿希啊，你咁早到嘅」

我心入面大大聲屌咗出嚟you原來係個boy,我好老尷咁講咗句「哦，原來你就係阿希，咩你唔係絲打嚟架」佢話「咪玩啦連登邊有真絲架......」我由頭到尾咁打量咗佢一下，佢大約米七，韓仔頭，身材瘦削，心諗仆街喇，中撚咗伏