性交轉運打喪屍: （138）

咩殺死Kappa，咩抹殺存在，我半點都聽唔明。

「你咁緊張Kappa，我諗你都唔想佢消失架？」Alpha露出奇怪又令人心寒微笑。

「我…我唔明你講乜…」

「Kappa以及呢度俾你打低左嘅其他人，佢地全部係背負住一個任務出生，而呢個任務就係要穿越返嚟搵解藥，當呢個任務消失左，咁你覺得佢地仲會唔會出現喺呢個世上？」

Alpha越講我個腦就越亂，越聽我就越唔明。



「睇嚟你都係唔明，不如就從啱先嗰場地震講……」

接住嗰兩分鐘，Alpha一口氣解釋曬所有嘢嘅來龍去脈。

呢一刻，我終於知道Kappa喺如何誕生，亦都明白點解將usb交俾乘哥，Kappa就會消失。

成件事嘅前因後果就係咁：

喪屍爆發初期，李氏家族捉走左十幾間藥廠嘅研究人員，以及三間大學最優秀嘅醫學教授，困住佢地喺李氏大屋嘅地下城堡嘅一間實驗室，要求對方合力研究解藥。



（無錯，李瓜乘屋企地下居然收埋左個城堡，據說裡面有個大貨倉，儲存左足夠一百個人食二十年嘅糧食同水。）

可惜被捉嚟嘅嗰班人研究左半個月，都無任何成果同進展，仲因為一次地震而導致實驗室發生意外。一批用嚟被研究嘅喪屍，從鐵牢中逃脫，將嗰批研究人員咬成喪屍，甚至直接咬死，最後乘哥要叫炸左城堡幾條主要通道，先至平息左件事。喺意外之中，實驗室無左，而且淨係得返三個研究者生還，仲損失左一半手下。

解藥研製嘅計劃受到重大挫敗，乘哥再派人去其他地方揾資源同人手，結果誤打誤撞之下，喺城大揾到個鬼佬教授條屍，仲有一部電話，電話保存左一段鬼佬教授展示自己用解藥救佢個仔嘅片段，但係由於電話受過損毀，所以片段並唔完整，得兩條零碎嘅片段，亦都無關於如何製造解藥嘅具體資訊。

之後乘哥喺地下城堡重新建構一個實驗室，叫研究者繼續研究解藥之餘，亦諗到左另一個計劃，一個名為嘅「拯救Professor Dave」嘅計劃。

乘哥構想利用時光機，送佢啲手下時光倒流返去鬼佬教授死之前嘅時間，將對方救走。唔講唔知，原來喺乘哥身邊一直收埋個好犀利嘅科學家，偷偷地喺地下城堡幫佢研發高科技產品，例如係時光機。



（之前阿得提過乘哥養住啲科學家，偷偷研發高科技武器，原來係無估錯。）

一開始，「拯救Professor Dave」其實只係一個後備計劃，乘哥嘅重心一直都係放喺現有嘅研究人員身上，期望佢地可以研發到解藥。

後來多次嘅研究失敗，令佢焦慮不安，加上佢身邊嗰名科學家，忽然喺時光機嘅研發上取得突破，於是佢先決定啟動穿越計劃。

當時佢命令研究人員朝早研究解藥，夜晚喺實驗室製造試管嬰兒。

當其時乘哥手上都有三四十人為佢效力，就算唔製造實驗室嬰兒，佢都有人手去進行穿越救人嘅計劃，只不過大家都知，乘哥係一個有遠見嘅人，佢預示到呢個計劃唔會輕易咁喺短期內成功，所以需要更多人手。

Kappa就係其中一個喺實驗室出世嘅BB。

佢地自細就被培養同訓練成對付喪屍嘅人肉武器。