性交轉運打喪屍: （137）

Alpha同佢個手下同楊過喺地下互相糾纏。

期間Alpha留意到手上嘅usb手指不翼而飛：「弊！隻『手指』點解唔見左嘅？」

經過幾下張望，佢便發現usb落入左我嘅手中。

「仆街！快啲還返我！」Alpha雙眼充滿怒火，好大聲咁喝我。

如果唔係俾楊過捉住，我諗佢已經奮不顧身撲左埋嚟。



楊過一挑二，手臂谷起啲肌肉鉗住Alpha條腰，同時大髀夾住另一個裝甲人，完全佔左上風。

「Kappa！仲呆喺度做咩？快搶返啲資料返嚟！」Alpha一邊嘗試掙脫，一邊命令Kappa。

「你頭先咁對佢，依家仲有資格命令人？」我反駁對方。

Alpha無理我，繼續命令Kappa：「喂！你係咪喺度留得太耐，溝左條仔之後，搞到連自己本身嘅任務都唔記得左？係咪唔記得我地從未來返嚟嘅目的？之前你違抗命令，我就當粉筆字抹走佢，全部既往不咎，但依家，你必須同我搶返隻usb返嚟！This is an order!」

Kappa望左我一眼，又望我手上嘅usb一眼，從佢游離嘅眼神以及細緻嘅表情變化中，睇出佢內心嘅掙扎。



「佢講嘅都係真嘅？你地真係未來人？」呢個時候我忍唔住問佢，想從對方口中，尋求真正嘅答案。

Kappa點一點頭，真誠流露：「無錯，我的確係從未來嚟到呢個年代，目的就係為左揾喪屍解藥嘅資料。」

謎底解開，估唔到自己鐘意嘅人，原來真係一個未來人。

「郁手啦！搶佢隻usb返嚟！」Alpha極力催促，同時使盡九牛二虎之力，推開纏繞住佢嘅楊過。

可惜楊過死纏拉打，死都唔放手，並繼續同二人拉鋸。



至於Kappa似乎唔敢違抗命令，但另一方面又唔想夾硬喺我手上搶隻usb，因此猶豫不決。

「唔好俾Kappa搶到！隻『手指』係我地揾到先！我地仲要拎去同乘哥交易！」Sandy把聲突然從上方傳來。

抬頭望上個窿，兩姊妹卒之再蒲頭。

「哈哈哈哈！同李瓜乘交易？你覺得你會換到啲咩？」Alpha放聲大笑。

「起碼都一棟樓啦！」Sandy聲大大回答。

「有樓又點？之後你咪又係繼續，活喺嗰班有錢佬嘅控制之下，繼續任由佢地剝削！同埋你估佢真係咁大方，會用一棟樓嚟換？太天真啦你！哈哈哈！」Alpha繼續大笑。

「笑咩呀你！有咩咁好笑！」楊過頂唔順啲笑聲，再谷多啲肌肉鉗實對方。

我就問Alpha：「乜你唔係受命於李氏家族架咩？阿得明明一眼就認得出，當日你有份幫乘哥捉人。」



「錯！我都話過，你講嘅嗰一個係以前嘅我，呢一刻嘅我係唔受任何人擺佈！而且喺未來，咩叉嘢李瓜乘，李乜基、郭乜乜嗰班阻住地球轉既老而不，已經唔存在！再都無人可以凌駕喺我頭上，我要以我Alpha嘅名義，重新建構一個全新嘅香港！一個屬於我嘅王國！」

聽完對方呢番說話，我終於明白點解佢咁執著，一定要將解藥帶返去未來，原來係想喺遙遠嘅將來，利用解藥令自己變成所謂嘅救世主，然後稱王稱霸。

「咩王國？咩全新嘅香港？都唔知你講乜！收聲啦！」楊過突然翻身，一腳先踢走裝甲人，跟住再反手壓Alpha落地下。

「咪就係！唔好理佢發噏瘋，反正我地就係要交隻『手指』俾乘哥！」樓上嘅Sandy出聲。

Alpha雙手俾楊過㩒住，胸口貼喺地下，郁都唔郁得，但呢個時候嘅佢，卻冷笑一聲，用銳利嘅眼神睥住我講：「如果你照佢地咁講，將隻usb交俾李氏，咁就等於間接殺死Kappa，你將會一手抹殺Kappa嘅存在！」